Pathau mikva saong taong abih gauk! Di bhum taneh biên cương Chiềng On,  huyện Yên Châu, tỉnh Sơn La, bhap bini atah jaik mboh hadah mbaok meta  tuk ndom tal ong Vì Văn Ỏm, kayua ong lac sa urang anek bangsa Xinh Mun hu Đảng saong karja pok brei angan Anh hùng Lao động tukvak salih barau thun 2005. Lac Bí thư Đảng ủy, akaok UB bhap bini xã DAHLAU DAIH, ong ngak hu biak siam bruk padang talei jum pataom dom bangsa, nao dahlau dalam bruk patruh eik patrun kathaot , rik daong ba mai rai diuk trei sil, hanem phon ka mikva bhum glaong ini. Tòng Đức Anh, urang vak di rayo sap ndom VN daok di Tây Bắc hu kadha vak ndom ka ông:

Mboh bruk salih barau di palei pala barau labik bhum glaong taphia negar ini, abih di nyu nan lac jalan mbak hu tuh katak dom pluh cây số lagaih ka bhap bini nao mai meng pasak huyện tal Trạm biên phòng Nà Cài, bhap bini dom bangsa di xã Chiềng On, huyện Yên Châu, tỉnh Sơn La oh thei var hu pren yava di ong Vì Văn Ỏm, urang bangsa Xinh Mun, dahlau daih lac urang dang akaok xã Chiềng On meng dom thun 1976-2005; Anh hùng Lao động saman salih barau. Ong Sồng Lao Dia, akaok UB bhap bini xã Chiềng On lac:

 “Meng thun 2004, ong Ỏm likau hu phun jien di tỉnh Sơn La mai đầu tư ka Chiềng On ngak jalan tuh katak meng huyện Yên Châu nao tal pabah mbang negar Trạm Nà Cài xã Chiềng On. Ini lac sa jalan biak siam, piah mikva hu lagaih nao mai”

Thun 1967, ong Vì Văn Ỏm nao ngak lin di Trung đoàn 754, nao bac di sang bac Sĩ quan lục quân I Sơn Tây, tal thun 1969 ong lac lin halan hatian Việt Nam di Lào, hu mbaok tapak tame bruk mesruh metak pacang Mỹ. Tal thun 1972, phục viên mai veik palei, ong Ỏm ngak Trung đội trưởng cơ động Dân quân du kích xã Chiềng On. Tuk nan, kinh tế di xã biak kan kandah, jalan mbak oh ka hu, bhap bini oh ka ralo, oh thau pandar ilamu kỹ thuật tame bruk ngak mbang, padai brah mikva ngak tabiak tok ginup mbang dalam jaik 3 bilan sa thun, daok veik ralo meng lac tame glai duah bei, mar pateok, jah gali kaoh kayau ba nao pablei duah jien mbang yaok harei… abih di nyu nan lac bruk oh jum pataom bangsa rah tabiak gam gam. Tuk nan, lac phaok akaok UB bhap bini xã, ong Ỏm pataom tame langyah bruk oh jum pataom bangsa, di cư tự do; merak gauk taneh riya. Meng dom ilamu bac hu di bol bala, saong ndom hu dom sap bangsa Thái, Mông, Lào, Xinh Mun, gaok tuk ong langyah hu tal 180 mbang bruk srau kadau di puk palei.

Hadei di tuk langyah hu siam bruk neh rabha bangsa, ong duah jalan patagok kinh tế, daong bhap bini patruh eik patrun kan kathaot. Thun 1986, ong nao Hà Nội công tác, hu thau pajaih tangei lai barau di Đan Phượng (Hà Nội harei ini), mbuan pala, năng suất glaong. Ong ba mai ka sang, ka urang jakar xã, adei saai gauk gar pala iek dahlau, mboh hu kein laba jang duk saong pajaih tangei puk palei, bình quân 10 kg pajaih mek hu 30 tấn tangei ndo. Ong meng dang tabiak tacei jalan pala tangei ka yaok baoh sang bhap bini, jak ba salih barau labaih 700 ha padai puh tapa pala tangei lai saong quy hoạch veik bein tea. Ndom ka bruk raong athur, menuk ada, ong tacei mikva patagok tapon kabau, limo, pabe, pabui, menuk ada… khoán ka yaok baoh sang kham merat hu takik abih 2 drei kabau, 2 drei limo, 10 drei pabui, 10 drei menuk ada. Anek pajaih ye jak ba mikva daong gauk, oh pablei salih. Tukvak salih barau, ong jak ba bhap bini klak padai puh, pataom tame peih praong taneh  padai ia. Ong nao tal Bắc Hà, tỉnh Lào Cai piah blei mai 500 phun mận hậu mai pala di taneh Chiềng On, bloh pala pabak dom janih phun mbang baoh yau durang ghép, hồng, kruoc bung, cam… Mboh ong ngak, ralo sang jeng ngak tui, urak ini xã hu jaik 20 ha mận hậu, rai diuk di mikva dak harei dak salih barau, patruh eik patrun kathaot. Tui ong Vì Văn Ỏm: urang jakar brei hu hatai anit ka bhap bini, thau daong ka bhap bini:

“Pataom tame langyah bruk ngak mbang ngak huak dahlau, tuk lagaih ye patagok bruk karei. Meng nan rai diuk di bhap bini dak harei dak patagok, taong abih dom bruk kinh tế, ilamu, XH, an ninh quốc phòng hu ngak biak siam, abih di nyu nan lac bruk đường biên, mốc giới, pambuak saong bộ đội biên phòng ngak catang bruk vượt biên sung hukum, pablei salih dom janih ma túy tapa negar”.

Ong Ỏm padeih hưu tui chế độ thun 2005. Yaom lac umo taha, praong thun, pren yava oh daok khang kadang, min ong jeng daok pachreih tui yaok bruk ngak di puk palei, gam hong cơ sở dak padang chi bộ, kapul urang dahlau daih ngak bol lin; cố vấn ka karja duah jalan salih barau phun pala athur raong. Meng angan je di drei, ong daok nao gam saong bộ đội, urang jakar xã, palei jak ba bhap bini ngak siam sarak di Đảng, hukum di karja, oh lih mek taneh, oh di cư tự do, oh tapa negar sung hukum, khik kajap quốc phòng, an ninh saong tani tanat chính trị XH di bhum taphia negar.