Ca Mau: kanyak jhak taong cap tapeng an tasik bilan hajan ribuk

Urak ini daok dalam tabung glaong bilan hajan ribuk, lingik tuk siam tuk jhak nan ye bruk taong cap tapeng ar daok mbuan gaok kanjah jhak. Di Cà Mau hu yaok pluh kapal gilai taong cap ikan gaok karam, rilo urang metai kuhria meng akaok thun tal ini. Min, kayua ngak mbang duah jien, bhapnini jeng daok ba drei tabiak anak angin ribuk muan metai lihik. Gah chức năng puk palei daok ngak catang jang bruk khik ramik saong kakei mikva njauk paglaong hatai sangka piah khik caga rup, khik caga drap ar. Trần Hiếu – urang vak di rayo sap ndom Viet Nam daok di bhum taneran kraong Cuu Long hu kadha vak brei thau ka bruk ini:

Saai Nguyễn Thị Xa (daok di xã Khánh Hải, huyện Trần Văn Thời) brei thau: dahlau diah bruk ngak mbang duah jien di sang lac meng raong hadang ala halui kayau glai. Min, kayua  glut jaleih taneh, vuông hadang di sang gaok riyak tasik ba theik nao. Jaik 5 thun ini mai, pasang saai saong rilo bhapnini dalam palei njauk mek baoh vỏ lãi (pandap nao mai jalan kraong) nao caik halăm njul tapen tasik piah duah mbang.

Tui saai Xa, taong cap bilan ini meda mek hu rilo hadang ikan jang. Min kayua vỏ lãi sit saong lingik oh siam yau nan ye mbuan gaok bala. Pasang saai hu rilo mbang dang anak bruk metai lihik, min kayua dua anek daok mbang bac, kayua raiduak jeng daok pambak tame tasik. Oh patoah daok ngak ye hu ngin ribuk, taong tame dalam, tuk nan hu  riyak praong ye nyu dui pasang tabiak tasik. Baoh ghe kram, pasang mblo akaok  tagok, dom urang daih maong mboh nduac nao srong tagok. Bloh blei veik, bilan hadei adei pasang brei nyim jien saai blei veik. Kayua meyah lihik bo oh blei veik ye hu bruk hagait piah ngak, diuk meng bruk nan min.

Dalam tỉnh Cà Mau hu labaih 4.500 kapal gilai tut angan taong cap kaya ikan dalam ia. Dalam nan, dom ghe gilai gap saong sit meblah labaih metah. Urak ini daok dalam tabung glaong di angin Tây Nam, lingik biak kan si thau caga, min di dom pabak tasik Đá Bạc, Kênh Mới, Cái Đôi Vàm,... libik hu rilo ghe gilai taong cap gap saong sit mikva jeng daok tabiak tasik. Hu tuk, hu dom urang ngak ikan hu mboh di anak meta dom bala biak pandik harao, min kayua raidiuk, kayua khik ka bruk nao tasik hu laba , dom urang nan njauk dang anak bruk mbuan metai lihik. Saai Lê Văn Nghĩa, urang ngak bruk mek baoh bao di pabah tasik Đá Bạc (xã Khánh Bình Tây, huyện Trần Văn Thời) khan lac: Barau dom bilan dahlau cakla taong metai tài công ghe. Thun halei jeng hu cakla taong metai tài công. Meyah gaok kan kandah sit ye oh tame. Mbuan hagait tame, nao ngak duah jien mbuan hagait tame.

Tui kuhria mboh oh ka ginup abih di mban Chỉ huy pacang caga bala saong duah daong urang njauk bala tỉnh Cà Mau: meng akaok thun tal ini, lingik jhak ngak ka 25 ghe gilai taong cap gaok kram, 16 urang metai, 14 urang lihik.

Ông Nguyễn Long Hoai, Chánh Văn phòng mBan Chỉ huy pacang caga bala saong duah daong urang njauk bala Cà Mau ndom lac: dak jaik tal puac thun, angin Tay Nam dak khang saong hu jalan nduac mai gah meraong yau nan ye tukvak tal bhum tasik Tây di tỉnh daok hu lingik jhak. Piah khik caga siam drap ar, tinh mang ka urang ngak ikan, tui ông Hoai, Cà Mau hu tacei pato dom libik trực thuộc paglaong pasang iek saong tacei pato bhapnini jalan caga plaih.

Lingik jhak tukvak tapa  taong kram rilo ghe gilai, hu tuk ngak ka rilo urang ngak ikan metai. Abih di nyu nan lac dom ghe gilai gap saong sit biak mbuan gaok khat lihik. Piah ngak mbang duah jien, mikva tabiak tasik lac bruk njauk ngak. Min, bhapnini njauk paglaong hatai sangka, caga plaih, ngak catang dom bruk khik caga an toan hu gah chức năng tacei pato piah khik caga tính mạng, drap ar ka drei saong ka urang karei./.