Di dom bhum taneh rilo pandiak, takik hajan, ye bruk pandar mô hình pruh ia patak pataom lac sa jalan ngak siam piah patagok saong paglaong năng suất phun pala. Kadha “urang ngak hamu caong thau” harei ini, hu khan brei mikva thau dom siam lagaih di mô hình ini piah ngak tui.

            Sang ong Kiều Chí daok di palei Thành Tín, xã Phước Hải hu pilih ruak ngak iek mô hình pruh ia sit sit ka 1,2 sào taneh pala phun thanh long. Ong brei thau: "Pruh ia yau ini biak lagaih, abih takik tukvak, takik jien padai, phun pala hu pruh ginup ia". Meyah dahlau deih, njauk caik mac bơm njuk ia luac harei ka  sa sào taneh (ieu lac tưới tràn), abih jaik 100 lít ia yaok harei ka sa got thanh long, min kein laba oh hadom kayua lingik pandiak, ia samar thu, nan ye ia njom tame gha oh hadom. Daok pruh sit sit tal gha, 20 lít ia lac ginup ka sa phun. Mboh siam lagaih, ong buh tabiak 3 triệu đồng ngak pabak sat hệ thống pruh tal got ka 700 m2 pala medar.

Yau sang sa-ai Hứa Văn Sắn, palei Tuấn Tú, xã An Hải, hu labaih 3 sào taneh pala dom janih njam patam. Dahlau deih, tame bilan pandiak, taneh klaak saoh kayua thu lagu, oh ginup ia pruh. 5 thun dahlau, sang hu pilih ruah piah ngak iek mô hình pruh ia patak pataom meng bruk pruh sit sit  500 m2 taneh. Hu urang jakar tacei pato brei pabak tame thung châm phân tự động lai tame jalan nding ia pruh ka 500 m2 pala phun lasun hala, ong patak pataom hu biak rilo ia pruh saong khak drak, bo năng suất phun lasun glaong jang 2 mbang. Urak ini, sa-ai Sắn ngak hệ thống pruh ia sit sit ka taong abih taneh pala di sang drei.

Jien piah ngak hệ thống pruh nan oh rilo, meng 1 triệu tal 3 triệu meteh sa sào. Anak meta mboh lac, mô hình pruh ia patak pataom nyu ngak brei paglaong năng suất phun pala meng 25 tal 50%,  dut haong jalan pruh yau dahlau deih. Pruh yau nan ia hu samu dalam mblang taneh, saong urang ngak nong meda pruh rilo mbang dalam harei, trun hu tal 60% ia sraiy tabiak lingiu, patak pataom hu 50% jien điện nduac máy bơm ia. Meyah pandar pandap châm phân tapak tame hệ thống pruh, patak pataom hu tal 40% khak drak.

Lingiu di nan, bruk pruh ia di tuk page saong biar harei sup daok patrun hu rilo janih halak halin, daong ka mikva takik pandar jru khik caga phun pala, bo chất lượng jeng hu glaong jang./.