Di angaok jalan menyek samu tapak rah tui bon Bu Jarah, xã Nghĩa Thắng, huyện Đắc R’lâp, tỉnh Đắc Nông, rilo boh sang glaong rilo tal pablak tame dom boh sang atah meng kan. Gah likuk lac dom bein cà phê, am riak kalu, cao su hajao mekre meta.

Dalam boh sang 2 tal bahrau padang, muk  Thị Khươi, umo 70 thun lac : “ dahlau deih kan kandah lo, tuk oh ka giải phóng, nao lei jeng gaok bom mìn, nao blei sara, blei brah jeng biak kan kandah, huac gaok cap mek. Tuk nan, kol khamang nyu tame palei chap kubao, limo , pabui di mik va piah mbang. Sang hulin hu 5 sào taneh, pala bei, pala padai piah pabak ka CM. rai duik urak ni ginup jang ye, hu khan aow ngui chuh, hu sang dok siam mekre, hu lisei huak”.

Saai  Anh Điểu Srong,  akaok bon Bu Jarah, brei thau, dahlau deih karja dong yaok boh sang pala 2 ha cao su tiểu điền. Njauk tame tuk vak katak cao su hu yaom, nan ye jien mek tame di mik va biak glong. Boh sang saai blei hu 4 ha cao su tra. Jiak di ni, tuk cao su laik yaom, saai salih tapa pala pablak cà phê, paaok blait, amriak kalu, duah hu jien tani tanat yaok thun labaih 300 triệu đồng. Saai Điểu Srong lac “ boh sang hulin pala cao su, bo dahlau di nan cao su hu yaom, sa harei hulin kuah katak hu labaih 1 triệu đồng. Meng thun 2010, mik va di labik ni hu salih biak rilo meng jalan sahaneng, jalan ngak”.

Bon Bu Jarah hu 130 boh sang, labaih 500 urang, tong abih lac urang bangsa M'nông. Bon urak ni hu labaih 400 ha pala cao su, cà phê, paaok blait song am riak kalu. Tui kuhria yaok boh sang hu 3 ha phun công nghiệp. Thun bloh, tui kuhria jien mek tame di dom urang hu 36 triệu đồng glong jang tanut trng bình di tỉnh Đắc Nông.  Tui taha palei Điểu Khế, bruk salih bharau khang di puk palei  meng hu bruk buh jien tame padang ngak danak dak krong ribong, ba urang jakar pachreih nong trun tacei pato bruk ngak mbang.

Meng sa bhum kan kandah, bak bom mìn hadei di tuk mesruh metak, , bon Bu Jarah dak harei dak patagok. Nan lac bruk ngak hu meng palak tangi, meng akaok sahaneng di urang anh dũng, kiên trung dalam saman mesruh metak ; tari tareing ngak bruk dalam saman sron mbon, salamat./.

                                                                    Nam Trang/VOV-Tây Nguyên