Pathau mikva saong taong abih gauk!

Urak ini ralo urang pala bein di xã Phương Phú, huyện Phụng Hiệp, tỉnh Hậu Giang daok ngak mbang hu meng bruk pala phun cam xoàn. Jalan ba tal jak jeng di labik ini lac: taphia bruk palih ruah pajaih phun pala lagaih, urang nông daok thau pambuak gauk dalam pala drak piah oh padeih paglaong năng suất saong chất lượng baoh, meng nan padang hu labik dang khang kajap di drak pasar. Kadha vak di Tấn Phong – urang vak di rayo sap ndom VN daok di bhum taneran kraong Cửu Long:

            Di tukvak ini, dom bein cam xoàn di xã Phương Phú, huyện Phụng Hiệp daok tame bilan paik baoh. Taphia dom bein cam hijao, ralo baoh, bhian hu mbaok dom doanh nghiệp, urang blei mai duah blei. Saai Trần Văn Tời – sa urang nông pala cam xoàn akaok meti di labik ini khan lac: bhum taneh ini njom likhuan trak, dahlau daih tok pala tram, hadei di nan pala tabau, ngak padai min jien mek tame oh tani tanat. Dom thun dahlau, tuk ba tangin tame pala iek phun cam xoàn saai jeng huac oh hu kein laba. Min thei thau phun cam xoàn nyu lagaih saong bhum taneh ini saong jien mek tame oh takik

“Mboh phun cam xoàn nyu kein laba jang tabau padai jaik 10, 15 mbang. Pala 2 thun ye tabiak baoh, tal 3 thun ye paik baoh. Sa công paik hu jaik 5 tấn. Yaom urak ini lac 45 ribau ye hu laba glaong. Mikva urang nông di labik ini mboh drei pala dahlau hu kein laba nan ye hu ralo urang pala tui”.

Mboh lac ngak mbang ta-eng oh ba mai kein laba glaong  yau pambuak gauk ngak, jaik 3 thun dahlau, dom baoh sang pala caam xoàn di labik ini hu padang HTX cam xoàn Phương Phú. Ong Võ Văn Đê- Giám đốc Hợp tác xã brei thau: HTX hu 21 urang gam saong jaik 31 ha cam xoàn. Meng tuk padang tal urak ini, jien mek tame di dom xã viên oh padeih patagok kayua tui jalan pala haong gauk, hu mbaok di dom doanh nghiệp, meng bruk pabak pajaih, vật tư ngak nông tal blei baoh hadei di tuk paik. Thun bloh, HTX pablei hu labaih 400 tấn cam, ba mai jaik 12 tỷ đồng ka dom urang pala bein labik ini. Thun ini, cam xoàn Phương Phú dak hu angan saong pachreih hu ralo doanh nghiệp, urang mai duah blei kayua dom xã viên jeng ngak tui jalan VietGAP. Taphia di nan, Cục Sở hữu trí tuệ jeng hu brei harak chứng nhận bảo hộ nhãn hiệu kapul nyaom “Cam xoàn Phụng Hiệp” ka Hợp tác xã. Nhãn hiệu hu bảo hộ pandar ka nyaom baoh cam that, ia cam ép, ia baoh kayau ép saong nyaom dịch vụ lac pablei salih phun pajaih, pablei salih asar pajaih. Tui quyết định, taong abih 21 urang di HTX hu adat pandar nhãn hiệu kapul nyaom “Cam xoàn Phụng Hiệp” piah pablei salih cam xoàn. Ong Võ Văn Đê daok brei thau lac:

“Angan HTX cam xoàn hu công nhận di bilan 6 thun 2016 ini, tuk nan drei daok ngak danak dak VietGAP, danak dak VietGAP jeng barau công nhận. Urak ini meda lac di labik ini, drei ngak dalam HTX di drei ye thun halei jeng abih, urang mai tal bein blei abih”. 

Ong Châu Văn Mía - Bí thư Đảng ủy xã Phương Phú, huyện Phụng Hiệp brei thau: xã urak ini hu 150 ha caam xoàn. Meng kein laba di HTX Phương Phú, xã daok peih praong drak pasar tui jalan taom gaok dom drak pasar đầu mối, dom siêu thị piah ba baoh cam xoàn tame pablei; taphia di nan daok peih praong jaik 270 ha cam xoàn tra. 

 “Anak tal  xã ngak yau habar piah ba abih taneh tabau daok jaik  165 ha tapa pala phun cam xoàn saong jaik 100 ha phun oh kein laba tapa pala phun cam xoàn piah  ba rai diuk di mikva urang nông xã Phương Phú jeng yau HTX cam xoàn Phương Phú dak harei dak patagok”.

Tui karja palei, dom thun tapa, yaom cam xoàn jeng tani tanat meng 30.000- 40.000 đồng/kg,  hu thun tagok tal 45 ribau đồng sa kg. Ngan saong phun cam xoàn pala 4 thun ye năng suất jaik 5 tấn sa công, urang pala hu jien mek tame jaik 150 triệu đồng sa thun. Phun cam xoàn urak ini hu bhap bini xã Phương Phú jeng yau huyện Phụng Hiệp iek lac phun kinh tế. Min tui dom xã viên labik ini, taphia bruk palih ruah pajaih phun pala lagaih, ye ilamu bac hu lac urang nông brei thau pambuak  gauk dalam ngak mbang pala drak piah padang jalan ba pandap drei ngak tabiak hu labik dang khang kajap di drak pasar. Hu yau nan urang nông meng kaya meda hu./.