Amuk  Ðào Thị Lệ, urang bangsa  Hoa, daok di xã Bình Ba, huyện Châu Ðức, tỉnh Bà Rịa - Vũng Tàu brei thau, hadei di tuk taduan hu gu pabe pajaih yaom  10 triệu đồng: “Boh sang hulin biak kan kandah. Meng lavik mai hulin cong khin hu sa gu pabe piah patagok  kinh tế boh sang, kayua rilo boh sang di huyện Châu Ðức hu kaya meda tagok meng bruk rong pabe. Hulin song anek bhik kham merat iek glang gu pabe ni biak siam piah ka nyu menek.”

Muk Ðào Thị Lệ lac sa dalam 92 boh sang urang bangsa takik bahrau taduan hu gu pabe pajaih kayua  Ủy ban bangsa tỉnh Bà Rịa - Vũng Tàu pambuak bruk song  huyện Châu Ðức alin brei dalam bilan  9 meng bloh.

Dok boh sang ong Dương Văn Cư song muk  Nguyễn Thị Tuyết Lan, bangsa  Chơ Ro, daok di palei Tân Thuận, xã Long Tân, huyện Ðất Ðỏ  hu karja pak ni dong padang ngak sang, dong phun pajaih, anek pajaih. Urak ni ,kinh tế boh sang ong Cư  song muk  Lan hu tani tanat. Muk  Nguyễn Thị Tuyết Lan drut droi brei thau: “Bilan pandiak dok mbuan hasit daok bilan hajan ye rambah lo. Boh sang labik halei jeng ia tanjoh, pandap panda pasah abih. Urak ni hu karja pak ni dong ngak brei boh sang bahrau, siam mekre, sang hulin biak uan tambuan oh thau nyai hagait gac. 

Dom sarak dong ka bhap bini bangsa takik yau: padang ngak sang khang kajap, dong pajaih phun pala, anek pajaih, jang yau padang ngak  cơ sở hạ tầng, jalan  điện, jalan mbak, sang bac, bilac iek ruak.. di  tỉnh Bà Rịa –Vũng Tàu hu ngak brei salih bahrau rai duik di mik va. Ong Dương Văn Hạnh, Phó akaok Ban bangsa  tỉnh Bà Rịa - Vũng Tàu  brei thau: Meng Hu bruk sangka di karja dom pakat, abih di nyu nan lac bruk dong phun pala, anek pajaih, ba dom ilamu kỹ thuật bahrau tame bruk pala drak, nan ye rai duik di mik va hu siam tagok mboh di anak meta. Urak ni,  99,67% boh sang mik va bangsa takik dok dalam tỉnh hu pandar  điện; 72,5% boh sang

hu pandar ia  hacih saat ; 98% boh sang hu sang dok khang kajap, taong abih urang bangsa takik kan kathaot  hu brei thẻ bảo hiểm y tế. Boh sang kan kathaot dalam bhum mik va bangsa takik trun  5%/dalam sa thun . Meyah thun  2016, tỉnh Bà Rịa-Vũng Tàu hu 1.467 boh sang urang bangsa takik dalam angan boh sang kan kathaot song jiak si kan kathaot, ye urak ni  dok 895 boh sang min .

Peih ngak danak dak patagok kinh tế - xã hội ka bhap bini bangsa takik tuk vak  2016 - 2020 dalam tỉnh, taeng thun  2018, tỉnh Bà Rịa - Vũng Tàu hu parabha pok jien labaih 17,7 tỷ đồng piah dong tapak gah sang dok song palagaih bruk ngak mbang ngak huak ka mik va. Langiu di nan,  tỉnh hu dong tapuk siphau ka   16.743 anek saih bangsa takik ; dong ka  1.249 sinh viên lac urang bangsa takik  dalam  tỉnh yaom jien labaih 4,3 triệu đồng sa sinh viên yaok thun.

Meng hu dom sarak dong brei, ba mai kein laba, siam lagaih di tỉnh dalam dom thun tapa, dom bhum palei hu rilo bhap bini bangsa takik di Bà Rịa - Vũng Tàu jeng hu patagok, jeng sa labik hadah ka bruk patagok  kinh tế song khik ramik khang kajap  chính trị, trật tự - an toàn xã hội di pak ni./.

(Nguyễn Nam –Báo Nhân dân 24/10/2018)