Hadei di Tết nguyên đán, yaok rituh baoh sang di palei Đông Tân, xã Đông Hà, huyện Đức Linh mboh biak duh hatai kayua dalam palei njom nerak trak meng thak pui di sang mac ngak pandap mbang raong glang Japfa Comfeed jaik di nan pruh tabiak. Ống khói di ghing đun hơi di sang mac yaok harei pruh tabiak yaok mbang thak jhuk, hadei di nan par bak palei Đông Tân. Thak jhuk kan suak yava ngak ka thei jeng duh hatai ka pren yava di drei. Urang prong jeng yau uranaih sit mbuan si njauk ruak jalan suak yava kayuac hít ralo thak jhuk nan. Amuk Hoàng Thị Thanh brei thau: “Thak nyu par bak palei, manuac sia daok pak ini mboh kan suak yava. Halei lac mùi cám, bloh tal mùi thak độc, yaok urang prong, anek naih daok pak ini daok njom nerak, mbuan ba tal viêm phổi.”

Hadei di tuk Rayo sap ndom Việt Nam brei thau ka bruk ini, Ủy ban bhap bani tỉnh Bình Thuận hu tacei brei pasang iek chip bruk ngak di sang mac ini. Page 4/3, yaom lac harei padeih, min urang dang akaok Sở Tài nguyên saong Môi trường tỉnh Bình Thuận hu brei urang jakar gah môi trường di Sở trun nao mong iek samar drah. Ủy ban bhap bani xã Đông Hà jeng hu pataom mek panuac di bhap bani saong pandar công ty JAPFA COMFEED hu jalan pasiam veik.

Page 8/3, kapul pasang iek kayua Sở Tài nguyên Môi trường dang akaok, pambuak haong Công an tỉnh Bình Thuận, Phòng Tài nguyên – Môi trường huyện Đức Linh saong UB bhap bani xã Đông Hà hu tame dalam sang mac ngak bruk haong ban lãnh đạo Công ty Japfa Comfeed Việt Nam dhar Bình Thuận. Công ty ini taduan lac hu caik rah tabiak bruk pruh tabiak thak jhuk ngak ka bhap bani duh hatai.

Tui urang pal akaok công ty, sang mac ngak pandap raong glang Japfa Comfeed hu công suất 1.400 tấn pandap yaok harei. Piah hấp nguyên liệu ngak pandap mbang raong glaong, sang mac pandar tal 2 ghing hơi nduac gam sa tuk. Adit dahlau, ghing hơi công suất 5 tấn hơi angaok urak ini njauk khut talei xích băng truyền cấp liệu, njauk padeih ngak piah pasiam veik. Piah pabak bruk ngak, công ty brei tagok công suất di ghing daok veik. Kayua quá tải, ba tal bruk xử lý khí thải di ghing hơi oh ginup công suất thiết kế ngak ka thak jhuk par tabiak ngak jhak môi trường jaik taphia.

Ong Hồ Trọng Khoa, Giám đốc sản xuất di Công ty Japfa Comfeed Việt Nam dhar Bình Thuận brei thau: “Meng blaoh, công ty khaol dahlak hu bảo trì sa baoh ghing hơi. Dalam tukvak bảo trì, piah khik kajap bruk ngak ye hu rah tabiak bruk thak jhuk par bak môi trường. Urak ini, khaol dahlak hu pasiam veik, ba tame ngak veik bình thường.”

Yaom lac mboh bruk yau nan, min gah công ty oh khan brei thau samar drah haong karja puk palei saong jabat chức năng piah brei ka bhap bani thau, plaih ngak ka bhap bani duh hatai. Tal harei ini, công ty hu brei trun công suất di ghing hơi 3 tấn piah plaih thak jhuk par tabiak bak puk palei, taphia di nan daok pasiam veik ghing hơi khut. Di van ngak  bruk haong kapul urang pasang iek di tỉnh, urang pal akaok sang mac sanyu peih ngak siam quy định ka  xả thải plaih ba tal ô nhiễm môi trường.

Sang mac urak ini daok pasiam veik sự cố. Abih di nyu nan lac  dalam harei kapul urang jakar mai pasang iek, bhap bani daok jiak taphia nan oh daok mboh thak jhuk par tabiak tra. Bhap bani thei jeng mboh an tâm. Amuk Nguyễn Thị Nguyệt brei thau: “Công ty hu pasiam veik paje, mong mboh oh daok thak tra, abih paje.”

Bhap bani xã Đông Hà, huyện Đức Linh, tỉnh Bình Thuận caong khin dalam tukvak anak tal sự cố oh daok hu mboh veik piah khik caga siam môi trường diuk rai di mikva pak ini. Sa-ai Phạm Thái Hà, urang daok di palei Đông Tân brei thau: “Ống khói dom harei ini hu công ty pasiam veik, oh daok  pruh tabiak khói jhuk tra. Ngan haong bhap bani khaol dahlak pak ini, caong khin công ty, dalam tuk ngak, khik njauk quy định di adat hukum, di Mentri ba tabiak, piah ka bhap bani sahanag hatai diuk rai, ngak bruk.”

Japfa Comfeed nan lac sang mac duy nhất daok di xã Đông Hà, huyện Đức Linh, tỉnh Bình Thuận. Tukvak tapa, doanh nghiệp ini hu ralo rik daong dalam bruk ba  bruk ngak ka bhap bani, rik daong cak rok patagok kinh tế - xã hội saong mbaok meta di xã Đông Hà. Yau nan min, gam haong bruk patagok kinh tế, bruk khik caga môi trường jeng njauk sangka tal, juai caik ka bhap bani duh hatai./.