Dom kapan gaiy duah labik halei siam mekre piah pataok 

Caga ribuk ka 14, bo đoi biên phòng dom tỉnh, ban tapen tasik meng Quảng Ngãi tal Kiên Giang hu pambuak bruk saong karja palei, sang po gilai pathau thau saong tacei pato ka 57.515 gaiy gilac  plaik njiak atau tabiak truh labik mbuan gaok bala kayua ribuk. Hu thau, gilai taong chap ikan di labik kaoh pulao Trường Sa hu 184 sruh;   di labik tasik karei hu 19.850 gilai saong pataok di dom tapen tasik 37.481 gilai.

Urang tame negar drei suan hukum tapa dom jalan sit jalan prong, urang nao mai rilo tuk puac thun song Tết meng kan lac cuang kandah ka gah  Công an song dom gah karei  dalam bruk pacang caga jit  Covid-19. Công an dom tỉnh ban “nao tal dom jalan sit, gaoh dom boh sang, pasang iek dom menuac urang” piah duah urang angaok dom mbang par hu menuac njom Covid-19, dom urang lac  F1, F2…samar brei dok karei, pacang cag jit ruak. Tapa pasang iek dom labik dok, hu mboh, taong phạt jien labaih  5.600 urang negar langui  song 7 công ty,doanh nghiệp ngak suan hukum ka bruk brei dok, tame tabiak suan hukum. Gam haong nan, gah công an jeng hu ieu, kakei jaik 1.500 uang pandar mạng xã hội brei thau suan ka bruk pacang caga jit ruak, ba tabiak kaoh tui hukum 17 urang, mesruh pacang 21 kapul nyaom  pagam pambak tame jit ruak ndom puac oh njauk ka  Đảng, karja. Ni lac dom asar kadha hu ndom tal di Nyaom biai pataom iek veik bruk pacang caga jit  Covid-19 dalam gah Công an bhap bini kayua mintri Công an peih tabiak di ban Đà Nẵng mesup ni (21/12).

Bruk ramik caga pandap panda pablei khik yaom dahlau, dalam saong hadei di Tết Nguyên đán anek sak Kubao 2021 birau hu UB bhap bini tỉnh Bình Thuận ba tabiak saong peih ngak dalam 4 bilan, meng bilan 12 thun 2020 mbiah tal  bilan 3 thun 2021. Tui bruk ba tabiak, abih tih jien blei pandap pandar piah pandar yaok harei pablei khik yaom thun ini di dom gah lac labaih 113,4 tỷ đồng, dalam nan Siêu thị Co.opMart ngak bruk di tỉnh Bình Thuận caga pandap rilo abih lac jaik 79 tỷ đồng. Dom janih pandap pablei khik yaom  ralo lac: brah, mì, saradang dom janih, ia tasau, menyek mbang, ia mesin, ahar mứt, kaya ngak blaoh, dom janih ralow, njam patam, baoh karaoh…

Bhum taneran krong CL dok yam tame bilan tabau bik, tuk yaom tabau di urang nong pablei tabiak samu song yaom pala. Hadei di labaih 8 bilan iek glang, urang nong  yau ngak saoh angaok mblang taneh di drei. Yaom saradang pablei angaok drak pasa hu tagok hasit song dok cang bruk ngak patui di nan, ttuk mintri Công thương peih bruk duah thau, ba tabiak jalan pacang pablei khut yaom  song pacang bruk dong brei ngan song dom janih pandap  saradang tabau, hu ngak meng Thái Lan. Dom sang mac saradang cong lac yaom saradang meda tagok, song bhum pala tabau di gah pai kan si khik veik hu piah pabak ka dom sang mac, tuk urang nong klaak tabau biak rilo. 

Bhap bini bangsa takik tỉnh Bạc Liêu ralo meng lac urang Khmer ngan saong 15.980 baoh sang,  69.606 urang. Dalam nan, baoh sang kathaot daokhu ralo ngan saong labaih 17, 7% dut saong abih tih baoh sang kathaot dalam tỉnh. Piah peih ngak hu siam bruk patrun kathaot di bhap bini Khmer, meng akaok thun 2020, dom palei dalam tỉnh kham merat peih ngak rilo bruk daong baoh sang kathaot, baoh sang jaik kathaot, tapa nan rik tame ngak brei salih birau mbaok meta bhum pasai saong salih birau raidiuk bhap bini.

Kuhria tal mon  9 harei 21-12 (tui mon Việt Nam), dunya hu labaih  77 triệu urang njom  virus SARS-CoV-2 ba tal ruak  viêm jalan suah yava cấp Covid-19, dalam nan hu jiak 1,7 triệu urang metai  Dalam sa harei tapa dunya hu jiak  547 ribau urang njom bahrau song  7.941 urang metai.Mỹ jeng lac negar gaok kan kandah trak abih  di jit ruak ngan song labaih 18 triệu urang njom,dalam nan hu jiak  325 ribau urang metai.Patui di nan lac  Ấn Độ hu  labaih 10 triệu urang njom, jiak 146 ribau urang metai.Dang ka klau lac Brazil hu jiak 7,24 triệu urang njom song jiak 187 ribau urang metai.

Sa harei hadei di tuk hu urang ruak Covid-19 bahrau tagok tal labaih 500 urang lac tanut glaong abih kuhria meng tuk jit ruak tamuh tabiak, urang ngak praong di Thái Lan brei thau taneh ia ini meda peih bruk dut iek ngan saong labaih 10.000 urang. Urang jakar kham merat tal harei 23/12 meda dut iek hu 10.300 urang di tỉnh Samut Sakhon lac labik sruh jit ruak birau tamuh, jeng yau dom tỉnh jaik taphia, dalam nan hu Samut Songkhram saong Nakhon Pathom.

Urang ngak praong di Bình Nhưỡng dok kham merat abih drei piah pacang cakak jit  Covid-19 tamuh tabiak piah caga ka nyaom roya đảng pakat negar di bilan anak tal.Tui nan, dom jalan pathau khan karja pasang iek dom harei tapa  jeng hu khan ka bruk pacang caga ruak Covid-19,anak bruk chính trị hu makna prong ka taneh ia. Nyaom roya mbang ka 8 di  Đảng Lao động Triều Tiên tui kuhria hu rah tabiak dalam bilan sa thun 2021 song tui kuhria karja di ong Kim Jong-un meda brei thau dom sarak prong di drei.Min tal urak ni jeng oh ka thau cambaih tuk vak peih mbaok nyom roya nan./.

Urang lang: Hanipha- Bhumi -21/12 - 19:00