Saai Triệu Thị Gia lac sa dalam rilo urang hu kapul urang kamei xã Hương Vỹ brei limo menek blei meng pok jien di “ Kadung hareik patak patom”. Lac sa xã bhum ceik, bhap bini xã Hương Vĩ duik rai meng bruk ngak nong, rai duik dok kan kandah. Rilo urang oh ka sahneng tal bruk khik caga hacih saat alam môi trường. Hareik hareim, phế liệu bhian tuk klaak lingiu jalan, dalam mblang hamu, oh thau pataom piah pablei. Kapul urang kamei xã sahneng duah jalan, palih ruah bruk ngak lagaih piah gam khik caga môi trường, gam dong ka hội viên tapa truh kan kathaot. Bruk “Kadung hareik patak patom” tabiak rai dalam tuk vak yau nan. Bilan camereip, tong abih urang jakar kapul urang kamei xã Hương Vỹ ba kadung hareik meda ngak veik hu tal sang ilamu patom piah pablei phế liệu. Jien mek hu meng pataom pablei hareik harom dak harei dak prong, Kapul nao blei limo binai mai brei ka urang kamei kan kathaot. Urak ni bruk patom hareik piah patak patom dong ka urang kamei kan kathaot hu jeng sa bruk bhian randap di yaok boh sang hội viên. Amuk Nguyễn Thị Phượng, Akaok dhar kapul urang kamei palei Hồ Tiến, xã Hương Vỹ brei thau:

Urak ni jeng bhain randap ye, sang saai halei jeng hu 2 boh kadung hareik, sa kadung yaok adit drei ba nao am cuh klaak, dok sa kadung ye tuk halei bak ba nao pablei. Jalan ngak ni nyu hu rilo makna, gam dong ka dom adei saai patagok KT, gam hu jien nao rivang adei saai tuk ruak kik pandik harao, dok labaih ye brei dom saai ba mai sang piah blei njam patam yaok harei.

Meng thun 2011 mbiah tal harei ni, Pok jien patak pataom hu meng bruk pataom hareik, pablei hareik di xã Hương Vỹ tagok tal 400 triệu đồng. Kapul urang kamei mek jien ni piah blei 11 drei limo brei ka 9 urang kamei kan kathaot song 2 uranaih hu rai duik kan kandah. Pok jien dok veik piah dong ka dom boh sang urang kamei kan kathoat hu phun jien piah patagok KT. Amuk Ngô Thị Liên – Akaok kapul urang kamei xã Hương Vỹ biak njauk hatai ka dom bruk ngak hu nan.

          Dalam dom thun nan, khol hulin padang rilo jalan ngak piah dong ka urang kamei kan kathaot, hu brei brah, jien, brei padai min tong abih dom janih brei bloh jeng mbang abih, oh ba mai kein lagaih hagait . Kayua yau nan ye khol hulin ginum biai song mban chấp hành ngak tui jalan ngak ni tok mbuan lagaih jang. Kayua limo tok mbang hareik song menyum ia, nan ye oh buh jien tabiak rilo. Urak ni hulin mboh bruk rong limo di khol hulin ba mai kein liba

Brei limo pajaih ka urang kamei kan kathaot lac sa bruk hu makna prong, rik dong pachreih ba adei saai hu rai duik kan kandah yam tagok, tabiak truh kan kathaot, abih di nyu nan lac pok jien nan hu meng hareik harom. Ni jeng lac sa dalam dom bruk hu kapul Liên hiệp urang kamei VN taong yaom glong song cong khin peih prong piah hu rilo jang hội viên urang kamei tabiak truh kan kathaot, padang boh sang trei sil haniem phol dalam tuk vak anak tal./.