Urang vak di tuk halei jeng hu mbaok di dom labik hu jit ruak rilo piah thau dom kadha bahrau di abih 

Meng di tuk Trung Quốc tabiak panuac brei thau ka jit Covid-19 tal urak ini, Đinh Tuấn – urang vak di rayo sao ndom VN daok di Trung Quốc tuk halei jeng hu mbaok di dom labik hu jit ruak rilo piah thau dom bruk, dom kadha bahrau di abih piah payua mai ka taneh ia thau. Yaom lac bruk ngak biak glaih glar, min ngan saong sa-ai, ini lac tukvak oh var hu dalam bruk ngak báo di drei.

Harei 23/1/2020 – lac harei 29 Tết, Trung Quốc pacang veik ban Vũ Hán piah pacang bhum hu jit, jeng lac tuk urang vak jar var ngak danak dak Tết saong brei nao tal dom darak pasar, dom pasak pablei salih piah quay phim, piah tangi sua, duah thau.

Yaom lac ban ine Bắc Kinh daok biak atah di pasak jit Vũ Hán, min di tukvak nan, pak nan jeng hu yaok pluh urang ruak, yaok ratuh urang karei mboh yau njom ruak nan ye menuac sia mboh biak huac, biak duh hatai.

Tuk ini, siuk pacang pabak takik hu kayua menuac urang ba gauk nao blei piah caga ruak. Tui panuac kakei di gah y tế ye brei pandar siuk pacang pabah N95 meng pacang hu jit, abih di nyu nan lac ngan saong dom menuac bhian taom gaok haong urang karei.

Blei hu siuk pacang pabah bhian mboh di Bắc Kinh biak kan, ndom hagait tal janih N95. Biak patuah, dalam sang daok hu sa blah N95 di diuk sa-ai blei dahlau di nan. Blaoh dalam 1 adit hadei di nan, Đinh Tuấn tok pandar sa blah siuk pacang pabah tuk nao ngak bruk, dahlau di tuk gauk gar di Việt Nam payua brei.

Piah pacang jit ka diuk anek, tuk nao ngak bruk mai sang, Đinh Tuấn njauk caga jit tui dom jalan ngak biak catang. Dahlau di abih lac ngak hacih máy quay, ghi âm saong micro. Tame tal pabah mbang ye sa-ai pruh jru bak rup, hadei di nan klung pabah meng ia jru, taoh abih khan ao saong menei hacih meng tame me-in haong anek.

Urak ini urang vak Đinh Tuấn jeng daok ngak bruk di Trung Quốc. Tukvak ini, dom urang ruak Covid-19 di Bắc Kinh daok hu rilo veik, rilo labik daok patagok bruk pacang ruak yau daok mesruh. Sa-ai khan lac: Ngak bruk biak glaih glar min sa-ai hu rilo ilamu jang dalam bruk ngak, pabak ka drei saong gauk gar dom ilamu piah diuk haong jit ruak.

Jeng yau urang vak Đinh Tuấn meng Trung Quốc, dom urang vak karei di VOV jeng hu dom harei nduac pakacah haong tukvak piah brei thau ka jit ruak Covid-19. Abih di nyu lac puac bilan 3, tuk sang iek ruak Bạch Mai di Hà Nội hu rilo urang njom ruak saong mboh lac sa dalam dom sruh jit praong, kan kandah.

Mesup harei 28/3, tuk sang iek ruak Bạch Mai hu adat brei pacang veik, dom urang pan akaok Kênh VTC14 di rayo papar binguk kỹ thuật số VTC samar ba tabiak jalan ngak bruk pak ini. Klau harei hadei, kapul urang vak hu 3 likei saong 1 kumei tame sang iek ruak Bạch Mai daok veik lavik harei piah ba khau tin, piah vak kadha.

Dalam 28 harei ngak bruk pak ini, urang hu khan, hu brei mboh biak samar ka bruk pacang caga jit Covid-19, dom dalikan drut drui ka bruk iek glang gauk di sang iek ruak Bạch Mai.

Tui panuac khan di kapul urang vak, urang sahneng mboh dahlau dom cuang kandah, abih di nyu nan lac bruk mbuan njom mbak. Min oh thei huac hagait tuk nao ngak bruk pak ini, kayua ini lac bruk di urang ngak báo piah ba brei urang maong iek dom thaot binguk tantu cambaih laih di abih ka bruk kham merat pacang jit di sang iek ruak Bạch Mai dalam tukvak kan kandah.

Ngak bruk dalam sa sang iek ruak njauk pacang veik oh brei menuac tame tabiak, meyah oh khang hatai ye mbuan kadun likuk, kayua yau nan ye, abih gauk pachreih ba gauk piah khik hu bui sambai chreih chrai, caga vak kadha, ba khau tin oh lac harei atau melam. Ini lac dom harei ngak bruk bo urang oh var hu.

Daok ngan saong urang vak Hoàng Ân di mBan Thời sự VOV1 ye 14 harei ngak bruk di labik hu rilo menuac brei daok patah di gauk di sang bac quân sự Quân đoàn 1 hu daong ka sa-ai hu biak rilo ilamu. Dom kadha vak di sa-ai hu daong ka urang pang rayo thau cambaih jang ka bruk mbang huak ndik daok pak ini, daong ka bhap bini oh daok mboh huac tuk njauk tame daok di labik hu rilo menuac brei daok patah di gauk.

Rayo papar binguk VTC1 jeng hu sa  kapul ngak bruk di sang iek ruak Ruak nhiệt đới Trung ương cơ sở 2 di Đông Anh – labik daok taong ruak ka dom urang ruak njom Covid - 19.  

Lingiu di khau tin, kadha vak yaok harei, kapul daok hu ngak 1 phim tài liệu ka dom y bác sĩ labik pacang jit. Urang vak Tam Điệp, urang dalam kapul brei thau, dahlau di tuk nao, urang thau lac drei meda njaom ruak, min thei jeng chreih chrai rik daong tame bruk jhul kadun likuk jit ruak.

Lac urang vak iek gah y tế di Kênh VOV Giao thông, urang vak Chu Đức bhian nao tal dom labik mbuan njaom mbak di abih yau ye: pabah mbang negar pakat dunya Móng Cái - Quảng Ninh, sang iek ruak Ruak nhiệt đới Trung ương, sruh jit di xã Sơn Lôi, huyện Bình Xuyên, tỉnh Vĩnh Phúc.

Yaom lac dang anak bruk mbuan njaom mbak, min hatai caong hu dom khau tin “pandiak” saong kein lagaih hu daong ka sa-ai yam tapa hu bruk huac kanda di rup drei piah ngak siam bruk di drei./.

Urang lang: Mousa Phương – 21/06/2020