Akaok bilan 8, Nguyễn Văn Lam, umo 17 thun, daok di bal Dĩ An, Bình Dương mai sang veik di xã Hương Long, huyện Hương Khê angaok sruh radaih container pajeng pandap di sa-ai likei. Bình Dương tuk nan hu jaik 20.000 urang njauk Covid-19, Lam ieu phone brei karja palei thau piah hu brei nao daok karei piah pacang caga jit. Min tuk daok atah Hà Tĩnh jaik 200 km, Lam hu amaik Nguyễn Thị Châu, 45 thun iew phon brei thau lac "caga hu blaoh labik brei daok karei jaik di sang ".

"Labik brei daok karei" amuk Châu ramik brei ka anek likei nan lac baoh sang pakat 4 prong labaih 100 m2 daok tapen jalan roya 15, labik nao tapa puk 8, xã Hương Long, lac sang di ong Nguyễn Văn Hòa, 60 thun. Ong Hòa tame gah Meraong daok haong anek dua thun ini mai, sang caik veik ka gauk gar mong iek. Amuk Châu ieu phone ginum biai hong ong ka bruk caong khin nyim baoh sang di ong ngak labik brei daok karei ka anek likei di drei, tuk po sang haong karja palei njauk hatai brei nyim saong pandar piah ngak labik brei daok karei, amuk puh ramik, blei ciew, dom janih pandap pandar yaok harei piah ka sa-ai Lam pandar.

Lam brei thau: "Daok karei di labik halei jeng hu, ngak habar bo khik hu siam mekre ka bhap bani. Daok sa drei dalam sa baoh sang yau ini lac biak siam, daong pacang caga hu bruk mbuan njom mbak jit ruak, patrun bruk pataom rilo manuac urang di labik brei daok karei pataom sa labik".

Atah di labik daok karei di Lam jaik 3 km, sa adit tapa sa-ai Trần Hữu Linh, 31 thun, daok di puk 8, xã Hương Long jeng daok puh ramik veik baoh sang kayau prong labaih 100 m2, blei dom janih pandap panda bahrau piah anak tal ngak labik brei daok karei ka diuk pasang adei likei Trần Hữu Đồng, umo 27 thun, jaik mai palei plaih jit meng Bình Dương.  

Tui sa-ai Linh, bruk brei nyim sang ngak labik brei daok karei piah pacang caga jit ruak nan lac biak laghaih, kayua nyu ba mai bruk chreih chai ka dom urang meng bhum jit mai palei, ngak brei patrun meneng trak damak gah jien padai ka bhap bani saong karja palei. Pagap yau bruk di adei likei, tuk mai veik palei meyah nao daok karei pataom sa labik ye meda abih jien mbang, jien ndih, jien mong iek ruak. Daok drei daok karei pak sang tok abih jien dut iek nCoV. Sa-ai Linh daok brei thau lac, sang sa-ai hu mboh tangin sanya ngak njauk tui taong abih jalan ngak pacang caga jit ruak.

Ong Nguyễn Văn Tiều, Bí thư chi bộ puk 8 khan lac, thau hu bruk rilo bhap bani meng bhum jit caong khin mai veik palei, tuk pakat angaok brei adat ngak, dom urang dalam tổ Covid-19 bol bhap rah ra di palei hu ba tabiak jalan ngak lac nyim sang piah ka dom urang nan daok karei, thei jeng mboh bui hatai, pachreih tui tuk pang urang jakar ba tabiak jalan ngak ini. Tal harei ini, puk 8 hu klau baoh sang mai meng bhum jit hu brei sang piah daok karei, rilo sang karei jeng daok caga brei nyim sang.

Amuk Trương Thanh Huyền, Akaok ban Dân vận Tỉnh ủy Hà Tĩnh brei thau, langiu di Hương Khê, yaok pluh baoh sang di huyện Đức Thọ, Vũ Quang jeng hu brei sang nyim piah ngak labik daok karei tui jalan ngak di tỉnh.

Amuk Huyền brei thau "ini lac bruk ngak biak siam, brei ka bol bhap rah ra, brei mboh talei rohim anit ranam gauk di puk palei dalam bruk pacang caga jit Covid-19, min oh njauk lac baoh sang halei caong khin brei sang nyim jeng hu, Karja palei tuk taduan hu panuac caong khin ye nao trun mong iek, taong yaom iek baoh sang nan ngak labik brei daok karei hu halei oh meng brei ngak.”

Hà Tĩnh daok brei daok karei pataom sa labik jaik 8.500 urang, daok karei di sang labaih 1.000 urang. Jeng mai meng bruk hu dom baoh sang brei nyim sang  piah ka dom urang mai veik palei daok karei bo tỉnh hu trun meneing glaih glar dalam bruk rami ramik labik daok ka urang mai veik palei plaih jit./. 

Urang lang: Jasi – 16/08/2021