Đắc Lắc - Kein laba meng mo hinh kalup kapul oh menek anek ka klau

    Padang tagok meng thun 2008, kalup kapul oh menek anek ka klau palei  Kiến Xương, xã Buôn Triết, huyện Lắc akaok mereip tok hu 12 urang. Yaok 3 bilan sa mbang, mBan chủ nhiệm kalup kapul peih bruk taom gaok ngan saong rilo kadha ye : tacei jalan, pathau khan ka pasang iek pren yava menek - Kế hoạch hóa gia đình; pathau khan hukum likei kumei samu gauk; pacang caga taong paoh gauk dalam sang; dak apdang sang trei sir, sumu gauk, haniem phuan; ginum biai tui kadha hu urang sangka. Tapa dom mbang taom gaok, urang hu khan brei thau, hu daong gauk langyah dom tavak tavaiy bhian gaok dalam radiuk, alamu raong pato anek, patagok  kinh tế. Meng di nan daong ka dom adei saai kumei hu rilo ilamu pasang iek ka sang; urang likei thau hu bruk di urang pasang dalam pacang caga taong paoh gauk dalam sang, thau klah rabha haong diuk dalam bruk Kế hoạch hóa gia đình. Amuk Trần Thị Thơm, chủ nhiệm kalup kapul oh menek anek ka 3 palei Kiến Xương lac :“Meng harei tame kalup kapul tak urak ini, kol dahlak mboh dom adei saai jeng pachreih ba gauk, daong gauk gah tinh thần saong kinh tế, dom adei saai jeng padheih di 2 urang anek, likei atau kumei jeng hu, piah raong pato ka siam saong pasang iek patagok kinh ye, yau nan ye, diuk pasang jeng bui sambai abih.

     Taphia dom var taom gaok định kỳ di kalup kapul, Ban chủ nhiệm gam saong urang pambuak bruk dân số saong kapul urang kumei daok caik tukvak nao tal yaok sang piah pathau khan, jak ba adei saai. Mboh hu kein laba bo kalup kapul ba mai, dak harei dak hu rilo diuk pasang pataom tame. Urak ini, kalup kapul oh menek anek ka 3 palei Kiến Xương hu 28 hội viên chính thức saong labaih 80 hội viên pataom tame. Gam saong bruk taom gaok định kỳ, dom urang dalam kalup kapul daok rik jien ngak quỹ, daong ka dom urang kan kandah mesray piah raong glang, pala drak.

        Sang saai Nguyễn Thị Hiền daok di palei Kiến Xương, xã Buôn Triết, huyện Lắc tame kalup kapul oh menek anek ka 3 meng tuk  barau dak padang. Saai  Hiền hu dua urang anek likei, anek praong thun ini pakacah tame đại học, daok anek sit caga tame tan bac 11, dua adei jeng ngoan ngoãn saong bac daa khá. Meng 8 sào cà phê saong 2 ha padai ia, raong pabui, menuk, yaok thun sang saai mek jien tame hu labaih 200 triệu đồng. Saai Nguyễn Thị Hiền lac :“Meng tuk tame kalup kapul adei saai jeng pathau khan lac oh menek anek ka 3 piah khik pren yava, gam raong pato anek siam, kinh tế cakrok. Tame kalup kapul jeng hu kein laba ka adei saai, adei saai jeng rik daong hu hasit tame kadung jien piah brei ka dom adei saai halei kan kandah jang mesraiy piah patagok kinh te. Yau sang kol dahlak urak ini mboh kinh te jeng patagok saong dom urang anek jeng hu bac da-a”

      Tỉnh Đắc Lắc urak ini hu labaih 1.000 kalup kapul oh menek anek ka 3 di dom khu dân cư xã, phường, ban sit ngan saong jaik 35.000 hội viên. Bruk ngak di dom kalup kapul hu pambuak pagam saong dom bruk dân số saong kapul urang kumei, yau nan ye, dalam tuk taom gaok, dom urang ngak bruk dân số saong chủ nhiệm kalup kapul hu pambuak bruk khang kajap, kein laba. Ông Mai Văn Phán, Phó chi cục trưởng Chi cục dân số kế hoạch hóa gia đình tỉnh Đắc Lắc brei thau ,“Kol dahlak hu urang pambuak bruk dân số di dom puk, palei saong khu dân cư, langiu di nan,  di taong abih 184 xã phường jeng hu urang iek gah pambuak bruk. Di pakat huyện urak ini jeng hu dom pasak kế hoạch hóa gia đình. Yau nan ye, bruk pambuak gauk di dom mban ngành kapul nyaom di dom puk aplei ye kol dahlak lac pasak piah peih ngak siam mô hình ini. Nan ye bruk ngak di kol dahlak tuk halei jeng hu khik ramik saong tuk halei jeng salih bahrau ka nyu lagaih saong yaok tukvak, njauk saong bruk di urak ini.

       Bruk ngak siam, kein laba di dom kalup kapul oh menek anek ka 3 di Đắc Lắc brei mboh cambaih tapa bruk trun menek, abih di nyu nan lac tỷ lệ ndih tapui anek ka klau. Thun 2012, dalam tỉnh hu 16,5% sang menek anek ka klau, tal thun 2015, bruk ini daok 13,9%. Di rilo puk palei di dom huyện yau ye : Lắc, Krông Pách, M’Đrắc, ban sit Buôn Hồ rilo thun oh hu urang halei menek anek ka 3 tagok. Meng rilo bruk ngak siam, dom kalup kapul oh menek anek ka 3 di Đắc Lắc hu rik daong ngak siam bruk dân số kế hoạch hóa gia đình, paglaong chất lượng dân số di puk palei .

Thúy Linh