Mikva daok di sang B2.1201 chung cư 4S Linh Đông (Thủ Đức, TPHCM) daok pandik hatai tual băng-rôn piah ndok quyền lợi

Muk Nguyễn Lưu Hạnh Dung daok di sang B2.1201 chung cư 4S Linh Đông (phường Linh Đông, quận Thủ Đức, TPHCM) brei thau, urang daok di chung cư hu taduan sang saong mai daok meng thun 2016. Min, mbiah tal urak ni po buh jien tame ngak lac Công ty Thành Trường Lộc jeng ka oh jao sổ hồng. Hadei di rilo mbang ieu po buh jien tame ngak brei thau bruk ngak sổ tal halei paje min oh hu brei thau, mikva daok pak ni pandik hatai tual băng-rôn piah ndok quyền lợi. Jeng yau dom urang karei, muk Dung caong khin samar hu taduan sổ hồng piah sanang hatai gah adat hukum di baoh sang: “Dalak caong maong mban khik ramik kham marat ngak habar ieu po buh jien tame ngak brei thau piah mboh lac quyền pandar taneh daok oh njauk thế chấp, oh ngak kan kandah tal bruk ngak sổ hồng”

Javap jalei ka bruk ini, Công ty Thành Trường Lộc, po buh jien tame ngak chung cư 4S Linh Đông brei thau lac daok cang ngak salah blaoh danak dak bahrau meng jao hu sổ hồng. Bhap bini di 3 block hu jao sang njauk cang po buh jien tame ngak salah block ka 4, hadei di nan meng ngak harak payua gah chức năng likau ngak brei sổ.

Sa bruk karei, po buh jien tame ngak hu ngak salah ginup danak dak, ngak blaoh gah jien padai min jeng daok “gar” sổ hồng kayua padang ngak oh njauk tui jalan cih tabiak meng akaok meti. Di chung cư Gateway Thảo Điền (phường Thảo Điền, Quận 2), kapul padang ngak danak dak lac Công ty Sơn Kim Land padang ngak hầm piah caik radaih lih tabiak lingiu takai di baoh sang jaik 4.000 m2. Urak ni urang blei sang hu biyar blaoh 95% yaom jien min jeng ka oh hu brei sổ, Ong Nguyễn Minh Sơn, Phó akaok Hội đồng quản trị Công ty Sơn Kim Land ndem lac, doanh nghiệp tuk halei jeng nao gam haong menuac daok di chung cư, saong daok pambuak bruk haong jabat pagam tal, mayah hu bruk halei mblo tabiak ye halain hatain ngak ginup: “Khol dalak oh klak angan ye di drei kayua caong cak rok patagok công ty khang kajap. Dom bruk pambuak tal kỹ thuật jeng hu adat blaoh, dom sở, dom gah pato tacei khol dalak piah ngak salah dom adat nan”

Tui Kapul sang danaok taneh riya ban raya HCM, dalam abih tih 490 danak dak sang daok hu brei adat ngak dalam dom thun 2015-2019, hu tal 28.324 baoh sang saong căn hộ njauk suai brei sổ hồng. Bruk po buh jien tame ngak suai jao sổ hồng ngak ka rilo urang blei sang suh sah hatai kayua gaok tal quyền lợi, ba tal bruk pataom rilo manuac, dui băng-rôn, biểu ngữ ngak srau kadau an ninh trật tự.

  Phaok Yam ndok Sở Tài nguyên - Môi trường TPHCM Trần Văn Thạch ndom lac, makna praong ba tal bruk ngak sổ hồng daok suai damuai lac kayua tavak gah kỹ thuật saong bruk tabiak yaom. Dalam bruk padang ngak dom danak dak praong, kayua tukvak peih ngak dui atah nan ye hu rilo hukum, adat hu ramik veik, ba tal bruk kan kandah tuk langyah gah hukum. Atau hu dom danak dak hu ramik veik dalam tuk padang ngak, tal tuk ngak salah njauk ngak nghĩa vụ jien padai pabak tame viek ye hu rilo adat tamuh tabiak atau hu salih bahrau.

Dalam 6 bilan akaok thun 2020, Sở Tài nguyên - Môi trường hu kuhria yaom taneh ka 38 danak dak, anak tal meda pathau tagok UBND TPHCM brei tapa 49 danak dak tra. Urak ini TPHCM daok hu labaih 100 danak dak daok hu pok panuac kuhria jien pandar taneh oh ka hu langyah, piah lang talaih tavak tavaiy ye njauk pasang iek yaok danak dak, ngak ka nyu lagaih haong dom quy định di adat hukum: “Sở Tài nguyên - Môi trường hu panuac pok tagok UBND TPHCM meng rilo harak văn bản lang talaih jalan ngak ka bruk kuhria yaom. Daok dom bruk gam tal adat hukum bo sahneng mboh oh ka yau gauk ye njauk ginum biai, patahu tagok UB bhap bini ban raya piah parabha janih meng langyah hu”

Piah jhul samar bruk ngak  sổ hồng ka bhap bini, dom sở ngành pambuak tal di TPHCM brei kham merat pambuak gauk duah jalan lang talaih. Gah sarak, jalan ngak, jabat ngak adat hukum njauk roh duah parabha quyền ka dom quận, huyện hu mbaoh tangin brei sổ hồng, oh daok pataom sa labik di Sở Tài nguyên - Môi trường. Hu yau nan meng patrun hu bruk khiếu nại, ngak srau kadau di dom chung cư kayua baoh sổ hồng./.

Urang lang: Thu Thảo – 30/09