Pathau mikva saong taong abih gauk!

Dalam dom thun tapa huyện Côn Đảo, tỉnh Bà Rịa- Vũng Tàu biak sangka tal bruk “bayar dhar phon” lac bruk ngak gam gam, brei mboh bruk hadar dhar phol ngan saong dom baoh sang hu urang var klak rup drei ndih trun ka bebat, tự do di taneh ia. Meng nan, huyện hu iek glang siam ka rai diuk di dom baoh sang sarak, urang hu buh pren yava. Lưu Sơn, urang vak di rayo sap ndom VN daok di ban raya HCM hu kadha vak brei thau ka bruk di Côn Đảo:

Dom harei bilan 7 ini, di sang ong Lê Văn Bảnh, urang dahlau daih daok guc chính trị huyện Côn Đảo bak hatai jai, thun ini umo 70 thun, yaom lac oh khang pren yava min ong Bảnh jeng daok minh mẫn. Ong hadar veik, thun 1973 tuk daok ngak bruk cách mạng di Đồng Nai ye njauk kol kha mang cap ba nao Côn Đảo, ong saneng lac oh daok jalan mai. Tal thun 1975, gah meraong peih paha, sang guc peih pabah mbang, ong quyết định daok veik Côn Đảo diuk rai. Meng harei nan tal urak ini, ong bhian hu karja palei sangka, daong ba. Ong Bảnh lac: “Baoh sang sarak karja di Côn Đảo ini biak hu ưu tiên, bruk mbang ngui daok dang, điện ia, sarak daong cách mạng hu huyện Côn Đảo biak sangka. Biak ginup, lễ tết jeng hu alin pandap panda brei mboh biak chreih chrai”.

 Ong Nguyễn Văn Ước, ndih tapui thun 1940 jeng lac urang dahau daih daok guc chính trị njauk kol kh mang cap di Cần Thơ ba tabiak Côn Đảo. Hadei harei taneh ia hu yasa, ong Ước gam saong dom urang dahlau daih daok guc hu daok veik Côn Đảo piah dak padang bhum taneh hu iek lac palei pala ka dua di drei. Ong Ước brei thau “Huyện ủy, Hội đồng bhap bini, Ủy ban bhap bini jeng hu mai tal sang rivang sua pren yava taong abih baoh sang sarak karja. Dom urang kan kathaot atau anek saih di labik ini jeng hu sangka, BHYT jeng hu peih brei ginup”.

 Gam saong bruk dak padang kinh tế - xã hội, huyện Côn Đảo hu iek bruk bayar dhar phon lac sa dalam dom bruk ngak praong dalam tukvak peih ngak dom bruk chính trị, kinh tế, ilamu, XH di puk palei. Piah bruk bayar dhar phon hu kein lagaih, Côn Đảo hu peih ngak chip, ginup dom sarak di Đảng, karja ka bruk ini. Taphia di nan, urang dang akaok huyện bhian sangka rivang sua, alin pandap, daong tani tanat rai diuk ka dom baoh sang sarak karja saong urang hu buh pren yava ka cách mạng. Baoh sang dom urang dahlau daih daok guc halan hatian daok veik saong dak padang Côn Đảo jeng taduan hu bruk daong ba di huyện. Amuk Nguyễn Thụy Nga, akaok phòng Nội vụ- Lao động- Thương binh saong Xã hội huyện Côn Đảo lac: “Hu 504 urang sarak karja hu alin pandap ngan saong yaom jien 450 triệu đồng, urak ini hu 13 mbang anek saih, sinh viên anek kamuan thương binh, liệt sĩ hu chế độ ưu đãi pato megru jaik 150 triệu đồng. Huyện jeng daong ka urang hu buh pren yava saong gauk gar di urang hu bruk ngak tani tanat”.

 Bruk sangka, iek glang ka dom urang sarak karja, urang hu buh pren yava di Côn Đảo hu phaok akaok negar Đặng Thị Ngọc Thịnh taong yaom glaong tuk nao rivang saong ngak bruk di Côn Đảo barau ini: “Kol dahlak biak sambai sarak bayar dhar phon di huyện ủy Côn Đảo jeng yau di Bà Rịa – Vũng Tàu, puk palei peih ngak siam. Eng labik Côn Đảo ngan saong 76 baoh sang sarak karja, 89 urang hu buh pren yava huyện ủy jeng hu ngak siam sarak di Đảng saong karja, taphia nan pachreih hu nguồn lực XH jeng yau dom puk palei karei iek glang biak siam”.

 Huyện urak ini hu 46 gauk gar liệt sĩ, thương bệnh binh, urang hu buh pren yava ka cách mạng saong bruk mesruh metak njauk kol khamang cap daok guc daok hu daong gam gam, taong abih urang daok dalam sarak karja hu miễn, giảm je pandar taneh. Kuhria meng thun 2016 tal ini, huyện Côn Đảo padang ngak hu 28 baoh sang tình nghĩa, yaom 1 tỷ 600 triệu đồng. Langiu bruk bayar ginup dom chế độ sarak, Côn Đảo daok duah thau thông tin, hatai caong di dom baoh sang sarak karja piah pachreih ba, klah rabha saong hu kế hoạch daong ba chip. Dom bruk daong ba iek glang thương binh, bệnh binh,  urang hu buh pren yava jeng hu jhul pakhang tapa dom hội, kapul nyaom./.