Tỉnh Đắk Lắk bahrau peih bruk brei thau xã Ea Bung mek hu tanut palei pala bahrau (NTM)

Bruk alin brei Giải thưởng Asal siam Negar thun 2019, thun 2020 saong Giải thưởng Asal siam dunya Châu Á- Thái Bình Dương brei ka 116 doanh nghiệp peih tabiak di harei kabroi pak Hà Nội. Ini lac giải thưởng glaong abih dalam dom hukum ka asal siam di pandap panda kayua Thủ tướng Rajaei brei alin yaok thun, piah meyaom dom doanh nghiep ngak siam bruk paglaong asal kaya ngak tabiak, dịch vụ, pakhang prein meriak gauk saong ngak mbang hu kein laba, rik daong siam ka bhap bini saong xã hội. Giải thưởng Asal siam Negar hu padang saong peih ngak tui bruk ngak saong 7 tieu chi di Giải thưởng Asal siam di dom taneh ia cak rok birau. Dalam taong abih dom DN hu alin brei Giải thưởng Asal siam Negar mbang ini, hu 61 DN hu angan thun 2029 saong 55 DN di thun 2020.

Anak bruk njom mbak di jit ruak Covid-19, UBND tỉnh Bình Phước hu tabiak sarak samar drah ka bruk patagok pacang caga jit ruak. Urang pal akaok tỉnh ni , hu panuac kakei dom jabat peih bruk pasang iek catang bruk tame tabiak di jalan tapen negar, langyah khang tui hukum dom urang halei tame tabiak suan hukum, peih ngak khang, samu gauk, siam lagaih ka dom bruk pacang caga jit hu ba tabiak tui jalan ngak “pacang caga siam, duah mboh samar, brei dok karei chip, iek ruak siam lagaih, langyah abih, samar tani tanat bruk”.

Biar harei 25/4, Jabat Cảnh sát pasang iek di Công an tỉnh An Giang brei thau daok chap khik 2 urang piah duah thau ka bruk “Pajeng ba pandap panda tapa jalan negar suan hukum”. Dua urang nan lac Nguyễn Hoanh Tha saong Nguyễn Văn Thắng chap hu dalam tuk pajeng ba suan hukum labaih 20 TẤN ratak naih tame xã Khánh An, huyện An Phú, tỉnh An Giang. Dua urang ini hu ba nao daok karei tui bruk ba tabiak di karja piah pacang caga jit Covid-19. Abih tukvak brei daok karei gah y tế, Công an tỉnh An Giang brei pasang iek, langyah tui hukum.

UB bhap bini huyện Ea Súp, tỉnh Đắk Lắk bahrau peih bruk brei thau xã Ea Bung mek hu tanut palei pala bahrau (NTM). Ea Bung lac sa dalam 4 xã tapen negar di tỉnh Đắk Lắk. Dalam xã hu 10 palei song hu jiak 4.000 urang. Hadei di 10 thun peih ngak danak dak padang ngak palei pala bahrau urak ni xã mek hu taong abih 19 tanut padang ngak palei pala bahrau, lac xã tapen negar camereip di tỉnh hu UBND tỉnh Đắk Lắk brei angan mek hu tanut palei pala bahrau. Jeng dalam mbang ni, Ub bhap bini tỉnh Đắk Lắk hu jao hala dok pakacah song jien thưởng hu yaom sa tỷ đồng ka xã Ea Bung kayua mek hu jak jeng dalam bruk peih ngak danak dak pakat negar padang ngak palei pala bahrau.

Tỉnh Bến Tre pambuak saong Gilang pariak Ngak nong saong patagok palei pala (Agribank) dhar Bến Tre birau peih bruk jao brei 60 baoh sang anit ranam di huyện Chợ Lách. Sang hu ngak meng be-tong, pasei, tabung tauk ton, praong takik di nyu lac 32 m², khang kajap pacang hu hangin, hajan ribuk. Abih tih phun jien daong padang ngak lac labaih 3 tỷ đồng.

Tui yaok pataom meng dom khaw tin brei thau kurhia tal harei 25-4, hu takik di abih 1.002.938.540 mbang vaccine Covid-19 hu pandar di 207 negar song bhum taneh. Labaih 58% dalam nan hu pandar di 3 negar, lac Mỹ 225,6 triệu mbang, Trung Quốc song Ấn Độ. Yaom lac, dom negar kan kathaot jeng daok peih danak dak klauk vaccine Covid-19, tapa bruk pabak vaccine samu gauk COVAX kayua Gah Y tế dunya (WHO) peih ngak, min maong rah tapa, tui panuac khan di gilang pariak dunya (WB) bruk klauk jru jeng lac sa đặc quyền di dom negar duah hu jien padai glong.

Tui panuac khan oh ka ginup abih di Hrak mbao Khmer Times brei mboh lac, Campuchia hu labaih 500 mbang urang njom Covid-19 birau kuhria tal harei adit. Campuchia meda yam tapa tanut 10.000 urang dương tính dalam harei ini saong abih tih 74 urang metai. Dom urang njom ruak rilo meng pambuak tal bruk pataom gauk ngak brei njom mbak praong dalam bhap bini di harei 20/2. Ban ine Phnom Penh lac labik pandiak ka jit ruak. Karja pak ini hu brei dui atah tukvak pakauk bruk pablei dom janih ia menyum hu cồn hu pakauk meng harei 10/4.

Bruk dong duah kapan KRI Nanggala 402 song 53 urang lin tasik di Indonesia lahik meng harei 21-4 tuk dok pasram cuh ngư lôi di langiu tasik Bali hu salih tapa bruk srong tagok hadei di tuk dom candiak pacah di sruh kapan lihik hu duah mboh. Urak ni dom kapul dong duah di Indonesia song dom negar karei ka oh duah mboh atau di urang lin halei. Makna ba tal kapan kram dok kham merat pasang iek, duah thau./.

Urang lang: Hani Pha – Ái Nghiêm – 26/04 10:51:50