Ban raya bre yah klak rilo labik paatah di gauk 

Harei ini 22/2/2021,UBTVQH mbang XIV peih mbang nyaom ka 53 di ban ine Hà Nội.Akaok QH Nguyễn Thị Kim Ngân brei panuac peih mbang nyaom saong dom Phaok akaok QH salih gauk pan akaok mbang nyaom.Sa asal kadha praong di mbang nyaom ini, lac UBTVQH brei panuac ramik veik bruk hu hadom urang hu tabiak mbaok piah pilih ruah tame ka QH mbang 15.

Dah page ni 22-2, di xã Hoàng Động, huyện Thủy Nguyên, ban Hải Phòng hu mboh sa urang kumei daok ngak bruk di sang iek ruak jalan mbak pajeng ba Hải Phòng dương tính haong SARS-CoV2. Jabat jaka hu pacang cakak dom labik ni. Anak bruk sarau kadhau di jit ruak COVID-19, bhap bini njauk paglaong hatai saneng pacang caga jit ruak, ngak siam tui 5 kadha di gah y tế ba tabiak, lac: cuk pataik pacang pabah – pametai anek ruak – daok patah di gauk – oh pataom rilo manuac saong pathau khan y tế. Bhap bini tuk mboh dalam rup medil lac njom ruak yau ye pandiak, kan suak yava njauk halain hatain daok karei saong ieu phone pathau khan haong jabat y tế jaik di abih piah hu pato tacei.

Melam 21/2, Pasak pasang iek ruak kik TP.HCM (ieu katut lac HCDC) brei thau lac hu gac 4 labik di quận Gò Vấp haong Bình Tân hu talaih klaak bruk pacang cakak. HCDC tabiak panuac brei thau, menuac meng Quảng Ninh mai tal  TP.HCM oh daok brei pataom di labik praong piah pa-atah, bo brei daok pa-atah di sang 14 harei atau eng drei tui iek prein yava kayua tỉnh ini oh daok brei pa-atah di gauk. Gam haong nan, urak ini tok daok 3 tỉnh hu urang ruak dalam vaktu pasang iek di ban raya nan lac Hà Nội, Quảng Ninh haong Gia Lai. 8 tỉnh bahrau hu ba  tabiak truh harak angan ini, lac Bắc Giang, Bắc Ninh, Điện Biên, Hà Giang, Hòa Bình, Hưng Yên, Hải Phòng haong Bình Dương.

Dah page ni 22-2, di xã Hoàng Động, huyện Thủy Nguyên, ban Hải Phòng hu mboh sa urang kumei daok ngak bruk di sang iek ruak jalan mbak pajeng ba Hải Phòng dương tính haong SARS-CoV2. Jabat jaka hu pacang cakak dom labik ni. Anak bruk sarau kadhau di jit ruak COVID-19, bhap bini njauk paglaong hatai saneng pacang caga jit ruak, ngak siam tui 5 kadha di gah y tế ba tabiak, lac: cuk pataik pacang pabah – pametai anek ruak – daok patah di gauk – oh pataom rilo manuac saong pathau khan y tế. Bhap bini tuk mboh dalam rup medil lac njom ruak yau ye pandiak, kan suak yava njauk halain hatain daok karei saong ieu phone pathau khan haong jabat y tế jaik di abih piah hu pato tacei.

Harei 21/2, Hoa hậu H’Hen Nie haong 100 dam dara huyện Phú Quý, tỉnh Bình Thuận ba gauk tame puh ramik di labik ravang me-in Vịnh Triều Dương, piah pachreih tui bruk khik caga hacih sa-at langik tasik huyện pulao. Hoa hậu Việt Nam 2017 H’Hen Nie brei thau: anai tuk halei jeng sangka tal bruk alam môi trường saong pachreih rup drei ngak bruk hagait hu kein ka menuac sia, anai bui sambai lo tuk hu nao gam haong dom urang đoàn, dam dara huyện Phú Quý. Bruk abih drei saong hatai siam di anai ngak brei pambak praong bruk ba gauk tame ngak hacih tasik, khik caga alam môi trường.

Mbang tamuh jit Ebola bahrau di Ghi-nê saong Công-gô daok rahtabiak dalam tuk châu Phi daok glaih glar pacang caga jit Covid-19. Pasak pacang caga jit ruak châu Phi brei thau meda ba tabiak kapul samar drak piah daong ka dom negar ni pacang cakak, gam tui di nan jeng ieu peih sa mbang ginum biai samar drak pakat bhum piah pacang caga jit njom pambak praong. Gah Y tế dunya dahlau di nan hu ba tabiak panuac kakei tal 6 negar châu Phi hu pambuak tal jit Ebola.

Thủ tướng Anh Boris Johnson harei ini 22/2 kuhria ba tabiak jalan ngak piah pacadu dom bruk pacang cakak dui atah labaih 3 bilan tapa di taneh ia ini, dalam tuk jit Covid-19 di negar Anh daok brei mboh lac pacang cakak hu. Urak ini, Anh jeng daok dang akaok dalam dom taneh ia di châu Âu dalam bruk klauk vắc-xin.Hu thau, hu jaik 17 triệu rahra Anh hu klauk vắc-xin camereip saong tui bruk ba tabiak, tal puac bilan 7/2021 taong abih rahra umo mangaok 18 thun di Anh, meyah khin ye hu klauk vắc-xin.

Tui báo New York Times, labaih 4 triệu bhap bini di tiểu bang Texas, Mỹ, daok dalam bruk oh hu điện dalam adit tapa tuk nhiệt độ trun biak biar.Labaih 165.000 urang di Texas kuhria tal harei 19-2 jeng oh hu điện, dalam tuk yaok triệu urang njauk cakak ia atau kurang ia manyum.Tổng thống Mỹ Joe Biden harei 20-2 hu brei tapa panuac pathau khan ka bala praong ngan haong Texas. Bruk ngak ni meda daong buh jien daong ka dom urang njauk gaok kan kandah kayua ribuk tuyết, jang yau dom bruk daong anak meta pambuak tal sang daok saong dom paok jien masraiy hu jien laba bier./.

Urang lang: Thu Thảo -Mousaphuong -22/2