Urang nong pala padai tui jalan hửu cơ 

Ong Nguyễn Thanh Hùng, Phó akaok Ub bhap bini tỉnh Đồng Tháp brei thau, bilan  hè thu tỉnh trun pajaih hu labaih 187.000 ha, dom mblang padai  hè thu avar hu yuak blaoh labaih  43.000 ha, padai mek hu labaih 6 tấn/ha. Dalam dom bilan akaok thun, bruk pablei tabiak negar langiu di tỉnh ni  tagok  20% dut song tuk vak ni thun dahlau, yaom pablei tani tanat, urang nong hu laba. Tui kuhria, bilan padai thu đông tỉnh ni trun pajaih meng 100 tal 120.000 ha, rilo meng ngak dom pajaih padai siam.

"Đồng Tháp yaok thun tathuak ia yaok pluh ribau ha,  tathuak ia piah mek phù sa. Daok bhum gah merong  di  Đồng Tháp ye khol hulin tacei pato tui bilan pala, kham merat yuak  bilan  thu đông dahlau meng ia ndik, song trun pajaih đông xuân yuak dahlau  tết âm lịch".

Pathau khan di Cục pala drak, Mintri ngak nong song patagok palei pala brei thau, pandiak bhang njom mbak biak khang di thun  2020 ngak kan kandah ka dom tỉnh, ban di bhum dalam bruk trun pajaih bilan  hè thu. Min, meng thau kuhria caga di dom tỉnh ban mbiah tal urak ni mblang padai hè thu hu patrun pajaih njauk tuk vak, ngak dom pajaih padai pahe, bingi labaih 73%, dok padai siam mbiah saong nduik meblah labaih 26%. Bilan padai  hè thu thun 2020 di bhum taneran krong CL hu trun pajaih labaih 1,2 triệu ha dalam 1,54 triệu ha, takik jang labaih 23.000 ha dut song bilan hè thu thun 2019.

Ong Lê Thanh Tùng, Phó akaok Cục pala drak brei thau, kreih bilan 6 meda trun pajaih abih padai bilan hè thu di bhum taneran krong CL, urak ni dom mblang padai hè thu avar  daok yuak,  tui kuhria bilan hè thu hu yuak meng bilan 5 tal bilan 9, năng suất meda hu labaih 8,7 tấn. Ong Tùng daok brei thau lac, ngan song bilan padai hè thu hadei di tuk  pablei dalam taneh ia ye dok labaih 2,5 triệu tấn brah pabak ka bruk pablei tabiak negar langiu.

Tui  Cục pala drak, mblang hamu prong di dom tỉnh ban bhum taneran krong  CL jeng dok khik meng 140.000 ha tagok, yaok ha pala di mblang hamu prong  trun phun jien meng 10 tal  15%, padai hu rilo jang meng 20 tal 25%, laba hu rilo jang meng 2 triệu 2 tal  7 triệu meteh/ha. Ngan song bilan padai  thu đông, hadei di tuk yuak padai  hè thu bloh, dom tỉnh ban bhum taneran krong CL meda trun pajaih tui bruk batabiak labaih 800.000 ha, rilo jang 75.000 ha. Ong Lê Thanh Tùng daok brei thau lac

"Bruk trun pajaih di dom bhum saong dom janih pajaih lac njauk haong bruk di anak meta. Daok bhum tapen tasik mbiah tal urak ni daok  samar rao mbak, song khol hulin cong lac  tuk vak trun pajaih di bhum tapen tasik njauk tui kuhria di dom jabat chuyên môn lac dalam  meteh akaok bilan 6 thun ni. Khol hulin batabiak bruk yau nan piah kuhria ka bilan thu đông song kuhria caga ka bilan  đông xuân 2020 – 2021".

Daok bilan padai thu đông, Thứ trưởng Mintri ngak nong Lê Quốc Doanh ndom lac, ngan song dom bhum hu yuak padai  hè thu avar  dom tỉnh ban  brei samar patrun pajaih  bilan thu đông, khik caga njauk tuk vak, njauk tui kuhria mboh dahlau di gah chức năng piah ngak. Taphia di nan, ngak dom pajaih tui drak pasa, dom pajaih padai siam piah pabak dalam taneh ia song pablei tabiak negar langiu.

"Mintri ngak nong jao ka dom  tỉnh hu pasang iek tuk camereip lac 800.000 ha, min khol drei brei hu jalan ngak siam di abih gah tukvak pala. Dom bhum gah angaok urak ni padai bilan hè thu dok yuak, khol drei kham merat jhul avar jang tuk vak bilan thu đông. Avar yau nan gam siam mekre , gam taduan ia ndik song jeng palagaih ka khol drei kham meret jhul bilan đông xuân avar".

Di nyaom biai, Thứ trưởng Mintri ngak nong song patagok palei pala Lê Quốc Doanh hu panuac ieu, dom mblang padai  hè thu oh ka patrun pajaih  njauk khik caga bruk batabiak, khik caga mblang taneh padai oh salih karei. Lingiu di nan, dom tỉnh ban njauk tui  iek  kajap mblang hamu, oh caik rah tabiak jit ruak khat lahik tal sản lượng padai. Langiu di nan, dom tỉnh ban, brei hu dom jalan ngak piah caga langik tasik oh lagaih hu gah chuyên môn kuhria mboh dahlau .Abih di nyu nan lac bilan hè thu rah tabiak dalam bilan hajan brei yuak avar, jhui caik lavik angaok mblang hamu. Tal tuk vak ni, hu labaih 100.000 ha padai hè thu avar hu yuak bloh, yaom pablei tani tanat, phun jien abih takik , kein laba di urang nong tagok glong./.

Urang lang: Hanipha- 4/6