Langiu di plei ngak sơn mài dok hu palei ngak khan bai pak ni 

Pandap  sơn mài Tương Bình Hiệp di Bình Dương hu angan je dalam negar kayua kajap, mekre, hanjuan, ndung bak ilamu Á Đông. Tui dom nghệ nhân ye tuk vak tagok glaong abih di palei ngak lac dalam pluh thun 1980-1990, tuk pandap hu jao rilo huy chương dalam negar; hu rilo taneh ia di dunya biak takre  yau: Đức, Pháp, Canada, Nhật Bản... Meng bruk padang  hợp tác xã sơn mài hu labaih 160 xã viên song labaih  700 boh sang, bruk ngak sơn mài oh lac  ba jien tame ka bhap bini pak ni, bo dok hu ba bruk ngak ka yaok ribau urang ngak meng dom labik karei mai.

Yaom lac, bruk ngak  sơn mài di Tương Bình Hiệp dak harei dak takik nao  kayua drak pasa  song kayua bruk  đô thị hóa. Rilo sang njauk klaak bruk, dom labik ngak prong oh dok ngak kayua oh hu phun jien buh tabiak  suai lavik, dang anak bruk mbuan phá sản. Meng yaok rituh cơ sở song doanh nghiệp ngak bruk ini, urak ni  Tương Bình Hiệp tok dok hu dom pluh boh sang, cơ sở sơn mài. Nghệ nhân ưu tú Lê Bá Linh duh hatai lac: “Dom urang bac bruk ngak oh dok, sang bac Trung cấp Mỹ Thuật-Văn hóa Bình Dương palih ruah oh hu urang halei bac  ngak sơn mài. Nan lac bruk duh hatai prong ka bruk ngak  sơn mài, mỹ thuật di  Thủ Dầu Một song Tương Bình Hiệp. Jien bilan ginup mbang cai, meng bruk kinh tế patagok meda hu menuac tui bruk, meyah oh hu ye biak kan si khik veik “

Ngak habar piah ka palei ngak oh lahik nao, piah ka bhap bini meda duik hu song bruk ngak dok lac bruk duh hatai di dom nghệ nhân. Ong Trương Quang Tịnh, po cơ sở sơn mài Định Hòa ndom lac, jalan dong ka bruk ngak sơn mài hu khik veik song patagok nan lac brei langyah hu gah kinh tế: Paglaong yaom di bruk ngak sơn mài, jang yau pandap sơn mài piah urang thau ini lac pandap  di Bình Dương, meng nan meng hu rilo drak pasa piah pablei. Taphia di nan, pato pakai ka dom adei anek saih, abih di nyu lac pakat trung học, meng nan dom adei takre, tut angan tame bac khóa sơn mài, atau sang bac  Trung cấp Văn hóa - Mỹ thuật Bình Dương.

Piah dui tagok veik palei ngak meng kan, Bình Dương ngak harak hồ sơ likau pok angan  bruk ngak  sơn mài Tương Bình Hiệp lac inem krung ilamu  phi vật thể pakat negar song tal thun 2016, hu Mintri ilamu - Thể thao song Du lịch pok brei angan. Jeng meng tuk vak ni, Bình Dương daok padang ngak  "Danak dak khik ramik song patagok palei ngak sơn mài Tương Bình Hiệp” kayua dom sở, dom gah ngành dalam  tỉnh peih ngak. Min hadei di nan bruk peih ngak danak dak dok dang sa labik. Tal bilan 5/2017, “Danak dak khik ramik song patagok palei ngak  sơn mài Tương Bình Hiệp” hu UBND tỉnh Bình Dương jao ka ban sit Thủ Dầu Một roh duah, quy hoạch song padang labik  ngak praong ka dom doanh nghiệp sơn mài piah khik ramik alam môi trường. Saong daok brei padang labik parang iek pandap panda ka palei ngak, peih dom tour du lịch rivang main, yaih khan pandap panda palei ngak sơn mài di Bình Dương song auyt sahabah dok dalam negar song langiu dunya.

Tal harei  27/2, Danak dak hu  Ubbhap bini tỉnh Bình Dương brei adat ngak  song ban sit Thủ Dầu Một ba tangin tame ngak jip, kham merat khik ramik patagok bruk ngak sơn mài meng kan. Ong Trần Sỹ Nam, Phó Chủ tịch UBND ban sit Thủ Dầu Một brei thau:  Pato pakai menuac urang  ye pambuak song  Hiệp hội sơn mài Bình Dương, sang bac  Trung cấp Mỹ Thuật Văn hóa Bình Dương piah hu mbaok tame pato pakai veik urang ngak bruk  ni piah khik ramik . Daa dom nghệ nhân padang  tiểu sử palei  sơn mài Tương Bình Hiệp meng padang tabiak tal patagok  palei sơn mài piah rai ranaih umo mboh hu makna di nyu song iek prong bruk ngak sơn mài di drei .

Danak dak khik ramik song patagok palei ngak sơn mài Tương Bình Hiệp hu brei tapa hu peih tabiak  jalan ka bruk patagok palei ngak ni di tỉnh Bình Dương. Kadha prong lac bruk peih ngak danak dak brei hu peih ngak siam piah samar patagok veik palei ngak sơn mài anak bruk mbuan si lahik nao./.

Urang lang: Hanipha -7/3