Rilo labik hu peih ka tuai mai rivang 

Bruk khik ramik, patagok ilamu di bol bhap dom bangsa takik lac sa dalam dom bruk hu caik hatai ginum biai di Mbang nyaom ka 2, Quốc hội mbang XV. Tui ong Hoàng Quốc Khánh urang kapol QH di Lai Châu, urak ini dom ilamu meng kan di bangsa yau khan ao, daoh tamia dom kadha di bhap bini…mbuan lahik, njuak brei khik ramik chip. Daok tui muk Leo Thị Lịch (Bắc Giang), dom  dự án di Danak dak pakat negar brei patagok kinh tế - xa hoi bhum urang bangsa takik bhum ceik  thun 2021 mbiah tal  ini oh ka peih ngak kayua oh jao phun jien. Brei thau cambaic laic bruk ngak di yaok mentri, yaok gah saong palei pala saong hu jalan pambuak bruk peih ngak.

      Mintri Y tế bahrau taduan 1.910 tu la-an khik piah vaccine, 5 triệu jrum klauk saong labaih 50.000 pa-op salamat tui dom bruk di danak dak kayua rajaei Úc pambuak bruk haong UNICEF daong ka Việt Nam. Rajaei Úc jeng hu sanya daong ka Việt Nam 5,2 triệu mbang vaccine caga COVID-19. Dahlau di nan, Mintri Quốc phòng Mỹ hu alin hadiah ka Việt Nam jamriak langyah gene, hu caik di sang iek ruak Bạch Mai. Jamriak ini daong duah mboh dom đột biến gene saong dom gene karei meda ba tal ruak, dalam nan hu dom biến chủng di SARS-CoV-2. Tui Mintri Y tế, tal urak ini, Việt Nam taduan hu jaiik 15 triệu mbang vaccine kayua Mỹ alin hadiah tapa danak dak COVAX.

       Mban tacei Jalan pacang caga jit COVID-19 tỉnh Hậu Giang brei thau, anak bruk urang njom ruak tagok samar, tỉnh padang Sang iek ruak Dã chiến taong ruak Covid-19  di Sang bac Cao đẳng cộng đồng Hậu Giang ngan saong 500 laneing gaiy ndih iek ruak. Yau nan, Hậu Giang hu 5 labik taong ruak Covid -19 saong taduan tame taong ruak ka labaih 1.300 urang. UB bhap bini Ban Cần Thơ brei salih pakat pacang caga jit tagok pakat 3, brei ngak tui dom jalan hành chính sumu meng harei 11/11; tui nan jao ka Sở Y te caga blaoh blai padang blai y te lưu động di dom labik hu jit srau kadau. Ngan saong 379 mbang urang njom COVID-19 dalam harei 9/11, UB bhap bini tỉnh Đồng Tháp iew brei ptaom tame ngak khang dom jalan pacang padam jit, oh brei jit njom mbak tabiak.

        Di TP.HCM 8 quận, huyện hu dom menuac COVID-19 brei daok karei di sang rilo lac Quận 12 , ban Thủ Đức, dom huyện: Hóc Môn, Bình Chánh, Nhà Bè; dom quận: Gò Vấp, Tân Phú, Bình Tân, abih tih lac 33.826 urang. Sở Y tế ban raya hu pambuak bruk haong gah quân y brei pabak 33 bilai y tế ka 4 quận, huyện.  Sở Y tế jeng bahrau hu harak khan brei  UB bhap bini ban raya thau ka bruk ba 750 bác sĩ Sang bac đại học Y khoa Phạm Ngọc Thạch bahrau bac tamat nao ngak iek bruk iek ruak, taong ruak di y tế cơ sở.

        Urang hu klauk vaccine pacang Covid-19 di Ninh Thuận sumu 97%, yau nan min urang hu klauk vaccine  mbang 1 ka urang umo thun 65 tagok tok hu 65% saong urang umo thun praong hu klauk jru mbang 2 tok hu 10%. Ngan saong vaccine hu parabha brei, Ninh Thuận daok peih ngak dom jalan, kham merat klauk jru pacang Covid-19 hu labaih 80% urang umo 65 thun  tagok. Urang taha  tuk mai tal dom labik klauk jru oh cang hu ba-ar  brei adat. Dom urang ruak umo thun praong nao mai kan brei tame tal sang klauk jru ka urang.

        Thủ tướng Ba Lan khan lac bruk catang tagok haong Belarus meda tagok jang tuk ong ba rilo lin tal jalan tapen negar di dua taneh ia piah pacang bruk rilo menuac daok nduac tame Ba Lan. Gah Biên phòng Ba Lan brei thau, jaik 800 urang di cư padang trại daok gah daih paga di Belarus saong tui kuhria hu jaik 4.000 menuac di cư daok duah jalan tame negar Ba Lan. Dom urang jakar di Ba Lan brei kreik pabah mbang negar haong Belarus. Anak bruk nan, dom kapul nyaom ngak pahla di dunya ndom lac, Ba Lan daok ngak suan quyền tị nạn dunya, min Ba Lan ndom lac bruk ngak di drei lac njauk adat hukum.

         Gah Y tế dunya birau kakei ka bruk mbuan kurang meng 1 tal 2 tỷ  darum klauk jru di dunya di thun 2022 saong bruk nan meda ngak kan kandah tal bruk klauk bruk pacang Covid -19 angaok dunya.  Gah Y tế dunya daok pachreih urang jakar y te dom taneh ia padang jalan ngak cambaic ka bruk pandar  di yaok taneh ia piah plaik laik tame bruk khik piah saong blei pataom darum klauk. Tui Gah Y tế dunya, mbiah tal ini dunya hu labiah 6,8 tỷ mbang jru vaccine COVID-19, dalam tuk abih tih darum klauk duh ka bruk klauk jru lac labaih 6 tỷ darum sa thun./.

Mỹ brei peih pabah mbang negar angaok jalan radaih saong jalan kapal haoh ka tuai negar lingiu hu klauk vaccine COVID-19 ginup meng harei 8/11. Bruk pakauk oh brei nao mai hu klaak abih ngan saong labaih 30 taneh ia. Min urang jakar Mỹ jeng hu panuac ieu tuai tame meng jalan kapal haoh brei klauk ginup saong mboh lac âm tính dalam 72 mon. Tui Jabat khik ramik pandap mbang saong jru tavao Mỹ (FDA), jit praong  Covid-19 di Mỹ meda hu jhul kadun likuk di akaok bilan 1/2022, jeng sa janih ruak tok hu tui labik. Tal harei 4/1/2022, jaik 84 triệu urang ngak dalam dom gah tư nhân di Mỹ brei klauk ginup vaccine COVID-19./.

Urang lang: Mousaphuong-Ái Nghiêm -10/11