Taneh glai U Minh, tỉnh Cà Mau hu bruk đa dạng thảm thực vật. Dahlau daih, rilo janih phun kayau glai tamuh eng yau ye: phun giác, phun sậy, phun nhàu,... oh hu yaom  kinh tế nan ye nenuac urang oh caik hatai tal. Min dom thun jaik ini, dom janih phun tamuh eng ini hu jeng janih pandap daong ka rilo sang kan kandah tani tanat raidiuk, tabiak truh kan kathaot. Kadha vak di Trần Hiếu, urang vak di rayo sap ndom VN daok di bhum taneran kraong CL:

Meng bilan 7 saka ia bulan tal puac thun, rilo menuac di taneh glai U Minh Hạ yam tame bilan paik baoh giác. Sang ong Nguyễn Văn Ngoán (daok di xã Khánh Lâm) lac sang kan kandah dalam palei. Diuk pasang ong ngak mbang pah. Bilan ini, lac tuk diuk pasang umo labaih 50 thun ba gauk tame glai paik baoh giác piah duah hu jien rilo jang.

Ong Ngoán brei thau, dahlau daih , menuac dalam palei tok pandar baoh giác ka bruk tahanek huak nan ye oh hu yaom kinh tế. Min dom thun jaik ini, dalam palei hu cơ sở blei baoh giác piah ngak alak, ngak kẹo, ngak mứt,... nan ye yaom baoh giác dak harei dak glaong. Meng paik baoh giác pablei bo raidiuk sang ong hu siam jang. Dom janih pandap dalam sang yau ye tivi, tủ lạnh jeng hu blei meng jien paik baoh giác.

Ong Nguyễn Văn Ngoán chreih chrai brei thau:

- Yaok harei hu 50 ký. Jeng hu harei hu 80 – 100 ký. Baoh  giác 8 ribau sa ký, 100 ký ye hu 800 ribau. Urang lac harei ngak bilan mbang, drei ngak sa harei, hu ginup brah ka sang drei mbang 1 bilan. Raidiuk takik kan kandah.

Lingiu baoh giác, urak ini rilo sang bhap bini dalam huyện U Minh daok duah hu jien meng phun nhàu. Tui panuac khan di urang dalam palei, jaik di ini baoh nhàu hu dom cơ sở dalam palei blei yaom glaong piah pabak ka dom Công ty ngak jru. Urak ini, baoh nhàu daok hu pablei tabiak negar lingiu nan ye meng janih phun glai tamuh eng hu jeng janih pandap hu yaom di bhap bini daok dalam taneh glai.

Sang amuk Nguyễn Thị Bé lac sa dalam dom sang kan kathaot di ấp 4, xã Khánh Thuận. Dahlau daih, 2 diuk pasang njauk nao ngak mbang pah duah jien raong 4 urang anek nao mbang bac. Meng tuk tal bilan paik baoh giác, baoh nhàu, raidiuk sang amuk hu siam jang. Abih di nyu nan lac, mboh phun nhàu dak harei dak hu yaom nan ye tuk tame glai paik baoh, amuk Bé hu mek phun anek mai pala iek. Urak ini sang amuk Bé hu labaih 300 phun nhàu. Yaok bilan paik hu 300 – 400 kg nhàu that. Yaom nhàu glaong daong ka sang amuk tabiak truh kan kathaot.

Amuk Nguyễn Thị Bé brei thau:

Dahlak nao paik baoh nhàu, mboh phun anek dahlak ba mai pala. Tuk camereip pala 100 phun. Mboh nyu hu mboh takre lô nan ye ba mai pala rilo jang, hu dom rituh phun. Bahrai paik mbang camereip, bilan hajan ini urang blei yaom 8 ribau. Tuk pandiak pablei hu 14 ribau sa ký.

Oh lac ta-eng sang amuk Bé bo urak ini dalam ấp 4, xã Khánh Thuận hu labaih 10 sang pala nhàu angaok ar pacang danao raong hadang. Ini lac bruk daok tagok hu kein laba, daong ka mikva labik ini duah hu jien kuhria ka raidiuk. Meng tari taring, kham merat nao duah dom janih pandap hu dalam glai, rilo bhap bini pak ini hu jien mek tame daong ka kinh tế sang drei. Dom sang kan kathaot dalam palei yaok thun trun mboh di anak meta..

Ong Trần Văn Triều, Trưởng ấp 4, xã Khánh Thuận, huyện U Minh brei thau:

- Tukvak tapa, mikva pak ini hu jien mek tame rilo meng baoh giác. Dalam thun 2017, palei patruh eik patrun kathaot hu 19 sang, Dalam thun 2018, patruh eik hu 15 sang tra. Daok patagok jang jien mek tame meng baoh nhàu, ba mai siam mekre rilo.

Lingiu dom janih baoh nan, yaok thun, tal bilan bông sậy, mikva labik ini jeng duah hu jien meng 7 – 10 triệu đồng sa baoh sang. Meng hu lingik tasik alin brei, gam saong tari taring, oh huac glaih glar, raidiuk bhap bini taneh glai U Minh daok hu siam jang. Min dom kaya pandap meng lingik tasik livik livik harei jeng takik nao, urak ini hu dom mikva daok patagok bruk pala phun nhàu piah hu jien mek tame tani tanat. Karja palei njauk hu bruk daong tacei pato piah bruk cakrok patagok hu siam lagaih, khang kajap./.