Baoh sang ong Phạm Văn Tiếp mong tabiak kraong Thạch Hãn tuk halei jeng hu ralo urang nao mai. Page mesup, ong Tiếp hu ba hộp caik dụng cụ y tế nao iek ruak ka urang ruak. Ralo thun tapa, ong Tiếp iek ruak sraoh oh mek jien ka ralo urang, bhap bani theu jeng thau phol. Di palei An Mô thei jeng hadhar tal ong Ngô Ty njauk ruak viêm cơ lan toả. Ong Ngô Ty khan lac, dalam sa mbang nao ngak angaok glai, ong njauk rambuis di takai blaoh nhiễm trùng. Ong Ty ndih di labik luac 3 bilan, pren yava dak harei dak takik kayua ruak dak harei dak trak. Mikva dalam palei brei thau, ong Tiếp mai iek ruak, sơ cứu blaoh pandar manuac dalam sang pajeng nao sang iek ruak. Bác sỹ pak sang iek ruak brei thau, meyah caik suai hasit, ong Ty mbuan metai. Ong Ngô Ty mong ong Tiếp lac urang daong ka drei klah di metai: Dahlak ndih di labik 3 bilan paje, viêm bắp cơ. Tuk nan ong Tiếp mek jarum hút darah saong laneh. Ong nan yau menek tabiak dahlak mbang ka dua.

Ralo thun ngak urang jakar y tế palei, ong Tiếp hu iek ruak ka ralo manuac urang. Hu mbang, 2 - 3 melam, hu urang di palei taong mek ikan gah diah kraong Thạch Hãn njauk ruak blaoh mai pataoh baoh mbang iew daong, ong jeng oh kanda kan kandah nao tal piah daong. Bruk urang thương binh vah ghe nao daong manuac dalam dom mbang ribuk tuk halei jeng sarak dalam akaok di bhap bani palei An Mô. Daok kanar, mbang ia sua khang thun 1999, grauk palei An Mô dauk  dalam aia. Ralo baoh sang dauk tal tabung, mikva preo  iew daong mboh biak anit. Ong Tiếp vaih ghe nao tal yaok baoh sang piah daong. Dalam mbang ia sua nan, ralo baoh sang oh daok lisei huak hu ong daong brei lisei, vah ghe ba nao tal yaok baoh sang. Amuk Nguyễn Thị Hoa daok di palei An Mô hadar veik: Tuk nan, gindang angin ye pok sap iew meng pang hu, blaoh ong nao tal daong. Sang halei biar aia dauk ye ong mai daong, lisei aia ong hu ye ong brei mbang.

Meng lavik mai palei An Mô, xã Triệu Long biak bui sambai anak bruk ngak yau Yuan lac “ăn cơm nhà vác tù và hàng tổng” di ong Phạm Văn Tiếp. Mboh jalan dhuan sruh manuk, sruh kabaw, aia kandaong ye ong mek patau lấp veik piah ka manuac urang nao mai plaih labuh. Mikva pandar jru khik caga phun pala, klaak kalaok bar glai bar klo, bao ni lông di kreh mblang hamu, ong dhul mai pataom blaoh ba lam trun haluk. Jalan tabiak hamu sit sot, oh hu ribaong ba aia, mbraong tathuak aia, ong jak ba mikva alin brei taneh takac ribaong, beik jalan, ngak cống. Hadhar tal pren yava di ong, mikva caik angan “jalan ong Tiếp”, “ribaong ong Tiếp’, “cống ong Tiếp”... Bhap bani palei An Mô biak takre jalan ndom binyai bui sambai di ong Tiếp. Dom mbang peih nyaom biai, khan brei thau ka sarak di Đảng, Karja, ong Tiếp oh ndom tal dom panuac ndom thaoh laoh bo ong pablak asal kadha nan meng dom dalikan bui klao, daoh dai nao mai.

Ong Phạm Văn Tiếp manek tabiak dalam sa baoh sang hu ilamu cách mạng. Ame ong hu mbaok tame bruk mesruh metak njauk kaol Pháp mek karek guk blaoh cuh metai. Ong Tiếp jeng lac du kích akaok meti di xã dalam chiến dịch Mận Thân thun 1968 ba jalan ka bộ đội chủ lực padang ngak hu ralo jayak. Dalam sa mbang ba jalan ka bộ đội taong kaol khamang, ong njauk rambuis, lahik sa gah meta. Sron mbon mai veik, thương binh Phạm Văn Tiếp hu mbaok tame ralo bruk ngak di palei, xã, hợp tác xã. Thun ini, ong labaih 80 thu, ndung bak rambuis angaok rup min ong Phạm Văn Tiếp jeng daok abih hatai haong bruk ngak xã hội./.