Thủ tướng Nguyễn Xuân Phúc mai rivang boh sang hu rai duik kan kandah kayua ribuk ka 9 di dom tỉnh Quảng Ngãi song Quảng Nam

Dah page ni (2/11), mbang nyaom ka 10 Quốc hội mbang 14 yam tame mbang nyaom biai ka 2 di Hà Nội. Sa asal kadha njauk caik hatai lac Quốc hội ginum biai di hội trường ka kinh tế-xã hội, kadung jien kanja, đầu tư công, jien padai negar, rami ramik veik gah kinh tế, dom danak dak bruk ngak negar. Dahlau nan, di mbang sa, rilo urang quốc hội hu payua panuac klah rabha tal mikva bhum krieh negar – lac labik njauk kan kandah kayua ribuk hajan ia sua dalam tukvak bahrau blaoh. Gam tui di nan hu pandar maong iek ni lac bruk ngak hu makna praong piah ginum biai duah jalan langyah taong abih dalam harak pathau khan gah kinh tế-xã hội tukvak anak tal.

Harei 1/11, Thủ tướng Nguyễn Xuân Phúc mai rivang song brei pandap ka dom boh sang hu rai duik kan kandah, njauk khat lahik trak kayua ribuk ka 9 di dom tỉnh Quảng Ngãi song Quảng Nam. Thủ tướng hu panuac ieu dom tỉnh ban ba bruk daong meng trung ương, meng dom kadung jien dong piah dong ka bhap bini samr tani tanat rai duik, oh caik ka bhap bini eik lipa, laik tame bruk oh hu labik dok hadei di ribuk. Thủ tướng hu brei pandap ka 30 boh sang di xã Tam Quang, huyện Núi Thành song dom boh sang hu sang jaleih abih kayua ribuk. Jeng di Quảng Nam, Thủ tướng hu nao rivang dom urang njauk rambuac kayua ribuk ka 9 dok iek ruak di sang iek ruak Đa khoa tỉnh.

Dah page ni (2/11), ribuk Goni tame tasik biển Đông khang pakat 9, trun 8 pakat hadei di tuk tuh tame gah krieh negar Philippines. Pasak kuhria mhoh dahlau bruk langik tasik pakat negar brei thau: dom harei anak tal ribuk oh salih jalan, min trun prein khang, nao tame mbaok haluh di dom tỉnh meng Đà Nẵng tal Phú Yên saong trun biar jeng áp thấp nhiệt đới khang. Mban pato tacei pakat negar pacang caga bala langik tasik hu harak ieu kakei dom tỉnh tui iek catang ribuk Goni. Khan brei kapal gilai thau, piah caga pacang plaik; dom kapul halain hatain daok caga gilai, radaih piah daong duah urang gaok bala.

Sở pato megru TPHCM tabiak harak brei ka jiak 2.000 anek saih sang bac THPT Bình Phú padeih bac harei 2-3/11 piah pasiam veik tabung sang bac njauk jaleih . Mesup ni, Sở hu ginum biai song sang bac song Ub bhap bini quận 6 piah ka jalan pasiam veik bruk jaleih di sang bac THPT Bình Phú. Anek saih tal 12 hu nao bac veik meng harei 4/11, dalam tuk tal 10 song 11 hu bac plaik gauk atau online. Dahlau di nan, melam 31/10, ngin rabuk nyu dui jaleih abih tabung 15 balik bac di sang bac . Sang bac THPT Bình Phú hu padang atah di ni 20 thun, dalam nan hu 36 balik bac song balik chức năng, urak ni hu 1.991 anek saih.

Dah page ni (2/11), Việt Nam oh hu urang halei njom bahrau Covid-19. Dalam negar hu 60 harei oh hu urang halei njom ruak dalam rahra; abih tih dom manuac njom Covid-19 lac 1.180, dalam nan hu 691 urang njom Covid-19 kayua njom mbak dalam negar. Dalam sa adit tapa, Việt Nam hu 12 urang njom Covid-19 bahrau jeng lac dom urang tame negar.

Angaok blah tuýt-tơ di drei, Urang dang akaok Gah Y tế dunya (WHO) Tedros Adhanom Ghebreyesus brei thau, ong hu taom gaok 1 urang dut iek mboh dương tính song Covid-19 song brei dok karei dalam dom harei anak tal. Min, ong ndom lac mboh pren yava khang kadang song oh mboh hagait brei thau lac njom Covid-19 . Dalam tuk nan, Mintri Y tế Bra-xin brei thau, Akaok mintri hu pasang iek mboh njom Covid-19 song hu tabiak truh sang iek ruak hadei di 2 harei iek ruak. Ong Pa-ru-ên-nô lac sa dalam rilo urang dalam rajaei Bra-xin njom Covid-19.

Harei kabroi, mbang par camriep pajeng tui 400 urang Islam meng Pakistan saong Indonesia hu par trun Arập Xê-út. Nan lac dom urang Islam di negar langiu camriep hu Arập Xê-út brei ngak haji Umrah hadei di rilo bilan pakauk kayua bruk njom mbak di jit praong Covid-19. Tui dom dat bahrau di Arập Xê-út, urang islam di negar langiu umur meng 18 tal 50 meng hu adat brei nao ngak haji Um-ra saong yaok harei tok brei adat 20.000 menuac.

Pathau khan bahrau abih di rajaei Philíppin brei thau, tal urak ni hu takik di abih 10 urang metai song 3 urang karei lahik tuk ribuk Goni, hu mong lac khang abih di dunya dalam thun ni, tuh tame palao Lu-dông. Labaih 300 boh sang njauk lam dalam gluh baok song patau randiak di tỉnh Albay; dom palei di Bicol dauk dalam ia tuk ia krong tagok glong, palai tayah ar pacang. Di tỉnh Quezon, 10 ban sit lahik điện kayua phun kayau jaleih. Labaih 390.000 urang Philíppin njauk ba nao labik karei tuk ribuk tuh tame. Hadei di mbang ribuk Gô-ni, sa ribuk nhiệt đới karei hu angan Atsani dok tame negar ni song meda khang tagok./.

Urang lang: Hani Pha – Thu Thảo – 02/11 10:25:21