Việt Nam lac taneh ia daok dalam top dang akaok pablei brah tabiak negar langiu. Urak ini, darak pasar pablei brah tabiak negar lingiu daok meriak gauk biak catang, daok darak pasar dalam taneh ia ngan haong labaih 90 triệu menuac jeng daok njauk brah negar langiu meriak gauk biak catang. Yau nan doanh nghiệp Việt njauk ngak hagait piah khik darak pasar dalam taneh ia?

       Sa-ai Nguyễn Thị Pha sang daok di jalan Lê Văn Sỹ, Quận  3, bal raya Hồ Chí Minh brei thau:  sang sa-ai bhian mbang brah di Camphuchia kayua gauk gar payua meng An Giang tagok, yaom 17 ribau đồng sa kg. Tuk halei brah oh ka ba tagok ye sa-ai nao siêu thị blei brah di Thái Lan hu angan iew lac brah Thái Hom Mali yaom labaih 28 ribau đồng sa kg. Tui sa-ai Pha yaom brah negar langiu yau nan mbiah mbang. Brah bingi, hu thau cambaih asal di nyu saong khik hu an toàn vệ sinh thực phẩm. Tuk sua tangi yau habar sa-ai oh blei brah Việt, sa-ai Pha lac: "Brah Việt Nam ye drei huac urang nong pandar ralo khak, ralo jru halak. Brah Việt Nam jeng hu ralo janih đóng gói  siam min oh thau pasang iek chất lượng yau habar."

       Oh lac ta-eng sa-ai Pha bo ralo sang hu jien mek tame glaong di ban raya jeng blei brah negar langiu piah mbang. Urang brei thau lac brah negar langiu pahe, bingi, bao bì gheih, hu angan je saong hu chất lượng. Dalam siêu thị Mega Merket, brah di Thái Lan hu parang tabiak di sa labik biak mekre meta, jaik jalan nao saong hu ralo menuac blei. Brah Thái Lan hu ralo janih, yaom meng 22 ribau tal jaik 40 ribau đồng sa kg. Oh lac ta-eng siêu thị Mega Merket di doanh nghiệp Thái Lan bo di ralo siêu thị karei yau Lotte, Aone, Big C… brah Hàn Quốc, Nhật Bản, Thái Lan, Đài Loan jeng hu bak abih ngan haong yaom meng 22 ribau tal 120 ribau  đồng/kg.  Kadha njauk biai nan lac brah ini chit jang rilo mbang brah dalam negar min jeng hu urang duah blei. Amuk Phạm Thị Diễm Lệ, iek gah pablei salih di Công ty Đại Nam bhian pablei brah hữu cơ Ong  Biển brei thau: Công ty hu pah taneh di Long An, Đồng Tháp, Tây Ninh piah ngak brah hữu cơ, saong daok padang mblang hamu  200 ha di Quảng Trị piah ngak janih brah ini piah pablei tabiak darak pasar. Amuk Phạm Thị Diễm Lệ brei thau: "Ngan haong yaom 25 ribau sa kg khaol dahlak pablei tabiak hu ralo urang mai blei saong hu urang blei yaom glaong jang. Nan lac bruk caong khin brah hữu cơ saong brah hacih di urang blei  biak glaong. Min kan kandah di labik lac ngak habar piah ngak ka urang blei jia lac bruk pandar brah di drei biak lac brah hacih.”

      Caong khin urang blei brah Việt Nam chất lượng glaong ye doanh nghiệp njauk ngak ka urang blei pandar jia tame meng uy tín, chất lượng pandap panda. Kayua  urak ini, brah dalam negar hu ralo angan brah bingi, hacih, khik hu an toàn vệ sinh thực phẩm, tame kadung gheih meta, mek hu chuẩn yau: brah Tâm Việt,  Hương Việt, Cỏ May  v.v… min labik pablei oh ka hu ralo saong kan yam takai tame siêu thị, abih di nyu nan lac siêu thị negar langiu. Siêu thị negar langiu  chiết khấu glaong jang dua mbang siêu thị dalam negar, yaom chiết khấu meda tagok jaik 30% nan ye doanh nghiệp dalam negar caong khin ba brah bingi tame siêu thị jeng taduan lah. Kayua yau nan ye, langiu di brah Cỏ May hu tiềm lực siam ngan haong jaik 600 labik pablei di bal raya Hồ Chí Minh, daok veik biak takik doanh nghiệp hu ginup pren khang piah peih prong, peih rilo labik pablei lẻ. Amuk Lý Kim Chi, akaok Hiệp hội Lương thực thực phẩm bal raya Hồ Chí Minh caong lac: “Khaol dahlak likau karja brei cơ chế dom đơn vị pablei lẻ hu pren khang yau: SàiGòn Coop, Satra…daong ka dom doanh nghiệp ini peih prong taduan mek pandap panda di khaol dahlak, piah ka urang nao pablei salih palih ruah mboh tỷ lệ pandap nội jeng ralo jang pandap ngoại saong hu dom cửa hàng angaok dom jalan prong yau doanh nghiêp ngoại.”

     Piah meriak gauk haong brah negar langiu, langiu di bruk pataom tame padang angan je saong paglaong chất lượng pandap panda di dom doanh nghiệp, bruk daong ba di Karja piah patagok kênh phân phối, pablei lẻ nan lac bruk njauk ngak piah ka asar brah Việt pahe bingi, an toàn tuk halei jeng mboh dalam talam salao lisei di yaok baoh sang./.