Công an ban sit Thủ Dầu Một hu chap khik Lê Tấn Thành piah pasang iek

Ngan saong kadha “Jum pataom, sahneng duah, pakacah gauk dak padang saong khik caga Taneh ia, Nyaom roya Pakacah gauk anit ranam taneh ia pakat negar mbang ka 10 hu peih tabiak tuk page ini 10/12 di Hà Nội. Mai hu mbaok di Nyaom Roya, Thủ tướng Nguyễn Xuân Phúc, Akok Hội đồng Pakacah - Pok meyaom pakat negar brei thau: 5 thun tapa, bruk jak ba pakacah gauk anit ranam taneh cak rok patagok dak harei dak praong dalam; mboh hu rilo urang naih ghieh yau kareih camin di rilo gah, meng urang lin bol pan phao karaong tal bhap bini…hu hatung hatian anit ranam taneh ia dalam tuk kan kandah, jit ruak. Thủ tướng lac: dom bruk pakacah gauk hu rik daong praong pachreih ba prein khang jum pataom di abih urang Đảng, abih bhap bini saong abih bol bala. Bruk pakacah gauk, kham merat yam tagok meng rup eng nan lac halau gha prein khang di bruk cak rok patagok.

Bruk peih ngak iek lâm sàng vaccine Covid-19 angaok anek menuac mbang ka 1 rah tabiak mesup ni di Học Viện Quân y (Hà Nội). Ni lac janih vaccine Covid-19 camereip di Việt Nam, hu angan ieu lac Nanocovax, hu mintri Y tế, Mintri ilamu Khoa học song Công nghệ brei adat ngak iek angaok anek menuac. Bruk ngak iek mbang ka 1 rah tabiak meng ni tal bilan 2/2021 di mangaok 60 urang umo meng 18 tal 50 thun hu mbaok tame. Tui mintri Y tế, tukvak ka 1 lac piah tong yaom bruk siam mekre di vaccine Nanocovax angaok anek menuac

Page ini, Tòa án bhap bini TP Hà Nội ba bruk “Ngak suan gah đấu thầu ba tal khat lahik trak” rah tabiak di Pasak pasang iek jit ruak Hà Nội ( DCD) tabiak langyah sơ thẩm ngan saong 10 bị cáo, dalam nan hu ong Nguyễn Nhật Cảm, Yam ndoc Pasak pasang iek jit ruak Hà Nội. Hu thau, meng akok thun 2020, DCD Hà Nội blei jamraih Realtime PCR tự động piah dut iek darah pacang caga jit ruak Covid-19. Jabat pasang iek mboh lac, jamraih nan tuk blei mai Viet Nam yaom labaih 2 tỷ đồng, min CDC Hà Nội blei haong yaom labaih 7 tỷ đồng, glaong jang klau mbang yaom blei tame.

Akaok UBND tỉnh Bình Dương hu tacei pato dom jabat chức năng pasang iek langyah catang bruk tong paoh anek saih kumei umo 15 thun hadei di tuk rah tabiak bruk radaih paoh gauk angaok jalan di ban sit Thủ Dầu Một harei 7/12. Công an ban sit Thủ Dầu Một hu chap khik urang likei angan Lê Tấn Thành (umo 29 thun daok di Bình Dương) piah pasang iek, duah thau. Hu thau, ja Thành dahlau daih njauk Tòa án bhap bini ban sit Thủ Dầu Một kaoh 8 thun guk ka duas “taong paoh urang karei”. 

Page ini 10/12, Công an huyện Đồng Phú, tỉnh Bình Phước brei thau, daok duah iek veik dalam camera an ninh, duah kapol urang peih radaih ô tô loa tame sang urang, labik pablei pandapửa hàng…piah co blah drap ar. Tui nan, page harei 9/12, sa sruh radaih ô tô Inova 4 baoh padeih anak pabah mbang sang urang di palei 3, xã Tân Lập, huyện Đồng Phú. Dua urang dalam radaih ngui cuh ao me-om sir kaok, cuh pataik pacang mbaok , jaoh khóa pabah mbang, min tuk tame sang ye po sang mboh yau nan ye dua urang nan chiat plong tagok radaih klak nduac. Bruk njauk ndem nan lac, kapol urang nan hu tame labik pablei salih phone tangin atah sang nan labaih 200 met di page harei 3/12, mek nao rilo drap ar hu yaom.

Tong abih 50 bang song ban ine Washington hu khan ka bruk palih ruah song cử tri đoàn tui kuhria meda brei thau urang hu ngak tổng thống bahrau di Mỹ di akaok adit tal. Tổng thống đắc cử Joe Biden tui kuhria mboh lac mek hu 306 phiếu đại cử tri song ong Donald Trump tui kuhria mboh hu 232 phiếu đại cử tri. Bruk brei thau ka pilih ruah hu ngak salah bloh tuk ong Trump gam gam hu panuac lac hu bleik saleik dalam mbang palih ruah thun ni, min oh batabiak hu hagait brei mboh ka bruk bleik salik. Gah Tổng thống Trumph hu ngak yaok yaok pluh harak pathau piah salih karei bruk pilih ruah, min rilo bang song liên bang tah klaak harak pathau nan.

Thủ tướng Ixraen Benjamin Netanyahu brei thau ong meda klauk jru vaccin pacang caga Covid-19 akaok meti, tuk taneh ia ini peih bruk klauk jru ka bhap bini di harei 27/12 anak. Ixraen hu taduan vaccin pacang Covid-19 saong tui kuhria, taneh ia ini hu ginup vaccin ka labaih ¼ menuac sia di puac thun ini. Phai-dơ saong gah pambuak bruk lac BioNTech bilan dahlau njauk gauk brei pabak ka Ixraen 8 triệu mbang vắc-xin. Ixraen jeng hu harak pambuak bruk blei vắc-xin di Tập đoàn jru tavao Moderna saong AstraZeneca.

Rajaei Ấn Độ samar brei urang ilamu tal ban sit Eluru (bang Andhra Pradesh) piah duah thau ka sa janih ruak oh ka bhian mboh tamuh tabiak mbang camereip di harei 5/12, tal urak ni hu sa urang metai song 550 urang tame sang iek ruak, mboh handok rup, sre ia pabah di cambuai, taglaoh taaok, pandih rup pabhap… Yaom lac oh hu sang mac hóa chất prong halei pak di ban sit hu labaih 200.000 menuac ni, min hu rilo dut iek brei mboh lac hu chì song nickel glong dalam drah di dom urang ruak./.

Urang lang: Hani Pha – Ái Nghiêm – 10/12 17:08:18