Urang meng bhum halei mai brei khan ka gah y tế
Dom harei tapa, dom urang dalam kapul pilih ruah di phường 8 (ban sit Cà Mau, tỉnh Cà Mau) nao tal yaok sang bhap bini kakei veik dom bruk pambuak tal pilih ruah piah ka mikva thau cambaih. Gam haong nan, bhap bini jeng hu tacei pato tuk nao pilih ruah brei ngak yau habar piah ka bruk pacang caga jit hu khik kajap. Ong Trần Phước Minh, sa rahra daok di khóm 3 khan lac:
"Nao pilih ruah dahlau di abih drei cuk pataih pacang mbaok. Tal labik pilih ruah ye rao tangin pametai anek ruak, brei ka urang dut iek pandiak di rup pabhap piah plaih jit ruak. Ngak njauk tui dom sarak di palei, blaoh tui tacei pato di tổ bầu cử. Lac rahra brei ngak njauk tui".
Tui mBan Tacei pato pacang caga jit Covid-19 phường 8, hadei di tuk tauk harak brei thau angan dom cử tri, dalam phường hu jaik 200 menuac mai meng tỉnh karei. Dalam nan rilo meng lac anek saih, SV saong dom urang ngak. Taong abih dom menuac ini jeng hu khai báo y tế, menuac mai meng bhum hu jit hu ieu kakei brei daok di sang. UB Bầu cử Phường 8 hu kuhria jalan ngak lac, hu thùng phiếu ba nao mai piah ka dom urang daok di sang jeng hu pilh ruah. Lingiu di nan, dom jalan ngak karei piah khik kajap bruk pacang caga jit Covid-19 tuk bhap bini pilih ruah jeng hu peih ngak samu gauk. Ong Võ Hoàng Nam, Bí thư Đảng ủy Phường 8 brei thau:
"MBan tacei pato pacang caga jit Covid-19 di phường brei bruk ka yaok urang nao tapak tal dom tổ bầu cử piah ngak dom bruk khik kajap salamat dalam harei pilih ruah 23-5. Phường jeng hu padang jalan khik kajap salamat, pacang caga jit, yau bruk brei kapul y tế hu mbaok di yaok labik pilih ruah. Blaoh brei cử tri khai báo y tế, duk pandiak rup pabhap, pametai anek ruak dahlau di tuk tame buh phiếu".
Di huyện puac abih di taneh ia lac huyện Ngọc Hiển, dom labik pilih ruah hu caga blaoh blai dom janih piah khik ka cử tri hu khai báo y tế, pametai anek ruak, daok atah di gauk. Taphia nan, karja palei jeng hu caga pataih pacang mbaok piah brei ka urang tuk nao pilih ruah. Ong Trần Hoàng Lạc, Chủ tịch UBND huyện Ngọc Hiển brei thau, bruk njauk caik hatai sangka di abih jeng lac dom menuac di labik karei mai veik palei piah pilih ruah:
"UB Bầu cử huyện hu tacei pato dom gah, abih di nyu lac dom xã hu dom jalan ngak piah ka yaok rahra hu ngak quyền di drei. Oh ta-eng hagait bruk pilih ruah, bo bruk pacang jit, kol dahlak hu tacei pato yaok labik, yaok jabat, baoh sang saong yaok menuac urang. Harei pilih ruah, kol dahlak brei pasang iek catang dom menuac meng laingiu tỉnh mai, blaoh tal dom menuac hu gauk gar ngak di negar lingiu, abih di nyu lac dom menuac mai meng dom taneh ia jaik taphia".
Gam haong bruk kuhria caga piah ka rahra dalam tỉnh hu ngak quyền pilih ruah urang ka QH mbang XV saong urang ka HĐ bhap bini dom pakat vaktu 2021-2026, dom pakat, dom gah chức năng di tỉnh Cà Mau jeng hu peih ngak samu gauk dom jalan pacang caga jit Covid-19 piah ka bruk pilih ruah hu peih tabiak dalam siam mekre, salamat./.
Urang lang: Mousaphuong -22/5
Viết bình luận