Akaok QH Ong Vương Đinh Huệ ndom lac 

Brei panuac di tuk peih mbang nyaom ka 2 di UBTVQH mbang XV rah tabiak tuk mesup 17/8, akaok QH Vương Đình Huệ brei thau, bruk padang ngak adat hukum, dalam mbang nyaom ini, UBTVQH meda brei panuac ka danak dak hukum Pakacah pok meyaom pasiam veik. Ini lac 1 dalam 7 danak dak hukum hu QH pasang iek di mbang nyaom ka 2 di bilan 10 anak tal. Daok hukum Pakacah pok meyaom, Akaok Quốc hội kakei lac, brei klaak bruk “nduac” dalam pakacah pok meyaom, saong brei thau lac, bruk pasiam veik hukum ini njauk ngak ka nyu salih bharau khang kadang, cambaih laih dalam bruk pakacah gauk anit ranam taneh ia, pakacah, pok meyaom.

Panuac khan meng tỉnh Lạng Sơn brei thau, bruk  pajeng ba pandap panda tapa pabah mbang negar Tân Thanh, Lạng Sơn (gah Trung Quốc lac  Pò Chài, Quảng Tây) hu peih ngak veik  meng harei ni 18/8/2021.

TP.HCM njauk langyah kỷ luật sang iek ruak di karja oh taduan urang ruak, meyah labik iek ruak nan di Mintri Y tế ye Cục khik ramik iek ruak langyah kỷ luật, daok meyah labik iek ruak lac di tư nhân ye brei mek veik harak adat chip. Nan lac panuac di akaok Mintri Y tế Nguyễn Thanh Long di mbang ngak bruk haong dom urang pan akaok TP.HCM ka bruk taong ruak ka urang ruak Covid-19 di harei 17/8.

Meng akaok mbang jit ka 4 tal ni, Bình Dương hu  49.833 urang njom COVID-19, urang ruak thit ruak hu mai sang veik jiak 14.000 urang, 402 urang metai. Piah dong ka bhap bini dalam tuk vak paatah di gauk, Tổng đài 1022 tỉnh Bình Dương hu pabak 32 jamriak piah taduan mbang ieu phone. Jiak di ni jalan talei pandiak tuk halei jeng dok dalam bruk ieu oh hu. Sở Thông tin-Truyền thông tỉnh Bình Dương brei thau, kayua urang ieu mai biak rilo ba tal quá tải jalan talei, langiu di nan dok hu labaih 1.700 mbang ieu bleik me-in yaok adit nan ye bhian gar jalan ieu. Urang pan akaok Sở Thông tin-Truyền thông cong khin bhap bini hu bruk caong khin biak biai meng ieu, plaih quá tải jalan talei ngak kan kandah tal mbang ieu caong khin biak biai di urang karei

Sở Y tế ban raya HCM harei kabroi brei thau, hu 4 quận, huyện lac: Q.5, Q.11, Quận Phú Nhuận haong huyện Cần Giờ ngak hu blaoh bruk klauk vắc xin Covid-19 mbang 1 ka urang umo labaih 18 thun. Yau nan, dalam mbang ka 5 klauk vắc xin pacang Covid-19, meng harei 22.7 tal abih harei 16.8, TP.HCM hu klauk vắc xin pacang Covid-19 brei ka 3 triệu 700 rabau menuac, taong abih jeng hu siam mekre, salamat. Dalam 4 harei tapa, meng harei 13 tal harei 16.8, hu 282.576 urang hu klauk vắc xin Covid-19 Vero Cell di Sinopharm.

Hadei di tuk hu urang njauk Covid-19 camereip abih dalam bhap bini hadei di 6 bilan oh hu, mesup ini 18/8, Niu Di-lân (New Zealand) daok hu veik 4 urang bahrau njauk ruak. Tapa nan brei mboh jit ruak daok kandauk dalam mbuan njaom mbak saong brei thau ka tukvak pacang jit bahrau di taneh ia ini. Kuhria tal tuk ini, 18% menuac sia New Zealand hu klauk jru ginup saong jaik 1 dalam 3 menuac sia taneh ia ini hu klauk 1 mbang vaccine.

Gah Y tế dunya (WHO) ndom lac bruk srau kadau di mblang kapal haoh di ban ine Kabul di Afghanistan ngak brei suai veik bruk pabak pandap y tế. Mesruh metak jeng ngak brei klaih klaoh bruk klauk vaccine pacang COVID-19 di taneh ia ini. Bruk langyah menuac nduac klaak Afghanistan jeng daok lac bruk pandik akaok ka dom taneh ia karei, abih di nyu lac di châu Âu – labik ndoa naong rilo menuac “di cư, tị nạn” meng Trung Đông dalam rilo thun tapa.

Kinh tế Campuchia tui kuhria tok tagok hu 2,4% di thun 2021. Dahlau di nan, tuk akaok thun, dom chuyên gia kuhria mboh dahlau lac kinh tế Campuchia meda tagok hu 4%, hadei di tuk trun -3,1% di thun 2020 kayua gaok kan kandah di jit ruak Covid 19./.

Urang lang: Ái Nghiêm -Hanipha- 18/8