Dom urang lin tasik samar ba gaiy kapan tabiak tasik dong duah 

MBan Agama Rajaei pambuak bruk haong UBND tỉnh Vĩnh Long bahrau peih bruk alin hadiah 456 hala dok taneh ia brei ka dom labik ngak adat di agama saong 15 hala dok brei ka lambaok Giáo hội Phật giáo Nam tông Khmer dom tỉnh, ban dalam bhum Nam Bộ. Tuk peih bruk alin hadian nan di biar harei 17/12, Phaok akaok UB bhap bini tỉnh Vĩnh Long Nguyễn Thị Quyên Thanh hu panuac lac: “Tual hala dok taneh ia pahadar kol drei bruk khik caga hala dok nan, brei mboh bruk jum pataom, sa hatung hatian haong taneh ia, haong bangsa”.

Dah page ni (18/12), Ủy ban bhap bini huyện pulao Phú Quý, tỉnh Bình Thuận brei thau lac duah mboh 12 urang gaok bala di gilai Panama, dalam nan hu 1 urang metai. Urak ni dom urang nan daok hu iek glang di mangaok gilai di Cảnh sát tasik dahlau di tuk ba tame pulao Phú Quý saong peih dom jalan pacang caga jit Covid-19. Bruk duah dom urang daok veik di gilai daok hu rah tabiak dalam sami samar.

UBND tỉnh Thừa Thiên Huế bahrau peih bruk pataom mbaok dom gah pambuak tal, ginum biai jalan ngak mbang ka 4 duah 11 urang lahik daok veik di thủy điện Rào Trăng 3. Dua bruk praong lac ngak salah bruk padang binek pacang di Cty CP Thủy điện Rào Trăng 3 saong peih bruk duah di labik kraong Rào Trăng, atah jaik 2,5km. Tui Bộ chỉ huy Quân sự tỉnh Thừa Thiên - Huế, labik glut jaleih daok hu hajan praong, tui kuhria meda dui atah tal bih thun ini nan ye oh ka peih bruk duah hu.

Tui pathau khan di Viện Pasteur ban raya HCM, huyện An Phú, tỉnh An Giang hu 2 urang dương tính haong ruak Chikungunya, daok di ấp Tân Khánh, ban sit Long Bình. Palei daok pataom tame langyah biak catang dom sruh jit, peih bruk puh ramik sang danaok, labik daok, pametai lăng quăng, pruh jru pametai jamaok … Taeng di palei Tân Khánh (ban sit Long Bình), labik hu 2 urang dương tính haong ruak Chikungunya, jabat jaka pataom tame pasang iek dom urang ruak mboh pandiak drieh yau ruak pandiak tabiak darak. Ruak Chikungunya kayua jamaok Aedes Aegypty ba ruak, bhian mboh dahlam rup lac pandiak, pandik talang, pandiak akaok, ndaik baoh…

CA tỉnh Bình Dương daok khik 4 urang lac: Phan Thị Kiều Vân, Trịnh Thanh Tâm, Trần Hữu Thành (palei daok di Cần Thơ) saong Đoàn Văn Huy (palei daok di An Giang) piah duah thau ka bruk pachot mek drap ar saong ngak ja tara di jabat karja. Kapul ini khan lac, meng bilan 9/2020 ngak ja 19 sổ đỏ. Hadei di nan ieu pablei taneh yaom lap, ieu urang caik jien cọc blaoh blah mek. Abih tih kol nyu pachot hu 13 urang blei taneh, meblah mek hu jaik 13 tỷ đồng.

Harei 17/12, Điện Élysée brei thau, Tổng thống Pháp Emmanuel Macron tapa dut iek mboh njom SARS-CoV-2, eng drei daok karei dalam 7 harei.Tổng thống ngak bruk saong pato tacei bruk ngak meng atah.Tui báo chí Pháp, prein yava di Tổng thống Emmanuel Macron jeng daok tani tanat.Rilo urang dang akaok dom negar dalam Liên minh châu Âu jeng njauk daok karei saong peih bruk dut iek hadei di tuk taom gaok ong Macron di mbang ginum biai pakat glaong di EU bahrau ini.

Gah khik iek bruk pajeng ba meng jalan kapal haoh Canada taduan brei salih dom labik di kapal haoh Boeing 737 MAX saong meda klaak bruk oh brei par janih kapal haoh ini di bilan 1/2021. Yaom lac yau nan, min Canada hu panuac ieu dom urang peih kapal haoh hu mbaok tame dom mbang pasram iek dom sruh  Boeing 737 Max hu pasiam veik saong pabak dom adat hukum pambuak tal bilik peih kapal haoh Boeing 737 Max pakauk oh brei par di dunya meng thun blaoh hadei di 2 mbang laik trun ngak brei yaok ratuh menuac metai. Boeing 737 Max hu brei adat par veik di Mỹ meng bilan dahlau

Harei kabroi (17/12) kapul an ninh Nigeria brei thau hu daong ba tabiak yaok ritu anek saih njauk phiến quân cap khik. 344 adei njauk cap khik di dalam gilai hu daong ba tabiak,min oh thau cambaih taong abih anek saih njauk cap khik hu duah mboh. Dom adei meda hhu pasang iek y tế dahlau di tuk mai veik sang di harei ni (18/12).Dahlau di nan, harei 11/12,dom urang par phao nduac tame sang bac trung học di quận Kankara,bang Katsina.Hadei di tuk mesuk khang haong gah an ninh,jaik 400 anek saih lahik nao.Hadei di tuk rahtabiak bruk nan,taong abih tih dom sang bac phổ thông di bang Katsina njauk kareih pambang./.

Urang lang: Thu Thảo -Mousaphuong -18/12