Rilo urang lambaok ka dom gah mintri hu ba panuac tangi sua 

Dah page ni (26/1), Thủ tướng Nguyễn Xuân Phúc lambaok kapul dang akaok puac harak peih pakak nyaom roya pakat negar mbang ka XIII Đảng Cộng sản Việt Nam. Thủ tướng ndem lac: Nyaom roya XIII peih tabiak dalam tuk negar daok dang anak dom mbuan lagaih saong kan kandah pablak gauk. Urang jaka, urang đảng saong bhap bini caong maong saong caik hatai jia tame dom sarak di nyaom roya mbang ka XIII. Thủ tướng ndom lac nyaom roya XIII hu makna sajarah biak praong haong bhap bini, haong taneh ia, haong bangsa, oh njauk lac dalam 5 thun anak tal bo daok lac ka dom rai hadei.

Biar harei kabroi 25/1, Mentri Y tế brei thau hu sa urang birau ruak Covid-19. Urang ruak 1549 lac urang mai meng negar langiu, hu brei daok karei pak Hà Nội. Jaik 2 bilan tapa, Việt Nam oh hu thei njauk ruak bahrau dalam bhap bini. Tal tukvak ini, negar drei taong dhit ruak ka 1.425 urang ruak Covid-19. Meng bruk pacang caga siam jit ruak, Việt Nam urak ini dang dhi ka 174 dalam labaih 200 negar saong bhum taneh hu urang ruak Cobid-19.

7 đồn biên phòng daok rah tui jalan tapen negar di tỉnh Đắk Lắk hu pambuak bruk haong karja dom xã tapen negar peih bruk yaok pataom, pasang iek duah thau ka raidiuk di bhap bini, abih di nyu nan lac di dom xã biak kan kandah piah hu jalan daong samar drah, oh caik ka bhap bini eik lipa dalam tuk tết, tukvak daok cang yuak. Tui nan hu labaih 730 baoh sang njauk daong brak saong dom pandap mbang menyum yaok harei. Gam saong bruk nao rivang, alin hadaih pandap, Bộ đội biên phòng tỉnh Đăk Lăk hu jak ba dom gah piah peih ngak rilo danak dak, bruk ngak pamaong tal bhap bini bhum tapen negar.

Muyim Hồ Chí Minh - dhar Bình Thuận daok samar ramik ngak pasiam labik inem mek Dục Thanh. Băng rôn, halan dok “Uan Đảng – Uan thun bahrau” hu tuan tagok, piah ngak brei siam gheih birau. Anak tal Muyim hu parang tabiak rilo jang dom thaot binguk, harak gar ka raidiuk saong bruk ngak cách mạng di Chủ tịch Hồ Chí Minh, thaot binguk ngan saong kadha “Hadah hadai Bình Thuận”…Inem mek Dục Thanh hu ramik ngak pasiam piah hu labik siam abih ka bhap bini saong tuai damuai mai main,, rivang sirah Wa tuk Tet jaik mai tal.

Tui Chi cục pala drak saong khik caga phun pala tỉnh Hậu Giang, langik tasik jaik di ni biak lagaih ka bhap bini pala drak. Tui kuhria abih tih taneh pala phun mbang baoh pablei Tết Nguyên đán thun ni lac labaih 2.900 ha, sản lượng tui kuhria hu labaih 26 ribau tấn, glaong jang tukvak ni thun dahlau labaih 7.200 tấn. urang nong dalam tỉnh daok ba tabiak darak pasa Tết labaih 7.000 pandap baoh kayau mbeik thaik meng dom baoh kruac bung, baoh tamekai, đào tiên, pa-ok, baoh lahaong tsarak akhar thư pháp…

Gah Bruk ngak Dunya (ILO) brei thau, jit ruak Covid-19 ngak ka dunya lahik labaih 250 trieu bruk ngak dalam thun 2020; labaih 81 trieu urang oh hu bruk ngak. Ini lac bruk kan kandah sraw kadau trak abih bo darak bruk ngak di dunya brei yam tapa. Urak ini, hu rilo janih vaccin pacang caga jit ruak, min Gah Bruk ngak dunya kuhria mboh dahlau lac darak bruk ngak di dunya thun 2021 pasiam veik hu oh hadom, oh tani tanat.

Thủ tướng Italy Conte meda likau padeih ngak di harei 26/1 tui sa bruk hu maong lac piah padang sa rajaei bahrau hadei di rilo adit gaok rilo srau kadau. Menuac sia sahneng lac Thủ tướng Conte meda duah bruk ủy thác piah padang sa rajaei bahrau ba jalan ka taneh ia dalam tuk negar Italy daok gaok kan kandah di jit praong Covid-19, ngak ka labaih 85.000 urang metai saong ngak kan kandah tal gah kinh tế.

Ấn Độ birau brei thau, ruak kum manuk ada tamuh tabiak di 9 bang saong njom mbak tapa dom janih cim glai di 12 bang dalam taneh ia ini. Rajaei Ân Độ meda bayar jien ka urang raong hu manuk ada, baoh manuk nuk ada jeng yau dom janih pandap ngak meng rilo manuk ada njauk am cuk klak piah pacang jit ruak.Dahlau di nan, meng harei 13/1, jabat chức năng Ân Độ brei pakauk dom bruk pablei salih, khik ramik saong ngak rilo manuk ada di gah Barak saong Meraong ban ine New Delhi./.

Urang lang: Thu Thảo -Ái Nghiêm- 26/1