Bruk dut iek mau hu peih di rilo labik 

Dah page harei 16/7, Mintri Y tế hu peih online haong 130 labik dalam negar piah iek veik bruk ngak blaoh saong brei bruk anak tal ka pacang caga jit Covid-19. Tui kuhria mboh, mbang jit ni dui atah jang dut saong dom mbang jit dahlau, ngak kan kandah biak praong, biak trak damak tal kinh tế-xã hội, abih di nyu nan lac dom tinh, bal gah maraong negar. Mintri Y te hu caga ginup oxy ka bruk mayah manuac njom glaong jang. Tal urak ni Việt Nam ginum biai hu labaih 170 triệu mbang vaccine caga Covid-19. Min, kayua vaccine di dunya daok kurang, nan ye di anak mata, Mintri Y te brei parabha dahlau vaccine ka dom tinh, bal hu jit, dom labik dang akaok cak rok patagok kinh tế-xã hội piah khik tani tanat 2 bruk lac gam pacang caga jit gam cak rok patagok kinh tế.

Kuhria tal urak ni, ban raya HCM hu  1.837 urang njom ruak di dom doanh nghiệp dalam labik ngak cong, khu chế xuất dalam ban. Tui mban khik iek dom labik ngak cong - Khu chế xuất ban raya, dom urang njom meng di tuk  peih ngak sarak 16 daok takik veik, tui kuhria labaih 40 urang yaok harei. UBND ban raya hu panuac ieu dom  doanh nghiệp tok hu ngak bruk meyah hu labik ka urang ngak mbang huak, ndih daok, ngak bruk pak di labik. Dom doanh nghiệp oh pabak hu dom bruk ni brei padeih ngak meng  harei 15/7. Sở Y tế hu jao pambuak bruk hong dom jabat pagam tal samar pasang iek, taong yaom doanh nghiệp khik kajap bruk nan song brei dut iek ka urang ngak yaok 7 harei sa mbang.

UBND tỉnh Ninh Thuận brei pa-atah di gauk dalam 14 harei tui Sarak 16 di ban sit Phan Rang - Tháp Chàm haong huyện Ninh Phước meng maong 12 melam ni (17/7). Dalam 2 adit paatah di gauk, tỉnh pataom prein tame piah cakak klaoh jalan njom mbak piah jhul kadun likuk jit ruak Covid-19. Tỉnh pato tacei Sở Công thương njauk samar drah rami ramik, parabha pandap mbang menyum yaok harei ka bhap bini bhum brei paatah di gauk, plaih bruk tagok yaom pandap panda. 

UBND tỉnh Sóc Trăng brei thau, dalam tỉnh brei pa-atah di gauk tui sarak 15 meng kreih melam 18/7. Dom harei tapa, Sóc Trăng hu rilo urang njom Covid-19 dalam bhap bini, njom mbak meng gah langui tame tỉnh. Urak ni, jit ruak daok rah tabiak srau kadau, dom urang njom dak harei dak tagok, tui kuhria mboh dahlau, dalam tuk vak anak tal  jit Covid-19 meda njom mbak samar dalam bhap bini. Tỉnh dok pataom tame duah labik pambak, pacang veik, song khang hatai pacang cakak jit  .

Công an TP.HCM brei thau lac cap mek hu Nguyễn Kim An ( umo 26 thun, daok di tỉnh Bình Thuận). Dahlau di nan, urang ni njauk tòa kaoh tử hình ka duas pametai manuac, blah mek drap ar min nduac tabiak truh sang guk Chí Hòa di harei 13/7, medil lac njom Covid-19. Gah cảnh sát pasang iek Công an TP.HCM hu tabiak sarak langyah tui hukum ngan haong bị can Nguyễn Kim An piah pasang iek duas “dauk tabiak truh sang guk”. 

Dalam tuk dom menuac njom Covid-19 tagok glong, Thủ tướng Hàn Quốc Kim Bu-kiêng (Kim Boo-kyum) hu panuac ieu karja dom labik dalam ban, tabiak bruk patakik menuac pataom gauk, brei takik jang 4 urang, kuhria gam labik gah lingiu ban. Panuac ini hu ba tabiak hadei di tuk Hàn Quốc tabiak adat pacang veik menieng ban ine Sơ-un, min dom menuac njom jeng dok tagok samar. Mbang tamuh jit ruak bahrau di abih meda pacang jalan pasiam veik di kinh tế Hàn Quốc. Negar ni pacang jit hu  siam mbiah tal tuk hu biến thể Delta.

Bruk taong praong bo Taliban daok peih tabiak di grauk bhum taneh Áp-ga-nít-xtan nyu ngak brei 13 triệu menuac di negar ni oh daok pandar hu dom bruk dân sự. Bruk taong tame di Taliban ngak brei palai tayah 260 labik dân sự di 28 tỉnh dalam negar. Rajaei Áp-ga-nít-xtan brei thau Taliban ndok palao 7.000 urang guk piah salih mek hiệp định padeih mesruh dui atah 3 bilan.

Rajaei Lào song dom cổ đông di sang mac thủy điện Nam Theun 2 njauk gauk brei padang sang mac điện ia harei pambuak gauk Nam Theun 2 hu pren khang tagok tal 240MW. Hu padang ngak di angaok mbaok ia praong labaih 3,2km2 di binek thủy điện Nam Theun 2, Ni lac danak dak điện ia harei pambuak gauk prong abih di dunya, tui kuhria hu ba tame pandar di thun 2024. Bruk pambuak meng điện ia harei hong điện di sang mac Nam Theun 2 piah patak pataom ia ka bilan thu./.

Urang lang: Thu Thảo- Hanipha- 17/7