Dalam 2 harei 28 song  29/4, di  Đà Nẵng, Hội đồng bangsa di Quốc hội peih nyaom biai  pasram ilamu jak ba tranh cử ka 40 urang tabiak mbaok piah pilih ruah ka Quốc hội song Hội đồng bhap bini (HĐND) pakat  tỉnh lac urang bangsa takik meng dom tỉnh, ban labik gah merong song bhum kreik negar - Tây Nguyên. Di nyaom biai, dom ứng cử viên hu pasram 6 kadha yau: yaih khan labik dang, bruk ngak, jalan ngak di Quốc hội, HĐND pakat  tỉnh song urang Quốc hội, HĐND gam saong rilo ilamu jak ba tranh cử, taom gaok cử tri, padang thaot binguk anak bhap bini …

Urang par akaok mblang kapar haoh dunya Tân Sơn Nhất brei thau dom mbang par  tukvak tabung glaong padeih lễ 30-4 saong 1-5 di dom hãng,  nao saong mai tagok labaih 25% dut saong urak ni, dalam tuk hạ tầng mblang kapar, abih di nyu nan lac labik daok di tuai daok quá tải. Min, mblang kapar haoh dunya Tân Sơn Nhất brei thau lac hu caga dom jalan langyah meng quầy ngak adat, pasang iek an ninh, mblang pataok... jeng pabak tukvak tabung glong dalam tuk lễ 30-4 saong 1-5 hu siam mekre, tani tanat. Ngan haong labik tuai bhian gar veik rilo  lac gah pasang iek an ninh, urang par akaok di mblang kapar ahaoh jeng brei thau hu ramik veik 5 mac pasang iek, patagok abih tih tal 30 mac pasang iek saong ngak bruk abih prein khang di nyu, meda langyah hu dom tuai nao tapa labik ni biak samar jang.

Mesup ni 29-4, thượng tá Nguyễn Văn Dân, urang dang akaok Công an huyện Ea Kar, brei thau lac bahrau khởi tố vụ án, gam haong 37 urang song tabiak harak cap mek 18 urang hu mbaok jah tak glai prong  di labik jiak Đắk Lắk - Phú Yên. Dom urang njauk khởi tố dok di  huyện Sông Hinh (Phú Yên). Tapa pasang iek, gah chức năng mboh lac, meng puac bilan 10-2020 tal harei 14-11-2020, 37 urang nan  tame dalam tiểu khu 618-622 labik khik ramik alam langik tasik Ea Sô jah tah abih tih jaik 43m3 rilo meng lac kayau căm xe. Dom kayau dok veik pak nan song pandap panda pataom mek meng dom urang nan jeng tagok tal yaok pluh mét khối.

Sang iek ruak Ung bướu TP.HCM brei thau, dalam bilan 5/2021, urang ruak meng dom tỉnh saong ban Thủ Đức (meblah labaih 80% urang ruak taong ruak tuk harei di sang iek ruak Ung bướu labik ka 1-quận Bình Thạnh)  meda hu yaih khan saong pato tacei nao labik ka 2 (daok di ban Thủ Đức) taong ruak, daok labik ka 1 meda duh ka dom urang ruak di dom quận, huyện daok veik di TP.HCM,  lang talaih bruk quá tải yaok pluh thun tapa di Khoa taong ruak di labik ka 1.

Hadei di jiak 7 thun pacang sre piah padang ngak sang ga dalam haluk di jalan metro ka1 (Bến Thành - Suối Tiên, TP.HCM), harei ini, paga pacang di jalan Lê Lợi labik meng jalan Pasteur tal jalan Nguyễn Huệ (quận 1) hu yah klaak, radeih hu peih nao mai, dom boh sang mbaok jalan dalam labik hu peih veik bruk pablei salih. Paga pacang dok veik di angaok jalan Lê Lợi (labik lubang meng ga Bến Thành tal ga Nhà hát ban raya) hu yah klaak, padang ngak mbaok jalan dalam tuk vak anak tal, tui kuhria hu ngak salah bloh di puac thun 2021.

Hadei di dua mbang pasang iek, harei ni (29/4),  Quốc hội Trung Quốc hu brei tapa “hukum pacang caga palai pajoa pandap mbang” – hukum ini piah khik ginup gah pabak pandap mbang tani tanat ka labaih 1  tỷ 4 rituh trieu bhap bini, pacang veik dom bruk mbang manyum palai pajoa yau daok kandong veik meng lavik mai dalam bruk mbang huak daok dang di negar ni. Tui hukum meda hu ba tame pandar meng harei khan brei thau ni, dom nhà hàng pato tacei oh njauk ngak ka tuai ieu pandap mbang biak rilo ,eda njauk taong phat tal 10.000 Nhân dân tệ (labaih 36 triệu đồng). Urang pablei salih ngak pandap mbang ngak palai pajoa biak trak meda njauk taong phat glaong abih lac 50.000 Nhân dân tệ (labaih 180 triệu đồng). abih di nyu nan lac, bruk ngak tabiak, papar dom danak dak video yaih khan bruk mbang manyum palai pajoa meda njauk taong phat glaong abih tal 100.000 Nhân dân tệ (labaih 360 triệu đồng).

Bruk di bhum tapen negar Myanmar jiak song Thái Lan 2 harei ni gam gam catang tagok ngan song dom bruk mesruh gauk di dom urang pan phao di nyaom  Liên minh pakat negar Ca-ren (Karen) hong gah bol bala. 2 harei ni, bol bala Myanmar gam peih dom mbang taong veik meng angaok langik trun dom labik kayua gah Karen pasang iek. Bhap bini dalam bhum di gah Myanmar song Thái Lan jeng panduan nao labik karei. Dalam tuk nan, Liên Hợp Quốc hu panuac ieu Myanmar samar tani tanat bruk.

Nghị viện châu Âu bahrau brei tapa sarak pablei salih hadei di Brexit. Ni lac bruk ngak puac abih dalam jalan “palao gauk” di Liên minh châu Âu saong Anh, cambaih hu padeih bruk pambuak gauk di dua gah. Dom urang par akaok negar Anh, Liên minh châu Âu saong doanh nghiệp châu Âu caong lac bruk brei tapa puac abih di sarak meda peih tabiak sa saman pambuak gauk bahrau yaom lac jeng daok rilo asal kadha ngak nek rabah di dom gah pambuak gauk dahlau diah./.

Urang lang: Thu Thảo & H.Pha - 29/4/2021  15:40:10