Thun halei jeng yau nan, tuk bingu Ta-gi-lau nerak sraoh angaok dom mbuan ceik bimon Cam, jeng lac tuk dom palei Cam chreih chai caga raok Ka-tê meng kan di urang Cam. Bruk chreih chrai uan raok Ka-tê oh njauk lac di dom palei Cam saoh bo daok hu mboh dalam dom baoh sang urang Cam daok atah palei. Salam uan Ka-tê thun 2017, khaol drei ba gauk mai rivang sang sa-ai Nguyễn Văn Luận saong sa-ai Đạo Thị Bích Lan daok di bal Phan Thiết, tỉnh Bình Thuận piah duah thau ka bruk chreih chai bui sambai di mikva urang Cam daok atah palei tapa kadha vak hadei ini di Jasi – Urang vak di Rayo sap ndom Việt Nam daok pak bal raya Hồ Chí Minh.

Dom harei ini, dalam baoh sang labik 6A-7A, Nguyễn Thị Định, phường Phú Tài, bal Phan Thiết, tỉnh Bình Thuận tuk halei jeng yava sap Saranai njoh njac saong Pa-ra-nưng tuk sit tuk khang gam haong dom kadha daoh bhap bani Cam. Sa-ai Nguyễn Văn Luận khan lac, thun halei jeng yau nan, tal harei Ka-tê ye sa-ai haong dom urang dalam sang di drei gam saong ayut sahabat bhian tagok rivang sirah bimon Po Sah Inư pak phường Phú Hài, bal Phan Thiết, tỉnh Bình Thuận. Lingiu di bruk tagok bimon pok kakuh dom pô yang, likau ka manuac urang dalam sang drei hu ralo pren yava, khang tangin kajap takai, ini daok lac tuk piah ka dom ayut sahabat mai pataom mbaok, pahadar  veik dom ilamo meng kan di urang Cam. Kayua YAU nan ye bo harei ini, sang sa-ai haong dom ayut sahabat urang Cam daok di phường Phú Tài ini, pataom gauk pak ini piah pasram pah veik ginang saong yuk veik Saranai.

Yaom lac daok dalam bal náo nhiệt, glaih glar haong bruk ngak mbang, duah jien, yaom lac jar var ralo bruk, min dua hadiuk pasang ranaih umo urang Cam atah palei ini jeng caik tukvak piah khik ramik dom ilamo di bangsa drei. Lingiu di bruk thau pah Pa-ra-nưng, yuk Sa-ra-nai… , sa-ai Luận daok roh duah, duah thau ilamu nghệ thuật điêu khắc, kiến trúc di urang Cam piah ba tame pandar dalam bruk ngak di drei. Dalam duk  raok tuai, sa-ai parang caik biak mekre meta dom alat ragam meng kan di urang Cam. Sa-ai Huỳnh Đình Phú – sa urang daok jaik sang sa-ai Luận brei thau: Kayua po sang lac kiến trúc sư nan ye sang gheih mekre lac bruk bình thường. Tame dalam sang meng mboh hu phong cách di po sang. Meda ndom lac oh ta-eng dahlak bo thei tame ini jeng mboh yau nan. Duk raok tuai ye sa-ai ramik ngak biak gheih, mekre, dom janih alat ragam, dom hagait pambuak pagam tal ialmo di urang Cam ye sa-ai jeng daok khik hu, ma-in hu siam dom janih alat ragam nan, dahlak mboh bruk nan biak siam. Khik hu ilamo di urang Cam yaom lac sa-ai daok di pasak bal Phan Thiết.

Hatai takre ilamo Cam di urang kiến trúc sư naih gheih ini oh lac tok brei mboh gah langiu meng dom bruk ngak hu mboh di anak meta bo nyu daok hu dalam hatai saneng di sa-ai. Jeng mai meng hatai takre ini bo angan anek likei di sa-ai  jeng mboh biak ấn tượng nan lac “Nguyễn Chế Sa Pa”. Sa-ai Nguyễn Văn Luận lang yah, “Sa” nan lac akhar vak katut di Sa-ra-nai, daok “Pa” lac akhar vak katut di Pa-ra-nưng – dua janih alat ragam meng kan di urang Cam. Jeng pambak meng hatai takre di ame drei, tal urak ini, adei anek saih tal 7 ini jeng thau taong ginang, pah Paraneng, thau yuk Saranai.

Saong dalam dom harei Ka-tê ini, ame anek sa-ai Nguyễn Văn Luận  hu tuk gam haong ayut sahabat di drei yuk Sa-ra-nai, pah Pa-ra-nưng, chreih chrai, bui sambai di angaok bimon Pô Sah Inư./.