Cao Bang pabak hatai ka uranaih kathaot nao bac

Jaik 3thun tapa, danak dak “Daong adei nao bac” kayua Bộ đội Biên phòng (BĐBP) tỉnh Cao Bằng peih ngak hu ba tabiak rilo bruk ngak  hu makna, ndung bak hatai anit ranam, pabak hatai jia ka yaok pluh uraniah sang kan kandah hu nao bac da-a.

Urang jakar, urang lin Đồn Biên phòng Tổng Cọt urak ini bhian randap haong bruk hu mbaok di 2 urang lin sit Hoàng Văn Thơm, Vương Văn Trần. 2 adei urak ini daok bac tal 7A, sang bac THCS xã Tổng Cọt (huyện Hà Quảng); jeng lac sang klathaot, palei tapen biên giới. Anai gru Nông Thị Lan Hương, gru chủ nhiệm tal bac 7A, Sang bac THCS xã Tổng Cọt bui sambai khan lac: Dahlau deih sang daok atah sang bac, dom harei hajan atau lingik li-an, Thơm sangTrần njauk padeih bac, bruk bac da-a oh hu yau hatai caong. Meng tuk hu  BĐBP ba mai mbang, daok, sinh hoạt di Đồn Biên phòng Tổng Cọt; hu dom gru pato sangka, pato pakai, dua adei hu jeng dom anek saih naih gheih di sang bac. Tal urak ini, dua adei maong Đồn Biên phòng yau baoh sang ka 2 di drei, iek dom cei bộ đội yau gauk gar dalam sang. Thơm khan lac: “Adei biak patuah kayua hu daok, hu bac di Đồn Biên phòng. Meng harei tame ini, adei bac hu biak rilo janih, meng bruk sit di abih yau rami ramik labik ndih daok, ndih tagok njauk tuk  mbiah tal bruk pasram rup pabhap, kham merat yam tagok dalam raidiuk”. Daok ngan saong Lý Thị Thu Phương, anek saih tal bac 8B, Sang bac THCS xã Ngọc Khê (huyện Trùng Khánh), sang kan kathaot, adei njauk mbaih cambuai, hu BĐBP Đồn Ngọc Côn daong, lac jalan peih tabiak pachreih ba adei kham merat bac da-a. Ong Lý Xuân Các, ong nội di adei Phương drut drui lac: Yaok bilan, urang jakar, urang lin Đồn Biên phòng Ngọc Côn mai tal sang brei pandap, pachreih ba, kakei  taco Phương bac da-a. Hu bruk daong di BĐBP, taco Phương hu điều kiện bac da-a siam jang, biak thau dhar phor bộ đội lo. 

Danak dak  “Daong adei nao bac” lac sa bruk ngak ndung bac hatai anit ranam, brei mboh bruk jum pataom , kak kajap haong bhap bini di dom urangg lin cuk quân hàm xanh. Ini jeng lac pren pachreih ba khang piah ka dom adei kham merat bac da-a jeng urang siam hu kein laba ka xã hội, meng nan patagok bruk ngak, labik dang di pakat ủy, karja palei saong bhap bini dalam bruk khik caga chủ quyền, an ninh biên giới taneh ia.

Piah daong ka dom anek daih sang kan kandah labik biên giới hu nao bac, meng bilan 6/2014, BĐBP tỉnh peih ngak danak dak “Daong adei nao bac”. Piah ngak hu siam lagaih, Đảng ủy, Bộ Chỉ huy BĐBP tỉnh brei jhul khang bruk pathau khan, ngak ka yaok urang jakar, urang lin mboh hu makna siam mekre di danak dak; paglaong bruk jum pataom, anit ranam, ba gauk daong dom anek saih kan kathaot kham merat yam tapa kan kandah. Dom urang jakar, urang lin abih hatai hu mbaok tame danak dak saong padang kadung jien patak pataom “Daong adei nao bac” ngan saong kadha “Rik  1.000 đồng sa harei, drei daong hu ka rilo anek saih sang kan kandah hu nao bac da-a”. 

Meng jien pataom hu, lambaok urang dang akaok dom đơn vị pambuak bruk haong pakat ủy, karja, sang bac pilih ruah dom adei sang kan kandah kham merat bac da-a piah daong tapak pok jien takik di abih lac 500.000 đồng sa em sa bilan; saong daok hu taom gaok, ginum biai haong amaik ame, haong sang bac brei sangka daong ka dom adei hu nao bac. Abih di nyu nan lac, 2 đồn Biên phòng Xuân Trường, Tổng Cọt oh lac taduan daong bo daok ba dom adei mai raong mbang bac, yau ye dom urang ame, urang amaik ba anek nao mai bac da-a, tacei pato dom adei jalan ndom puac, daok dang. Piah daong  ka rilo adei anek saih kan kathaot, ngak brei pambak praong bruk ngak hu yaom glaong ini, meng bilan 2/2016, dom đơn vị BĐBP dalam tỉnh ba gauk tut angan daong ka dom anek saih sang kan kandah.

Tui nan, yaok Đồn Biên phòng taduan daong 2 adei; dom urang dang akaok dalam Bộ Chỉ huy BĐBP tỉnh, yaok urang taduan daong 2 adei saong yaok phòng, ban dalam Bộ Chỉ huy taduan daong 2 adei. Tal urak ini, taong abih lực lượng BĐBP hu taduan raong 62 anek saih bhum biên giới sang kan kandah, kham merat bac da-a, tui yaom jien daong abih tih 370 triệu đồng. Lingiu di nan, urang jakar, urang lin daok kaok tabiak meng jien bialn di drei, jak ba dom urang ngak pahla, daong tapuk, siphau, but kalam , pandap bac da-a, pandap pandar ka anek saih dom sang bac labik drei phụ trách.

Jalan nao tal sang bac harei ini di dom anek saih bangsa takik oh daok lac glai ram, ceik glaong, bo lac jalan praong siam hu padang tagok meng hatai anit ranam di bhap bini saong urang lin Biên phòng. Meng dom tacei ba tuk akaok mereip nan, nyu peih tabiak jalan khang kajap piah ka harei hadei, dom urang anek ini hu jeng rairah patui jalan, hu mbaok tame khik caga chủ quyền, an ninh bhum tapen negar di taneh ia.