Đắc Lắc: hatai merat yam tapa kan kandah di sinh viên bangsa takik

      Y aom lac sang kan kandah, min rilo sinh viên urang bangsa takik di Đắc Lắc daok kham merat yam tagok, bac da-a naih gheih saong hu mbaok tame dom bruk tập thể. H’Xíu – urang vak di rayo sap ndom VN daok di bhum Tây Nguyên yaih khan dom kreih camin sinh viên bangsa takik hadah trah. Daa mikva saong grauk yut tui pang :

      Sang kan kandah, bac abih tan bac 12, Nông Thanh Hùng (bangsa Tày, ndih tapui thun 1990) njauk padheih bac, nao ngak duah jien daong amaik. Hadei di jaik 5 thun nao ngak pah, ngak công nhân jhik, thợ kakak mbuk blaoh mai sang ngak hamu. Hùng sahaneng lac, tok hu bac da-a meng ba mai jalan siam mekre ka rup drei, daong sang tabiak truh eik lipa, kathaot rambah. Hùng pakacah hu tame khoa Công tác xã hội, sang bac Cao đẳng Sư phạm Đắc Lắc. Langiu tukvak bac di sang bac, Hùng nao ngak pah piah duah jien bac da-a. 2 thun hamiet Hùng mek hu angan lac sinh viên xuất sắc, hu pok ngak bí thư chi đoàn saong lac akaok Đội tình nguyện xã hội di sang bac Cao đẳng Sư phạm Đắc Lắc.

       Di palei, Hùng jeng lac sa urang hadah krah di bruk Đoàn saong bruk  thanh thiếu nhi di xã Ea Kly, huyện Krông Pách. Thun 2011, Hùng hu ba tame Đảng tuk umo barau 21 thun. Nông Thanh Hùng khan lac : tuk daok bac dalam sang bac, drei caong ngak siam dom bruk bo Đoàn sang bac jao brei. Daok mai palei ye caong bruk bac da-a di drei ba tabiak ngak tuihu. Kayua dahlak mboh bruk Đoàn di palei jeng daok rilo bruk ”.

      Daok H'Phi La Niê (bangsa Ê Đê, sinh viên khoa Y Dược, sang bac Đại học Tây Nguyên), caong khin jeng bác sĩ hu pachreih adei kham merat bac megru biak siam. Menek tabiak dalam sang hu ame lac công nhân cao su, amaik ngak y tá di trạm y tế xã, 3 adei saai jeng daok dalam umo thun nao bac, nan ye meng sit H'Phi La hu pasramam tính tự lập saoing tuk halei jeng thau kham merat bac megru. H'Phi La thau lac bruk drei pilih ruah pambuak tal tính mạng saong pren yava anek menuac yau nan ye bruk bac megru siam tuk halei jeng lac  bruk praong. Taphia di nan, H'Phi La daok hu mbaok tame bruk Đoàn, Hội kayua  Khoa peih ngak. 2 học kỳ meng blaoh, H Phi La jeng hu dak tame loại giỏi, lac sa sinh viên hadah krah di tal bac Y K15, sang bac Đại học Tây Nguyên.

       Nông Thanh Hùng saong H Phi La Niê lac dua dalam labaih 3.000 sinh viên bangsa takik di tỉnh Đắc Lắc daok bac megru di dom sang bac đại học, cao đẳng dalam taneh ia. Thun bac meng blaoh, dalam tỉnh hu 115 sinh viên joi saong xuất sắc. Rilo sinh viên abih hatai hu mbaok tame dom bruk Đoàn, Hội di dom pakat, rik daong pren drei patagok bruk. Saai Y Nhuân Byă, Bí thư Tỉnh Đoàn Đắc Lắc brei thau, lac labik ieu pataom dam dara, tukvak tapa, Đoàn dam dara saong kapul liên hiệp dam dara tỉnh Đắc Lắc hu rilo bruk daong dam dara, sinh viên bangsa takik piah daong dom adei sahanang hatai bac megru saong kham merat yam tagok dalam raidiuk :"Đoàn hu biai saong urang dang akaok  tỉnh piah sangka, nao gam saong sinh viên urang bangsa takik. Bruk ka sa lac mesraiy jien piah nao bac, ka dua lac yaok thun taom gaok sinh viên saong pachreih ba dom adei. Ka  3 lac Ban thường vụ tỉnh Đoàn alin dom paok jien bac daong dom adei sang kan kandah piah sahanang hatai bac megru. Tapa nan, rik daong nao gam saong dom adei dalam bac megru, bruk ngak"./. 

Thúy Linh