Tổng đài taduan saong langyah tangi sua di bhap bini, yaok adit ngak bruk meng harei Som tal harei Suk

Cục Cảnh sát khik iek hành chính ka bruk salamat xa hoi (C06, Mentri Công an) birau peih Jabat Tổng đài daong ngak căn cước công dân saong khik ramik bhap bini. Tổng đài 1900 0368 taduan saong langyah tangi sua di bhap bini, yaok adit ngak bruk meng harei Som tal harei Suk. Tui Cảnh sát khik iek hành chính ka bruk salamat xa hoi, ini lac jalan daong salih bahrau bruk khik ramik bhap bini meng vak angaok harak tapa ilamu birau, lac bruk khik ramik bhap bini tapa mã định danh menuac urang, pasiam bruk kurang sumu gauk dalam bruk khik iek thong tin di bhap bini. Dalam harei 5 saong 6/1, tổng đài taduan hu 1.500 mbang iew phone di bhap bini mai tangi sua ka bruk ngak saong salih birau căn cước công dân.

Kapul ngak bruk di Tư lệnh Quân khu 9 bahrau alin hadiah 2 boh sang “Paprong jum pataom” brei ka sang kan kandah gah sang dok, yaom abih tih lac 100 triệu đồng di huyện Mỹ Tú, tỉnh Sóc Trăng; brei pandap ka 10 boh sang urang lin hu rai duik kan kandah dalam tapon nyaom bol pal phao krong, brei 100 pok pandap ka dom sang dalam sarak karja song 5 tấn brah ka sang kan kathaot .... Tapa nan, piah samar pachreih ba, dong ka rahra yam tapa kan kandah, patagok bruk jum pataom gauk jhul kadun likuh jit ruak COVID-19, patagok kinh tế-xã hội dalam tuk siam mekre bahrau.

Kayua huac jit ruak COVID-19 daok sraw kadau, atau lahik jien mek tame kayua jit ruak, nan ye Tet Nguyen dan thun ini, labaih meteh trieu urang ngak langiu tỉnh daok veik Bình Dương mbang tet. Piah pachreih urang ngak, Liên đoàn Lao động likau tỉnh brei labaih 12 tỷ đồng piah daong urang ngak langiu tỉnh. Liên đoàn jeng hu buh tabiak labaih 190 tỷ đồng piah daong ka jaik 640.000 urang ngak. Kayua oh peih bruk brei radaih taduan raok urang ngak nao palei mbang Tết, nan ye labaih 2.000 tỷ đồng meng paok jien nan hu daong ka urang ngak gaok kan kandah. Langiu di nan, dom pakat cong doan jeng hu daong 160 uranaih metui kayua Covid-19, yaok kamuan hu alin brei 1 sổ tiet kiem yaom 10 trieu đồng.

Dom doanh nghiệp, labik ngak pandap, pablei salih, dom siêu thị, cửa hàng tiện ích dalam tỉnh Long An hu caga bloh pandap panda ka tuk tết Nguyên yaom abih tih labaih 560 tỷ đồng. Rilo doanh nghiệp jeng dok peih prong bruk pablei rai, pablei tal dom bhum palei pala, dom labik ngak kong, parilo jalan pablei pandap song pablei yaom lap piah dui pachreih urang blei. Sở Công thương Long An hu panuac ieu doanh nghiệp pablei salih brei khik hacih saat pandap mbang , siam mekre dalam bruk pacang caga jit COVID-19, jhui ngak klaik klaoh bruk pabak pandap pablei. 

Biak rilo bein thanh long tame bilan paik baoh min oh hu labik pablei kayua dom pabah mbang negar Trung Quốc daok kareik, ngak ka rilo tỉnh pala thanh long praong yau Bình Thuận, Long An, Tiền Giang gaok kan kandah. Ong Phan Văn Tấn, Phaok Yam ndoc Sở Ngak nong saong Patagok palei pala tỉnh Bình Thuận brei thau, tui kuhria mboh dahlau, dalam quý I ini, tỉnh hu labaih 100.000 tấn thanh long khin pablei. Yau nan min, urak ini urang blei daok suai damuai mai blei, gaok labik padeih blei thanh long ba tal yaom thanh long laik trun biak lap, hu labik tok meng 2.000-4.000 đồng/kg. Dom urang ilamu kinh te mboh lac, pala, pablei thanh long oh lac bruk anak meta bo njauk brei hu jalan ngak suai lavik, dalam nan, parilo darak pasar pablei, lac bruk njauk ngak.

Dalam harak ndom puac thun bahrau, akaok negar Trung Quốc - ong Tập Cận Bình brei thau, Trung Quốc kham merat peih sa Thế vận hội siam mekre ka dunya. Urang brei panuac di mintri Ngoại giao Trung Quốc ndom lac, Trung Quốc khang hatai peih Thế Vận hội hu siam mekre dalam tuk jit Covid-19 daok rah tabiak srau kadau song peih ngak catang bruk pacang caga, pasang iek jit ruak, pacang cakak bruk tamuh khang di jit Covid-19, khik iek siam mekre pren yava di tong abih dom vận động viên hu mbaok tame Thế vận hội bilan brak.

Tổng Yam ndoc Gah Y tế - WHO mboh lac, biến thể Omicron takik ba tal ruak trak jang dom biến thể Delta. Yau nan min, urang dang akaok Gah Y tế dunya kakei lac, bruk dak angan biến thể Omicron lac “njol” oh ka lagaih saong meda ba tal jhak. Urak ini, dalam dom tanut taong yaom bruk mbuan ba tal metai di WHO, biến thể Omicron saong biến thể Delta hu ba tame angan “ biến thể njauk huac”.

83 triệu menuac di grauk labik dalam negar Mỹ daok yam tapa bilan brak biak kan kandah. Akaok adit ni dom urang peih radaih ô tô di labik tàu điện ngầm Washington, D.C. gar veik labaih 20 tuk angaok jalan kayua tuyết laik kapan. Dalam adit ni, dom hãng kapan haoh brei klaak labaih 1.700 mbang par kayua langik tasik song kurang urang ngak kayua njauk COVID-19./.

Urang lang: Hani Pha – Bhumi – 07/01