Dalam dom harei ni,, urang đoàn, dam dara di palei Tân Trung A, xã Tân Hưng, huyện Tân Châu, tỉnh Tây Ninh daok taduan tết dalam  bui sambai, chreih chrai. Lac Bí thư Chi đoàn palei Chăm Tân Trung A, xã Tân Hưng, saai  Karysợt hu  menuac sia anit ranam kayua saai duik rai siam mekre, slut mbut, tapak tapaiy song tuk halei jeng kham merat yam tapa kan kandah. Saai tuk halei jeng sahaneng duah jalan ngak yau habar ka bruk ngak di đoàn hu kein laba, dui pachreih hu dam dara hu mbaok tame, abih di nyu nan lac dam dara Chăm. Dalam dom thun tapa, saai hu pok panuac tagok pakat Ủy, Ban Quản lý palei  Tân trung A daong ka bruk dam dara  patagok. Saai kham merat jak ba urang đoàn, dam dara Chăm dalam palei bac megru, kham merat jeng menuac hu kein ka puk palei. Gam song  Ban chấp hành Đoàn xã Tân Hưng, saai hu peih dom mbang taom gaok song dom chi đoàn karei piah klah rabha ilamu, bac megru jalan ieu pataom dam dara. Dom mbang taom gaok, doh tako, me-in thể thao pachreih hu rilo urang đoàn, dam dara hu mbaok. Piah salam uan thun bahrau anek sak menuk  2017,  saai song dom urang dalam chi đoàn ba gauk pasram doh tako, piah nao parang main di dom labik  dalam tỉnh . Sa Y Ta, urang đoàn di palei  Tân trung A, xã Tân Hưng, huyện Tân Châu, tỉnh Tây Ninh brei thau:

Băng tiếng Chăm

Palei Thạnh Thọ, xã Thạnh Bình, huyện Tân Biên, tỉnh Tây Ninh hu jiak 50 urang đoàn dam dara bangsa  Chăm, rilo meng lac nao ngak mbang pah, ngak nong. Yaok urang sa bruk ngak, harei labik ni, harei labik deih,, yau nan ye piah pataom mbaok, jak ba dam dara CHăm sinh hoạt đoàn, hội lac biak kan kandah. Saai  Chàm Vân Súc, umo 30 thun , ngak  Bí thư Chi đoàn palei Thạnh Thọ gam dang akaok kapul dit blong bangsa Chăm di Chi đoàn palei  Thạnh Thọ sahaneng duah jalan piah dui pachreih dam dara bangsa Chăm hu mbaok tame me-in. Saai bhian peih bruk ka adei saai hu mbaok tame pakacah dit blong, palagaih ka dam dara hu mbaok tame giải thể thao phong trào kayua xã đoàn peih tabiak, hu mbaok tame giải dit blong  dom bangsa takik pakat tỉnh… Meng jalan ngak ni, meng thun 2009 mbiah tal ni, dam dara bangsa Chăm di puk palei mai sinh hoạt Đoàn rilo jang, dom phong trào jeng hu rilo urang đoàn, dam dara mai pataom mbaok rilo jang dahlau. Meng nan, bruk jak ba dam dara bangsa Chăm hu mbaok tame bruk XH di puk palei yau ramik ngak pasiam  jalan mbak puk palei, dong mikva padang ngak sang, ngak taneh pala drak…, hu mbuan lagaih jang, ba mai kein laba. Saai  Chàm Vân Súc brei thau:

Băng tiếng Chăm

Dom bruk ngak siam mekre ba mai kein laba di dom urang đoàn di puk palei yau saai  Chàm Vân Súc, saai  Karysợt  hu dong ngak ka thun bahrau di dom palei Chăm Tây Ninh hu bak bui sambai jang, chreih chrai jang./.