Ia harei tame ceik jeng lac tuk dom urang ngak nong palei Quảng Đạt, xã Đạo Nghĩa, huyện Đắc R’lấp, tỉnh Đắc Nông saong urang jakar Mban khik iek glai pacang caga Nam Cát Tiên tame khik glai. Tui tacei pato di dom urang jakar khik iek glai, dom urang taduan khik iek glai parabha gauk nao iek glai, bloh salih gauk khik di dom chot labik glai ram praong. Ong Nguyễn Văn Chuyên daok di palei Quảng Đạt, xã Đạo Nghĩa, huyện Đắc Rlấp, tỉnh Đăc Nông brei thau, bruk ini ong ngak meng 6 thun ini mai, meng tuk sang ong hu Mban khik iek glai jao brei khik iek 20 hecta glai jaik apuh:

“Lac dom urang daok jiak glai, taduan khik iek glai, urang dalam sang jeng kham merat khik iek glai. Tuk camereip oh ka bhian randap min hu Mban pato pasram gah pacang caga apui khuah, bloh hu mbaok, nao khik iek…Birau ini hu bayar jien khik iek glai, yaok thun jeng duah hu yaok pluh triệu đồng. Caong lac nao khik iek gaok kol jah tak glai nyu taong paoh ye hu karja daong jien jru ruak piah mikva sahanang hatai jang…”

         Ngan saong taneh praong labaih 14 ribau hecta, glai pacang caga Nam Cát Tiên gar katut, min atah tapa 4 xã Đạo Nghĩa, Nhân Đạo, Đắc Sin saong Hưng Bình, huyện Đắc R’lấp, pak meta atah  jaik 100km, ralo meng daok taphia apuh saong labik daok di bhap bini. Dalam tuk nan, gah khik caga glai di Mban Khik iek tok hu 30 urang, yau nan ye bruk khik caga glai gaok biak rilo kan kandah, ralo meng pagam pambak tame mikva taduan khik iek glai. Ong Đỗ Thành Tâm, Akok balai khik iek labik ka 3, Mban khik iek glai pacang caga Nam Cát Tiên lac:

 “Bruk ngak yaok harei di adei sa-ai dalam Balai khik iek ka 3 lac pasang iek, khik caga glai.  Adei sa-ai hu pambuak bruk saong dom baoh sang taduan khik glai saong gah khik glai di xa daong pacang caga, rilo meng daok veik dalam glai nan ye gaok biak rilo kan kandah, abih di nyu nan lac bilan hajan biak kan ka bruk khik iek. Min khol dahlak thau hu bruk khik iek glai tui tacei ba di gah khik iek glai saong bruk pambuak gauk di xa saong dom baoh saong taduan khik iek glai piah pacang caga cakak kol jah tal glai Nam Cát Tiên ni”

Urak ini, Mban Khik iek glai hu jao 7,8 ribau hecta glai ka 357 baoh sang khik iek, dalam nan hu 124 baoh sang urang banhgsa takik daok jiak glai. Gam saong bruk pasang iek, khik caga, khan brei thau, rik daong duah mboh, chap mek, taong phạt yaok rituh mbang jah tak glai, dom baoh sang khik iek glai daok kham merat pataom mek hala glai thu, pala glai saong pacang caga apui khuah. Meng thun 2012 mbiah tal ini,  tuk hu jien daong dịch vụ glai ka urang khik iek tal 600 ribau đồng sa hecta, dom baoh sang taduan khik iek glai hu jien piah ngak siam bruk khik iek glai. Ong Nguyen Ngoc Xuan, Giam đoc Mban khik iek glai pacang caga Nam Cát Tiên lac:

“ Bruk jao brei khik iek glai hu peih tabiak meng thun 2007 mbaih tal ini tapa dom danak dak 327, 661 gah buh jien tame cak rok glai saong urak ini pablak tame danak dak dịch vụ glai. Tapa nan mboh lac, meng tuk hu jien dich vu glai mikva khik iek glai hu jien mek tame  mekheik ng, meng nan urang abih hatai ka bruk ngak, khik iek glai, khan brei dom po glai thau sumu tuk mboh urang khin jah tak glai piahpacang cakak, patrun patakik bruk jah tak glai”

Bruk khik iek glai nan lac bruk biak kan kandah, tuk jaik abih glai di Tay Nguyen daok njauk kol co klaik tame jah taki. Bruk jao brei khik iek glai ka bhap bini di labik glai pacang caga Nam Cát Tiên, huyện Đắc R’lấp, tỉnh Đắc Nông hu ba mai kein lagaih tuk camereip. Tapa nan brei mboh lac, meyah kein laba hu parabha njauk ye glai hu khik caga siam saong cak rok patagok./.