Dom harei jaik tết nguyên đán anek sak menuk 2017, dalam baoh sang 90m2 barau ngak di diuk pasang saai Hoàng Trung Hiến, (bangsa Tày) daok di palei 12, xã Tân Hòa, huyện taphia negar Bôn Đôn bak bui sambai. Saai Hiến brei thau, tok diuk hu jaik 16 thun min tết thun ini lac tết bui sambai di abih, njauk hadar di abih.

Jaik 3 bilan dahlau, diuk pasang sa-ai daok daok dalam baoh sang taik tahak oh ka tal 20m2, daning bruk, tabung ton haluh. Mboh kan kandah yau nan, bilan 9 thun 2016, liên đoàn lao động huyện Buôn Đôn daong ka sa-ai 50 triệu đồng meng danak dak "Mái ấm công đoàn" piah ngak sang. Meng  jien daong ini, gam saong jien patak pataom hu, saai ngak hu sang khang kajap. Saai Hiến bui sambai khan lac: “Dom thun dahlau, daok dalam sang kayau klak taik tahak, daning haluh, nền haluk nan ye biak kan kandah. Barau ini, hu dom pakat công đoàn sangka, daong ngak brei baoh sang barau khang kajap ini, thun ini rok tết dalam sang barau ini mboh biak hanem phon, ginup abih saong bui sambai rilo jang”.

Jeng hu daong 30 triệu đồng meng danak dak “Mái ấm công đoàn” di Liên đoàn Lao động huyện Bôn Đôn, sang saai Lê Thị Bích Phượng daok di palei 15, xã Tân Hòa hu padang ngak sang khang kajap, praong labaih 70m2. Saai Phượng brei thau, tok pasang hu labaih 7 thun, pasang oh hu bruk ngak tani tanat, jien bilan công chức di saai oh ginup ka 4 cambuai mbang. Piah hu jien tame, saai nao ngak tạp vụ langiu tukvak ka jabat piah kuhria ka rai diuk. Raong dua anek sit mbang bac lac kan kandah, glaih glar, nan ye oh khin saneng tal bruk padang ngak sang. Saai Phượng lac: “Dahlau daih, dua diuk pasang ngak tok ginup raong dom anek min, oh khin saneng hu sa baoh sang yau ini. Kayua hu bruk sangka di công đoàn khối Đảng saong kapul nyaom hu daong brei 30 triệu đồng rik tame padang ngak sang yau ini. Tết thun ini, hu sang barau, hu mbang tết bui sambai, oh daok duh hatai tra, sanang hatai ngak bruk”.

Urak ini, Liên đoàn Lao động huyện Bôn Đôn, tỉnh Đắk Lắk hu 53 công đoàn cơ sở, ngan saong jaik 2.000 công nhân viên chức lao động, baoh sang kan kathaot oh hu sang daok di huyện meblah jaik 8%. Tui taong yaom di Liên đoàn Lao động tỉnh Đắk Lắk, Bôn Đôn lac huyện nao dahlau dalam bruk jak na rik daong kadung jien “mái ấm công đoàn” hu labaih 5,2 tỷ đồng piah padang ngak barau jaik 150 baoh sang ka labaih 150 urang đoàn tani tanat rai diuk piah sanang hatai ngak bruk. Amuk Mai Lin, phaok akaok Liên đoàn Lao động huyện Bôn Đôn brei thau: danak dak “Mái ấm công đoàn” lac danak dak hu makna, bak hatai anit ranam, daong ka urang jakar viên chức lao động kan kandah ka sang daok hu labik daok tani tanat piah sahanang hatai ngak mbang, duah jien./.