Dom janih pandap jik pet di adei sa-ai kumei 

Thau hu hatai caong khin di adei sa-ai kamei di puk palei, tukvak tapa, kapul urang kamei quận Ninh Kiều, bal sit Cần Thơ, hu pok panuac tagok Jabat pato bruk ngak di Sở Lao động thương binh saong xã hội bal sit peih tal pato jik pet piah ka dom adei hu bruk ngak tani tanat.

Pagap yau sa-ai Phan Ngọc Ánh, daok di khu vực 6, phường Xuân Khánh, quận Ninh Kiều, bal sit Cần Thơ. Meng tuk hu mbaok tame tal bac jik pet, sa-ai hu hatai saneng peih shop pablei salih khan ao, piah laghaih haong bruk iek glang anek bhik, gam taduan mek pandap jik pet di sang. Abih di nyu nan lac, pambuak haong bruk pablei khan ao, tuk bac tapa tal jik pet sa-ai mboh lac njauk ngak tabiak kiểu bahrau tui hatai takre di urang blei, gam hu bruk ngak tani tanat gam hu jien mek tame. Sa-ai Ánh bui sambai khan brei thau: “Mboh jik jeng gheih, bo drei jeng sahneng mboh, ngak hu mẫu ini, mẫu diah. Meyah bhian jik pet ye drei meda ngak hu kiểu bahrau. Daok dalam sa kapul yau nan, drei ngak bruk tui nyaom yau nan drei ba tabiak rilo hatai sahneng bahrau jang.

Sa-ai Nguyễn Thiên Nga – Akaok kapul urang kamei phường Xuân Khánh, quận Ninh Kiều, bal sit Cần Thơ saong jeng lac Tổ trưởng, tổ jik pet di phường. Sa-ai Nga brei thau, tổ pambuak bruk jik pet gia công hu labaih 2 thun ini mai saong pachreih hu rilo adei saai kamei hu mbaok tame, ba mai rilo siam mekre, rilo adei sa-ai hu jien mek tame tani tanat meng 3 tal 5 triệu đồng/sa bilan. Dom  pandap bhian mek meng dom labik yau: Sang iek ruak (jik ndol, ao blouse ka bác sĩ), sang bac (jik đồng phục ka anek saih) saong dom khu du lịch dalam ban sit caong khin jik ao bà ba saong pandap panda pandar dalam sang yau quai ndol hala... piah alin brei ka tuai damuai du lịch negar langiu. Sa-ai Nga daok brei thau lac:“Adei sa-ai halei caong khin jik pet gia công atau jik pandap pablei tabiak negar langiu atau jik pet pandap panda pandar dalam sang ye pataom guak veik jeng sa khối blaoh meyaoh khan pandap blaoh taduan mek pandap mai jik. Hu dom urang takre jik khan ao ka uranaih, ye drei tacei tal cửa hàng prong, hu labik khang pablei tabiak dom tỉnh. Tal jik ini bac blaoh ye hu bruk ngak chip, nan lac taduan mek pandap mai jik gia công, kasa di nyu lac jik gia công hu jien mek tame; kadua nan lac drei paglaong tangin gheih ngak, ka klau lac hu labik pablei tabiak, saong ka pak drei padang hu tổ adei sa-ai.”

Tuk vak tapa, mô hình “Tổ pambuak bruk jik gia công” hu peih ngak di 13 phường dalam quận Ninh Kiều, hu abih tih labaih 40 urang hu mbaok tame. Sa-ai Nguyễn Thị Hồng Nga – Phaok akaok Kapul urang kamei quận Ninh Kiều, brei thau: Tổ pambuak bruk jik gia công, adei sa-ai peih ngak biak siam, yaom lac bahrau peih ngak hu 2 thun min bruk ngak ini, rik daong tame bruk ba brei bruk ngak ka adei sa-ai dalam puk palei. Abih di nyu lac, urang kamei kathaot dang angan chủ hộ, patrun bruk dom adei sa-ai njuak nao ngak mbang pah atah. Sa-ai Nga daok brei thau, anak tal, gah quận Hội daok peih prong bruk jik gia công tal dom phường daok veik.“Dahlau diah, dom adei sa-ai kan kandah, kayua lac oh thau ngak hagait langiu di bruk ngak mbang ngak huak dalam sang, raok ba anek nao bac  ye oh thau ngak hagait tra piah duah jien mek tame. Jeng meng hu tal pato jik ini di Pasak pato bruk ngak di Kapul urang kamei quận peih tabiak hu daong ka adei sa-ai hu jien mek tame, ba brei bruk ngak tani tanat. Daong ka adei sa-ai pasiam veik rai diuk di drei.”

Piah daong ka adei sa-ai kamei hu bruk ngak saong patagok jien mek tame, langiu di bruk peih dom tal pato bruk ngak, ba brei bruk ngak, Kapul urang kamei quận Ninh Kiều, bal sit Cần Thơ, pataom tame roh duah dom phun jien, langiu phun jien di gilang pariak sarak karja, Kapul daok jak ba dom phun jien di labik yau phun jien pataom di yaok baoh sang, phun jien patak pataom..... piah samar daong ka adei sa-ai mbuan laghaih jang dalam bruk ngak mbang cak rok patagok kinh tế baoh sang. Langiu di nan, quận Hội daok pambuak bruk haong dom gah, dom pakat parilo jang jalan pato bruk ngak ka urang kamei di puk palei, gam njuak haong pren, ilamu saong tui bruk cak rok patagok bruk ngak mbang kinh tế di puk palei. meng nan, ba mai jalan lagaih piah ka adei sa-ai patagok bruk sahneng duah piah pandar tame bruk cak rok patagok kinh tế baoh sang, hu jien mek tame tani tanat, rik daong patrun kathaot./.

Urang lang: Jasi