Bui sambai bilan eik Ramadan di mikva Cam Meraong

*****

         Harei ini, harei 7/7, labaih 24 ribau urang Cam gah Meraong tamat bilan eik Ramadan dalam siam mekre, haniem phuan. Ini lac sa dalam dom harei roya praong di urang Cam Islam. Dalam dom thun jaik ini, hu bruk sangka di Đảng saong Karja nan ye raidiuk di mikva Cam hu siam jang, meng nan mikva Cam dak harei dak sahneng mboh saong ngak siam tui dom sarak di Đảng, Karja, tuk halei jeng anit ranam gauk, jum pataom gauk, diukrai siam ka dunya, mekre ka agama. Hanipha urang vak di rayo sap ndom VN daok di ban raya HCM brei thau ka bruk ini, daa mikva saong grauk yut tui pang :

Phường 13, quận 3, ban raya Hồ Chí Minh hu labaih 30 sang urang Cam. Nao rah tapa dom sang Cam, kol dahlak mboh sang halei jeng daok rami ramik haci hacih sang danaok piah raok uan harei roya – tamat siam mekre bilan eik Ramadan. Mai ravang sang saai Sa li Mah njauk tuk dom urang dalam sang daok caga dom pandap ye : khan ao barau, sheok meom akaok, ngak dom janih ahan mengkan ye har sakaya, har kling, har nam ken…abih di nyu nan lac cà ri limo oh kurang hu …, saai Sa Li Mah bui sambai brei thau : ini jeng lac tuk piah ka dom urang dalam sang pataom mbaok, neh rabha dom kan kandah dalam bruk ngak mbang, ba gauk mbang dom janih pandap mbang mengkan di bangsa, hadei di nan nao ravang gauk gar, mikva puk paga, tadhau yuh gauk dom panuac siam mekre.

Phường 1, quận 8, ban raya Hồ Chí Minh hu labaih 300 sang Cam, lac labik hu rilo urang Cam di abih dalam ban raya Hồ Chí Minh. Dalam dom thun tapa, hu bruk sangka di karja palei, nan ye raidiuk di mikva Cam dak harei dak hadah hadai saong salih bahrau rilo jang duk saong dahlau thiah. Thun ini, labik ini hu rilo urang ngak pahla lac menuac taneh ia langiu mai ngak pahla. Ini lac dom bruk ngak biak siam biak hu yaom glaong dalam bilan eik . Ông Tuan Haji Mu Sa, Na-ib  sang megik Anwar, phường 1, quận 8 brei thau : oh lac hu mikva Cam daok di quận 8 mai talaih eik, bo daok hu rilo tuai di labik atah karei mai talaih eik. Thun halei jeng yau nan, Ủy ban Mặt trận negar ban raya, mBan bangsa ban raya saong karja pak ini sangka daong ka mikva mbang eik.

Bruk bui sambai uan raok harei Roya Idil Fitry daok hu mboh di grauk dom palei Cam. Mikva Cam ban raya oh var hu bruk daong ba di Đảng saong Karja, jak gauk diukrai siam ka dunya, mekre ka agama./.