Hadei di tuk tabiak truh bol lin, ong Quách Thanh Sử (daok iew lac Mười Sử, daok di ấp 2, xã Nguyễn Phích, Huyện U Minh), tỉnh Cà Mau mai veik palei ngak mbang pala drak yau dom urang karei. Dang mong mblang taneh praong atah, min oh ba mai kein laba kayua lingik tasik oh lagaih, ong mboh biak duh hatai. Meng hatai kham merat, tari tareng saong hadah krah dalam bruk ngak mbang, ong jeng urang akaok meti ba baoh Yamen mai bhum glai U Minh pala hu siam mekre.

       Puac dom thun 90 di abap dahlau, bhap bani daok dalam glai tràm U Minh hạ daok abih hatai hong phun padai mùa. Angaok dom mblang taneh njaom likhul, takik phù sa nan yaok thun tok ngak hu sa 1 vụ padai, bo phun padai jeng oh cak rok siam. Ong Mười Sử hu ndom tagok hatai saneng di drei haong dom ayut sahabat daok menyum aia tea: “Caong khin salih tapa ngak bein, pala phun mbang baoh”. Pang bloh, urang ini pacang, urang diah klao kayua di tuk nan, pak ini oh ka thei khin klaak hamu tagok bein. Min meng hatai khang, oh huac kan kandah, ong jeng kham merat ngak.

       Oh huac glaih glar, Ong Mười Sử tame bruk panduan salih angaok mblang taneh 2 ha di sang drei. Tuk nan mac moc oh hu, khin tagok liếp pala phun mbang baoh ye ngak meng tangin. Bhum taneh ini lac labik daong, ralo lakhul, takac ribaong dalam meng 4 – 5 tal taneh meng hu bờ liếp. Ong gheih ba tal taneh mbaok tagok angaok phun meng diuk hu. Yau nan min ong Mười Sử jeng oh huac kanda, ngak harei - ngak melam. Gaok melam mai, urang amaik taha mboh anek likei di drei ngak glaih glar njauk medeih tabiak iew anek drei tame ndih. Ong Quách Thanh Sử khan veik: Pagap yau drei mek klau thước vuông, parah tame mbeik hu 6 thước vuông. Ye njauk ba tal taneh mbaok tagok tra, oh yau dom labik karei ba tagok ye pala hu. Ba tagok blaoh tal gah ala caik nan 3 thun hadei hareik oh ka tamuh tagok, kan lac kan jang urang di labik nan. Njauk mek tal taneh mbaok jaik 4 tấc ba tagok ngak mbaok. Hu điện hu gom hagait halei, truac menyek tagok takac. Cang ka amuk nao ndih ka, 9 tuk  meng nao, ngak harei oh ginup. Caoh trun amuk mahit amuk tabiak iew tame.

      Ngak yau nan bilan tapa bilan, harei tapa harei, ong kuac caoh blaoh jeng tal harei hu jeng ribaong, jeng danao kavei. Tuk  nan, dalam tỉnh Cà Mau oh thei pala darang. Min ong buh jien tame ngak sa bein nhãn 600 phun. Dom kanjaoh aia huac tuh trun danao kavei, njaom tame taneh, yau thau hu bruk rambah rambup, hatai kham merat di urang nong khang hatai ini. Abih ar ini phun hijao hala, tal liếp diah daok tabiak bingu. Tal thun 2004, bein phun hu paik baoh, phun nhãn tơ brei baoh biak rilo jang hatai sahneng mboh di ong Mười Sử. Darang pala di bhum taneh njaom lakhul U Minh oh prong, jangaih, mekre yau dom bhum karei. Min hu chất lượng siam, baoh sit hasit min tapal, mbang yamen jang. Urang blei takre ralo. Kinh tế sang ong jeng patagok meng nan.

       Dalam tuk bein di sang ong daok tamuh siam, mikva jak gauk mai bac megru ngak tui. Thun 2006,  tatuak drei lac, aia mbak nyu njom tame. Mikva ba gauk mek aia mbak tame salih tapa ngak padai – hadang. Labik aia taba njauk aia mbak njaom tame khang, njom dalam tame dom mblang taneh brei baoh yamen. Dom ayut ngak bein hong ong tok thau tabum pabah salih tapa raong hadang. Dom rambah rambup dahlau nan daok ba mai kein laba di cei Mười, daok dang anak bruk mbuan lahik abih. Ong oh taduan lah, kham merat duah jalan khik bein phun mbang baoh.

       Tuk huak lisei ong jeng oh van saneng duah jalan khik caga bein phun mbang baoh, blaoh ong duah hu jalan pacang cakak “aia mbak” bo thei thei jeng pok meyaom. Tuk mikva kaoh phun mbang baoh, kuac rok taneh ngak padao raong hadang, ong Mười Sử jeng pah manuac samar kuac rok ribaong vin taom dhal bein sang drei, ngak liếp prong jang, min oh njauk lac piah pala phun. Ong ngak dom ribaong pacang cakak aia mbak. Dalam dom baoh ribaong pacang vil taom dhal, ong caik aia biar ka mbak vil taom dhal njaom tame blaoh tuh tabiak kraong. Daok dom danao aia taba di gah dalam hu ong bơm aia tagok bingun aia khik ka mbaok aia glaong jang dom ribaong pacang mbak. Tui ong Mười Sử oh meda hu bruk aia mbak di labik biar jang njaom tame danao glaong jang. Di pak kreh nan lac takai ar. Baoh ribaong nduac vil taom dhal abih. Vil taom dhal danao hadang urang bơm aia tabiak, blaoh tuh trun kraong abih mbong. Nyu biar jang mbaok aia dalam ini. Gah dalam drei bơm njuk aia trun, mbaok aia dalam danao brei glaong jang gah langiu hasit. Sa phân, dua, klau phân hagait jeng hu. Oh caik ka nyu biar jang, aia dalam ini nyu tabiak hamiat, mbak oh njaom tame hu.

      Meng jalan ngak ini, ong Mười sử khik hu aia taba ka mblang taneh di kreh bhum aia mbak, pren yava buh tabiak di ong hu jak jeng. Urak ini, dalam mblang taneh bein aia taba 2 ha di sang, ong Mười Sử ngak biak ralo mô hình. Dalam nan,  hu bein darang 200 phun bo taong abih bhum U Minh ini oh thei hu, yaok thun brei jien mek tame jaik 100 triệu đồng. Dom phun darang taha hu ong salih tapa dom phun vú sữa bak baoh tui kuhria mek tame hu meng 50 - 60 triệu đồng sa thun.

      Piah pandar hu taong abih taneh daok saoh, ong pala phun thiên lý grauk labik dalam bein, yaok thun jien mek tame yaok rituh triệu đồng. Ala danao aia taba, ong palao raong ikan sặc rằn, ribaong pacang mbak ong raong ikan bống tượng. Kuhria rah tapa, yaok thun sang ong jien mek tame hu labaih 300 triệu đồng, kaoh abih phun jien buh tame ong daok laba hu labaih 200 triệu đồng. Sa yaom jien praong ngan haong dom urang raong hadang - ngak padai.

        Ndom ka ilamu piah hu jak jeng yau harei ini, ong Mười Sử khan lac: Ong bac megru tui Wa Ho! Panuac ndom “Oh hu bruk hagait kan, tok huac hatai oh khang” Wa pato, ong oh van hu: Dahlak bac tui Wa panuac ndom “Oh hu bruk hagait kan, tok huac hatai oh khang”. Nan ye kan kandah rambah rambup yau habar jeng oh huac, oh kadul likuk. Drei saneng meng ini tal metao drei  jeng kak kajap haong mblang taneh ini piah diuk rai. Kak kajap haong puk palei piah diuk, meng duah ralo jalan ngak yau habar ka năng suất dak harei dak glaong. Oh hu bruk hagait kan, tok huac hatai manuac oh khang. Meyah khin ye kan kandah tal halei drei jeng yam tapa hu.

      Dom panuac ariya Wa Ho brei ka dam dara hu jeng chân lý. Meng chân lý nan hu daong ka ralo urang lin khang hatai mesruh pacang kaol khamang dahlau daih saong kiên cường, sáng tạo dalam bruk ngak mbang harei ini yau ong Quách Thanh Sử hu jak jeng./.