Urang jakar nao pasang iek tal dom boh sang di dom tỉnh ban

Hadei di jaik 5 harei ngak bruk dalam kham merat abih drei, mesup 18/12, Nyaom biai mbang ka 14 MBan CHTW hu ngak salah dom asal kadha hu danak dak ba tabiak. Nyaom biai pataom tame ginum biai, brei panuac saong jauk gauk rilo haong dom asal kadha di dự thảo bo Bộ Chính trị ba tabiak, langyah, pasiam mbang puac abih saong ngak salah bruk kuhria caga dom harak gar pok tagok nyaom roya mbang 13 di Đảng.MBan CHTW hu ginum biai biak siam, biak tantu cambaih laih, plaik phiếu brei tapa bruk pilih ruah menuac ka Bộ Chính trị, Ban Bí thư mbang 13.

Dah page harei 18/12, di Hà Nội, Tổng cục yaok pataom, Mintri Kế hoạch Đầu tư brei thau ka bruk roh duah yaok pataom rahra saong sang danaok di thun 2019. Tui lambaok gah menuac sia Liên hợp quốc, bruk manek di Việt Nam tani tanat di tanut ala tanut salih bahrau, brei mboh bruk pasang iek samar chip di rajaei Việt Nam dalam bruk salih jalan meng manuac sia saong bruk ndih tapui anek tui sarak kanja saong patagok.Jeng tui roh duah ni, mayah dom anek kamar likei haong kumei tuk ndih tapui jeng daok khik tamo yau urak ni, urang likei umo meng 15 - 49 meda labaih 1 triệu 500 rabau urang dut saong dom urang kumei umo thun yau nan di thun 2034.

Di nyaom biai ka bruk ieu pataom jien padai prein yava buh tame ka danak dak pabak điện ka palei pala, bhum ceik, tasik pulao vaktu 2021-2025 kayua Mintri Công Thương pambuak haong Gilang pariak dunya (WB) di Việt Nam peih tabiak di harei 18/12 brei mboh, piah tal thun 2025 jaik abih dom sang bhap bini di palei pala hu điện, brei hu jien padai prein yava biak praong. Lingiu jien mesraiy 25 rabau tỷ đồng, brei hu bruk pambuak gauk meng dom mintri, dom gah, dom tỉnh ban saong brei ngak tui dom ilamu bahrau. Mintri Công Thương daok padang ngak dom danak dak ieu pataom dom phun jien dunya, yaom abih tih labaih 900 triệu USD.

Rilo bilan tapa, bhap bini daok di bhum tapen tasik yau ye ban sit Vĩnh Châu, huyện Trần Đề… tỉnh Sóc Trăng biak randap haong sap loa di Bộ đội Biên phòng tỉnh. Tapa nan, dom sarak di rajaei,Ủy ban bhap bini tỉnh saong dom harak gar hu pambuak tal bruk pacang caga jit Covid-19, atau panuac kakei ka bruk mbuan njom mbak ruak hu tal mikva dom labik.Di dom bhum hu rilo mikva bangsa, loa biên phòng gam papar sap yuan gam papar sap Khmer, daong ka bhap bini mbuan thau, piah paglaong akaok sahneng, ba gauk tame pacang caga jit hu siam lagaih.

Kapul pasang iek glai nao mai saong pacang khuah padam khuah glai - Chi cục pasang iek glai Bình Dương hu mboh, cap khik 1 drei kara dalam tapon kara kaik menuac, blah mek pandap mbang di phường Tân Định, ban sit Bến Cát.Tapa duah thau,drei kara nan mbaok meriah bhhong, lac kara tano, trak 4kg; lac janih quý hiếm mbuan lahik abih di nhóm 2B. Urak ini drei kara nan hu ba mai Chi cục pasang iek glai Bình Dương piah raong, piah tui iek.

Dom bruk “amip mbang gilo akaok” hu pathau khan di grauk labik gah maraong negar Mỹ daok njaom mbak tagok gah barak tapa jalan ba ia taba, sa bruk biak huac kanda ka gah y tế daok mesuh haong jit praong Covid-19.Janih amip mbang gilo akaok đơn bào hu angan Naegleria fowleri ba tal ruak njom laka gilo akaok biak trak saong bhian metai. Dalam yaok bruk, ia njom nerak nao tagok idhung, njom tagok tal gilo di urang ruak tapa dom talei drak di idhung.

Rajaei Japon bahrau brei tapa bruk jhul patagok điện ngin tasik piah ba năng lượng ini jeng điện pandar di taneh ia ini anak tal. Japon daok caong lac, dahlau di thun 2030, điện meng ngin tasik meda mek hu 100 triệu kW, dahlau di thun 2040 hu meng 300 triệu tal 400 triệu kW – samu haong prein ngak di 30 sang mac nhiệt điện praong.Piah dui pachreih urang buh jien tame ngak, rajaei Japon daok hu kuhria jao quyền pandar độc quyền labik mek ngin tasik tagok tal 30 thun.

Australia hu panuac ieu Gah pablei salih dunya (WTO) pasang iek duah thau dom yaom je 80% bo Trung Quốc ba tabiak kak dom pandap lúa mạch di negar ni.Australia urak ni lac gah pabak lúa mạch praong abih ka Trung Quốc,meng labaih 800 triệu tal 1 tỷ 3 rituh trieu USD yaok thun,meblah labaih sa mateh dom lúa mạch pablei tabiak negar langiu di Australia./.

Urang lang : Mousaphuong-Thu Thảo- 19/12- 19:00:00