Lac sa dalam dom menuac nao dahlau dalam bruk salih meng ngak padai tapa pala la-u ngan saong taneh praong njauk ndom tal diuk pasang sa-ai Bá Hữu Nhi - Thổ Thị Thép, daok di palei Bình Minh, xã Phan Hòa.

 Sa-ai Nhi khan lac, labaih 3 thun dahlau, sang sa-ai kak kajap haong phun padai min thun tapa thun taneh nyu jhak jang, năng suất padai oh glaong. Hu kapul urang nong ba jalan salih janih phun pala, athur raong saong ba nao rivang iek, bac megru rilo bruk ngak karei di gauk di dalam saong lingiu tỉnh, mboh bruk pala la-u hu kein laba, sa-ai Nhi buh pren tabiak ngak brei siam veik taneh saong nao blei phun la-u mai pala iek.

Tuk camereip sa-a pala iek angaok 2 sào taneh di sang, mboh la-u nyu tamuh siam, praong samar, rilo baoh, ia yamen, sa-ai Nhi kham merat ngak pasiam taneh thu lagu daok klaak saoh di sang drei bloh pala 130 phun la-u, dalam nan hu 3 janih la-u karei di gauk lac xiêm dứa, xiêm lùn saong xiêm xanh. Pren buh tabiak hu pabak veik, la-u nyu tamuh siam, urang pablei salih mai tal sang duah blei la-u meda. Sa-ai Bá Hữu Nhi brei thau: Tuk camereip sang blei taneh di labik ini piah ngak hamu, min ngak hu dom thun mboh năng suất biar saong yaom kaom oh tani tanat nan ye salih tapa pala la-u ini. Tuk bahrau pala jeng gaok rilo kan kandah kayua hu dom phun njauk ruak, min khin pala ye drei duah thau jalan pala saong pacang caga ruak ka phun la-u, ngak habar khik hu ia pruh ka phun di bilan pandiak nanlac siam. Dahlak bhian maong tapa mạng ka bruk pala la-u di Đài Bến Tre, meng nan hu thau rilo janih jru piah pacang caga.

La-u mbuan pala, hu rilo baoh luac thun, takik ruak...min brei thau caga đuông saong bọ cánh cứng ye bein la-u nyu siam. Bein la-u sang sa-ai Nhi kayua bahrau yam tame bilan paih baoh mbang camereip nan ye yaok bilan paik sa mbang, hu meng 70 tal 100 baoh, yaom pablei trun tagok meng 8.000 đồng tal 15.000 đồng sa baoh tui janih la-u, dalam nan la-u xiêm dứa lac hu yaom di abih kayua ia nyu yamen saong pahe. Kaoh abih phun jien buh tame ngak, yaok mbang paik baoh diuk pasang sa-ai Nhi mek tame hu labaih 6 triệu đồng.

Ong Thổ Tiến Dô, Phó chủ tịch Kapul urang nong xã Phan Hòa, ndom lac: Urak ini, rilo mikva urang ngak nong di  xã Phan Hòa kham merat salih tapa pala dom janih phun yau: thanh long, la-u, patei, caraih…Rilo sang hu jien mek tame tani tanat meng dom janih phun pala ini, yau sang sa-ai Nhi, sang ong Trinh, tapa nan nyu daong patrun kathaot ka puk palei.

Jaik 3 thun kak kajap haong phun la-u angaok taneh ngak hamu ini, sa-ai Nhi thau hu rilo ilamu dalam bruk glang iek saong khik caga bein la-u, daong ba kinh tế sang tame tani tanat. Sa-ai Nhi khan lac: "Pala la-u takik pren glang iek jang dom janih phun karei, tok thau pacang caga đuông nyu palai kaik. Bilan pandiak brei hu ginup ia ka phun la-u. yaok thun mek gluh ala danao buh tame gha piah pabak dinh dưỡng ka la-u.

Ong Thổ Tiến Dô daok brei thau lac: Meng bruk salih janih phun pala, mikva caong  Đảng, Karja daong palagaih ka mikva hu mesraiy jien yaom laba lap di dom gilang pariak piah mikva buh tame ngak mbang, patagok jien mek tame ka sang.

Meng bruk pala la-u hu laba rilo saong tani tanat, rilo sang dalam xã hu nao tal bein la-u di diuk pasang sa-ai Nhi piah bac megru ilamu ngak mbang, abih di nyu nan lac ilamu pala la-u. Bruk pala la-u njauk pambak praong jang di xã Phan Hòa  piah daong ba mai kein laba glaong ka rilo baoh sang./.