Mintri Y tế hu var ngak bruk song dom mintri dom gah ka bruk pacang caga jit Covid 19 

Brei panuac haong gah y tế saong urang ngak praong di dom tỉnh, ban di nyaom biai pataom eik veik thun 2020, ginum jalan ngak thun 2021 di gah Y tế, peih tabiak di page 6-1, Thủ tướng Nguyễn Xuân Phúc taong yaom glaong dom bruk ngak hu di gah y tế dalam thun blaoh, abih di nyu lac bruk pacang caga Covid-19, brei thau cambaic laic yaom iek ruak, yaom pandap, jru tavao, bruk pandar jien di sang iek ruak…Thủ tướng jeng brei thau, meng bruk ngak hu siam dalam pacang caga jit ruak, dunya hu thau tal Viet Nam rilo jang, tapa kadha biak birau lac “ngoại giao y tế”. Yau nan min, Thủ tướng kakei lac jit ruak daok mbuan njom tame biak praong, abih di nyu lac urang mai meng negar langiu, dalam bhap bini meyah pasang iek oh catang. Thủ tướng kakei brei langyah catang dom kapol, dom urang hlei ngak suan bruk pacang jit , caik ka jit njaom mbak.

Tui kuhria mboh dahlau di 2 mintri (Công Thương song Nông nghiệp), bruk pablei brah tabiak negar langiu  thun 2020 hu 6 triệu 150 rabau tấn, tui yaom jien lac labaih 3 tỷ  70 triệu USD. Yaom lac brah pablei tabiak negar langui trun labaih  3,5% dut song thun  2019, kayua piah khik ginup padai brah mbang dalam negar, min yaom pablei tabiak negar langui tui kuhria dalam thun mek hu 499 USD sa tấn, tagok  13,3% dut song thun 2019. Ni lac yaom glong di abih dalam dom thun jiak di ni, ba mai kein laba prong  ka urang ngak padai

Ban raya HCM meda takik brei peih ngak dom danak dak buh jien tame padang ngak sang daok birau, sang chung cư glaong rilo tal meyah oh hu bruk padang ngak hạ tầng kỹ thuật, hạ tầng xã hội sumu saong dom quận 1, 3, 4, 5,6, 11, Phú Nhuận. Nan lac sa dalam dom jalan ngak brei cak rok patagok sang daok hu ndem dalam Đề án Padang ngak danak dak patagok sang daok di Ban raya HCM tukvak 2021 - 2030 birau hu Phaok akaok UB bhap bini Ban raya Lê Hòa Bình mbaoh tangin blaoh.  

Harei ni 7/1,Tòa án bhap bini ban Hà Nội hu peih mbang langyah camereip urang dahlau deih ngak akaok mintri  Công Thương lac Vũ Huy Hoàng dalam bruk "Ngak suan hukum ka bruk khik ramik, ba pandar drap ar karja ngak khat lahik palai pajoa " song "Ngak suan dom hukum ka bruk khik ramik taneh riya" rah tabiak di mintri Công Thương song ban rayo Hồ Chí Minh. Jeng tabiak Tòa song Vũ Huy Hoàng dok hu 9 urang. Dalam bruk ni, Viện Kiểm sát bhap bini pakat glaong di abih mboh lac, jaik abih dom urang nan lac menuac ngak praong pal akaok dom gah, urang jakar pal akaok di mintri Công Thương song UBND ban raya Hồ Chí Minh. Min kayua dom bruk karei di gauk,dom urang nan ngak suan hukum biak trak rah tabiak dalam tuk vak suai lavik,  salih quyền khik ramik, pandar taneh labik  2-4-6 Hai Bà Trưng lac drap ar karja tapa menuac urang suan hukum ngak khat lahik palai pajoa ka karja pok jien biak prong lac labaih 2.700 tỷ đồng.

Công an Ban raya HCM brei thau: harei 01/01/2021, Jabat Cảnh sát pasang iek Công an huyện Bình Chánh hu tabiak harak brei ba tabiak kaok tui hukum saong brei chap mek Nguyễn Thị Bích Thủy ndih tapui thun 1981, sang daok di labik 228 palei Hòa Hợp, xã Bảo Hòa, huyện Xuân Lộc, tỉnh Đồng Nai, urak ini daok di baoh sang C14J, chung cư Vision labik 96 jalan Trần Đại Nghĩa, phường Tân Tạo A, Quận Bình Tân, Ban raya HCM, ka bruk “Pachot blah mek drap ar”. Thun 2011, Nguyễn Thị Bích Thủy njauk Tòa án Bhap bini huyện Xuân Lộc, tỉnh Đồng Nai taong phạt 02 thun 06 bilan guk ka bruk “ Pandar angan je piah meblah drap ar”, min brei daok gah langiu. Tukvak jiak di ini, muk Thủy lac urang me-in Facebook hu rilo urang thau tal, hu labaih 300.000 urang tame iek. Di fanpage drei, muk Thủy ba tagok rilo thaot binguk, clip ngak bruk pahala…Jabat chức năng iew dom urang hlei njauk pachot pagat atau thau dom bruk ngak suan hukum di Nguyễn Thị Bích Thủy brei pambuak saong Jabat Cảnh sát duah thau Công an huyện Bình Chánh, iew phone ak: 0283.7606.923 piah pabak ka bruk duah thau.

Dom negar EU kateik greik Jabat  khik ramik jru châu Âu (ieu katut lac EMA) brei adat ka vaccine di hãng jru Moderna di Mỹ tuk dom negar naih gheih karei yau Anh, Mỹ song Israel hu pasang iek, brei pandar. Urak ni, vaccine pacang COVID-19 hu pandar di EU lac janih vaccine kayua hãng jru Pfizer (Mỹ) song  BioNTech di Đức pambuak gauk ngak tabiak  hu EMA brei adat harei 21/12/2020.

Biar harei 6/1 lac page harei 7 bilan 1 tui tukvak Viet Nam, dalam dom mong camereip tuk Quoc hoi Mỹ ginum biai piah pasang iek phiếu di ralo cử tri saong brei thau bruk palih ruah Tổng thống Mỹ thun 2020, bruk nan catang tagok njauk brei pacang vin sang Quốc hội Mỹ (Điện Capitol). Sa urang kumei njuak phao patuh tame tada, mbuan metai. Bruk sraw kadau rah tabiak hadei di tuk ông Trump hu kadha brei panuac anak yaok pluh ribau urang pachreih tui, dalam nan brei mboh kapol urang jakar di ông oh taduan lah. Phaok tổng thống Mike Pence iew brei padeih taong paoh gauk saong iew dom urang trun jalan tabiak truh sang Quốc hội, hadei di tuk dom urang nan taong paoh cảnh sát saong nduac tame Điện Capitol.

Dalam bruk hu pagam tal,Facebook,Twitter song dom blah xã hội karei daok dang anak bruk kateik greik di rilo menuac urang ieu padeih   dom tài khoản xã hội di ong Trump kayua ba tal bruk srau kadau di sang quốc hội Mỹ harei  06/01.Twitter harei 06/01 hu kreik tài khoản di Tổng thống Mỹ Donald Trump dalam 12 tuk song hu panuac khan lac meda kreik miat miat. Twitter brei thau tài khoản di ong Trump njauk kreik kayua dom bruk ngak suan gam gam song trak damak ka sarak cambaih laih di Twitter tuk rilo urang pachreih tui ong Trump nduac tame sang quốc hội Mỹ harei 06/01.Facebook song YouTube jeng ba trun video di  Tổng thống Trump ndom puac song dom urang pachreih tui dalam nan ong Trump jeng daok hu panuac lac bruk palih ruah hu bleik saleik./.

Urang lang: Hanipha- Ái Nghiêm- 7/1