Pathau mikva saong taong abih gauk! Urak ini, gah ngak nông ban sit  Cần Thơ hu salih jaihk 1.200 ha taneh ngak padai takik kein laba tapa pala dom janih phun hu yaom kinh tế. Bruk ngak ini tuk camereip hu ba mai kein laba kinh tế saong hu daong ka bhap bini tani tanat raidiuk, dak harei dak ngak kaya meda angaok mblang taneh di drei.

Meng labaih 3 ha taneh pala drak, sang ong Nguyễn Hữu Huynh, daok di Hòa An B, phường Thới Hòa, quận Ô Môn yaok thun tok ngak sa vụ padai Đông Xuân, daok dom vụ karei sang ong raong ikan, raong ada.  Tapa bruk ngak ini, yaok thun, sang ong mek jien tame hu labaih 300 triệu đồng. Lingiu di nan, piah hu jien pandar cai yaok harei, ong pala pabak dom janih phun mbang baoh katut harei yau: patei saong lahong. Meng salih janih phun pala lagaih bo sang ong hu kaya meda. Ong khan lac, meyah dahlau daih ngak padai 3 vụ, sang tok ginup mbang, sahneng hagait tal bruk ngak kaya meda.

 " Drei ngak 1 vụ padai Đông Xuân, dom vụ hadei drei oh ngak padai, drei palao ikan, raong ada. Kein laba mboh hu rilo jang ngak padai, daok ikan ye 1ha drei cap mek hu kurang labaih 1 tấn min oh abih jien blei pandap ka ikan mbang, daok ada ye 500 drei laba samu 1 vụ. 3 ha drei duah hu labaih kurang 300 triệu."

        Tui bruk salih bahrau phun pala, tukvak tapa di Cần Thơ, dom janih njam patam baoh kraoh yau tamekai, tangei, lange saong dom janih phun pala karei hu rilo urang ngak nong pilih ruah piah pala. Bruk salih phun pala ini tuk camereip daok ba jien tame tani tanat, daong ka bhap bini tabiak truh kan kathaot khang kajap, rilo sang yam tagok jeng kaya meda.  Ong Trương Hoàng Thiệt, daok di xã Đông Thuận, huyện Thới Lai brei thau:" Vụ pala jeng hu tacei pato ilamu, tuk trun pajaih ye hu hội thảo đầu bờ. Tacei ilamu ka urang ngak nong jalan pametai baoh bao meh, pametai hareik atau pacang caga ruak ka phun padai, ilamu raong ikan, raong menuk ada. Đảng saong Karja drei biak sangka."

Piah salih janih phun pala yau nan, Cần Thơ  hu daong ka urang nong jalan pala ngak tui tiêu chuẩn VietGAP; Global GAP saong daong dom pajaih njam patam, phun mbang baoh hu yaom kinh tế. Lingiu di nan, daok cakrok patagok dom bruk raong glang tui tanut an toàn vệ sinh thực phẩm. Peih ginum biai, pasram megru piah bhap bini thau hu dom kadha bahrau saong thau pandar dom ilamu kỹ thuật bahrau piah abih takik jien ngak, patagok jien mek tame. Ong Nguyễn Ngọc Hè, Giám đốc Sở ngak nong saong patagok palei pala Cần Thơ brei thau: "Patagok đầu tư ka khoahọc saong cakrok menuac ngak nong palei pala, piah ngak jeng pren khang ka patagok ngak nong. Ngak tabiak dom kaya pandap praong, pataom sa labik, peih bruk pambuak gauk ngak piah paglaong yaom saong cakrok khang kajap."

Anak meta mboh lac, bruk salih janih phun pala di bhum taneh ngak padai takik kein laba hu daong ka urang ngak nong tabiak truh kan kathaot, yam tagok ngak kaya meda angaok mblang taneh di drei. Min, piah ka bruk salih bahrau ini hu ba mai kein laba khang kajap, karja saong gah ngak nong njauk sangka tal jalan pala ngak, pilih ruah dom phun pala, janih raong ka nyu lagaih haong yaok bhum taneh. Dalam nan, njauk pambuak bruk di bhap bini haong doanh nghiệp piah blei abih kaya nong, ba ilamu kỹ thuật bahrau tame sản xuất saong chế biến; pabak ka darak pasar saong pablei tabiak negar lingiu./.