Harei ni lac harei pahadar 46 thun harei peih paha Khánh Hòa (2/4/1975 – 2/4/2021)

Dah page ni, hadei di tuk brei thau bruk buh phiếu saong brei tapa sarak ka bruk brei padeih ngak Thủ tướng rajaei, akaok Quốc hội Vương Đình Huệ hu alin bingu saong payua panuac dhar phor tal ong Nguyễn Xuân Phúc. Dalam vaktu ngak bruk di drei, Thủ tướng Nguyễn Xuân Phúc haong kapul rajaei hu caik veik rilo siam lagaih bahrau, brei mboh bruk sami samar, khang hatai dalam pato tacei, ba jalan padang ngak bruk ba tabiak dalam sarak di Đảng, di Quốc hội. Gah langiu Quốc hội, dom urang QH caong lac, hadei di tuk hu Quốc hội pilih ruah, Thủ tướng bahrau meda hu dom jalan ngak njauk, samar drah piah pasiam hu dom bruk daok tavak tavaiy dalam dak padang saong peih ngak hukum saong chất lượng kapul urang jaka ngak bruk.

Harei ni lac harei pahadar 46 thun harei peih paha Khánh Hòa (2/4/1975 – 2/4/2021). Meng sa tỉnh kan kathaot, rambah rambup kayua mesruh metak, pandap panda, ilamu kỹ thuật oh hu hagait, hadei di 46 thun peih paha , abih di nyu nan lac hadei di 35 thun peih bruk salih bahrau, tỉnh Khánh Hòa mek hu jak jeng prong gah patagok kinh tế, xã hội; bruk padang ngak Khánh Hòa kaya mekre mek hu dom siam mekre, ba tỉnh di gah Nam Trung bộ ni jeng sa dalam dom pasak kinh tế song du lịch prong pak di bhum song di negar.

Thủ tướng rajaei Nguyễn Xuân Phúc hu panuac tacei pato ka bruk brei thau "thần y" di mangaok mạng xã hội. Tui nan, Thủ tướng jao ka mintri Y tế dang akaok, pambuak haong mintri Thông tin saong truyền thông haong dom jabat pambuak tal pasang iek, langyah, khik ramik saong langyah ka nyu lagaih. Dahlau di nan, báo chí hu ndom ka bruk "sarau kadau thần y", khan lac tukvak jaik di ni hu bruk eng drei brei angan lac "lương y", "thần y" taong abih ruak di mangaok mạng xã hội. Dom urang ni hu yaih khan dom jru oh thau cambaih asal di nyu, iek ruak oh hu harak adat.

Harei 2/4, Jabat Cảnh sát điều tra - Công an tỉnh Bình Thuận brei thau dok chap khik muk Lê Thị Lại (ndih tapui thun 1964, daok di palei Phú Sum, xã Hàm Mỹ, huyện Hàm Thuận Nam, tỉnh Bình Thuận). Muk Lại ngak po yaok rituh akaok hụi yaom jien tỷ, nduac klaak palei meng bilan 1/2021. Dahlau di nan, di bilan 1/2021, yaok rituh urang main hụi dui tal sang muk Lại min sang klauk anek so. Dom urang ni duah jalan taom gaok muk Lại min oh hu yau nan ye ngka harak pathau tal Công an.

Pambuak tal bruk 2 urang likai bahrau praong njauk taong paoh dalam sang bac Trung học cơ sở Nguyễn Văn Tố (Quận 10), dah page 2/4, ong Nguyễn Thành Trung - Chánh Văn phòng Sở pato magru ban Hồ Chí Minh brei thau, Sở hu thau ka bruk rahtabiak di sang bac Trung cơ cơ sở Nguyễn Văn Tố. Urak ni Sở hu ieu kakei jabat pato magru Quận 10 pathau khan cambaih laih piah ka hu jalan pato tacei ka nyu njauk. Dahlau di nan, melam 1/4, di mangaok mạng xã hội hu clip mboh dua urang likai bahrau praong njauk sa urang jakar dân phòng caoh, taong, pah tame mbaok rilo mbang. Bruk nan rahtabiak di jabat giám thị di sang bac Trung học cơ sở Nguyễn Văn Tố, Quận 10. Tui khau tin camriep di abih brei thau 2 urang ni tame sang bac piah klaik pandap saong njauk dân phòng cap khik.

Jabat khik ramik jru tavoa châu Âu (EMA) hu tabiak panuac ndom lac kurhia tal urak oh hu hagait piah ka dom negar oh taduan bruk pandar vắc-xin pacang Covid-19 di công ty jru tavoa AstraZeneca kayua Anh song Thụy Điển roh duah patagok. Kuhria tal urak ni, rilo negar châu Âu brei padeih klauk vắc-xin di Át-tra Dê-nê-ca hadei di tuk hu sa urang gar drah tuk klauk jru. Dalam tuk nan, lambaok hãng jru ni ndom lac vắc-xin hu siam mekre, salamat. Langui di nan, hãng jru ni hu tui iek pren yava ka labaih 17 triệu urang hadei di tuk klauk vắc-xin oh mboh bruk gar rakh phổi, gar drah atau patrun tiểu cầu.

Hadei di rilo harei ginum biai, urang lambuak dom negar Liên minh châu Âu (EU) njauk gauk brei rami ramik jalan parabha vaccine ka dom negar dalam Liên minh châu Âu (EU). Tui nan, 5 negar urak ni daok gaok kan kandah di abih dalam bruk pacang caga jit ruak lac Bulgaria, Croatia, Estonia, Latvia saong Slovakia meda taduan hu 2 triệu 8 rituh 50 ribau dalam abih tih 10 triệu mbang vaccine di Pfizer/BioNTech bo EU kuhria taduan dalam quý II/2021. Min, Áo, CH Séc saong Slovenia hu panuac oh njauk hatai haong bruk ngak nan. Kayua yau nan ye, 3 negar ni meda taduam ginup vaccine tui bruk parabha yau urak ni iek tui menuac di dom negar. 19 negar dalam EU daok veik meda parabha gauk 6 triệu 6 rituh 60 ribau mbang vaccine. 

Urang jakar Ấn Độ brei thau hu 11 urang metai kayua njauk jru mek alak di bang Bihar, sa bhum palei kathaot di abih dalam negar ni. 8 urang metai di harei 31/3, song 3 dok veik metai sa harei hadei di nan. Urak ni dok 5 urang njauk jru mek meng alak dok hu iek ruak di sang iek ruak. Bruk nan rah tabiak dalam dom harei hadei di harei rija Holi, sa dalam dom rija prong abih di urang tui agama Hindu song bhian lac tuk bhap bini Ấn Độ menyum biak rilo alak./

Urang lang: Thu Thảo – Hani Pha – 02/04 15:58:43