Bộ đội Biên phòng tỉnh Kiên Giang bahrau chap khik sa kapan ikan pajeng labaih 20 ribau lít menyek oh thau asar di nyu

Dah page ni, mbang nyaom ka 10, Quốc hội mbang 14 yam tame mbang nyaom ka 2 di Hà Nội. Quốc hội pang harak khan ka danak dak binek ia kraong Than, tỉnh Ninh Thuận saong danak dak Bản Mồng, tỉnh Nghệ An. Tui nan, danak dak binek caik ia kraong Than hu taong abih jien buh tame labaih 716 ribau tỷ đồng, yau bruk ngak pabak ia pruh ka 4.500 ha taneh pala drak, ia pandar ka labaih 20 ribau sang bhap bini di bhum hạ lưu. Daok danak dak binek caik ia Bản Mồng, tukvak 1 hu abih tih jien buh tame 4.455 tỷ đồng, piah pabak ia pruh ka 18 ribau héc ta, ia ka công nghiệp, bhap bini pandar; caik ia pacang caga ia sua, trun ia sua ka hạ du saong pabak ka cak rok patagok ka gah ngak kong, rivang main.

Tal mesup ni, di tỉnh Quảng Nam jeng dok hu 23 urang lahik kayua glut jaleih tanrh, jaleih ceik rah tabiak dalam mbang ribuk ka 9 di dom huyện Nam Trà My, Phước Sơn song Hiệp Đức. Dom gah dong duah hu duah mboh sa atau di xã Phước Lộc, huyện Phước Sơn. UBND tỉnh Quảng Nam brei thau, harei ni , tỉnh daok hu ba 50 urang nao takai meng jlan glai tame labik glut jaleih di xã Phước Lộc piah duah urang gaok bala. Harei kabroi Sư đoàn Không quân 372 peih 2 mbang par song 300 urang cakaong naong meng jalan takai piah ba pandap mbang ka bhap bini 2 xã: Phước Lộc song Phước Thành njauk pacang cakak lavik harei. Harei ni, gah dong duah hu ba 30 urang cakaong naong meng jalan takai song peih 4 mbang par pajeng brah, pandap mbang menyum tame xã Phước Lộc.

Mbang par VN 243 meng ahaoh Boeing 787-9 tui kuhria par di maong 8 dah page harei 2/11, min tuk tuai tanat labik daok, haoh par meng mblang patauk par trun jalan par ye sa tuai pandar bật lửa cuh bi-ar. Urang ni hadei di nan samar drah padam pui, oh ngak kan kandah tal sruh ahaoh, min bruk ni hu tiếp viên duah mboh, pathau khan haong urang peih haoh. Samar chip ahaoh par mai viek mblang kapar saong urang nan hu jao ka gah an ninh mblang kapar haoh tui adat. Mbang par hu par tuk maong 9 harei 2/11. Gah kapar gah barak brei thau: bruk ngak nan di tuai lac ngak kan kandah, uy hiếp an ninh, salamat tal kapar haoh.

Bộ đội Biên phòng tỉnh Kiên Giang bahrau chap khik sa kapan ikan pajeng labaih 20 ribau lít menyek oh thau asar di nyu. Bruk ni hu mboh di beir harei kabroi (1/11), angaok kapan hu angan KG 93560 kayua muk Trần Ngọc Vân, ndih tapui thun 1971, dok di huyện An Biên, Kiên Giang ngak po song thuyền trưởng lac Đào Duy Thân, ndih tapui thun 1992 (anek likei di muk Vân). Urang khik kapan oh hu harak gar ngan song pandap panda nan. Urak ni kapan ikan hu gah chức năng ba mai bilai pasang iek Biên phòng Kinh Dài di Đồn Biên phòng Tây Yên piah pasang iek langyah tui adat hukum.

Mbang hajan khang dui atah labaih 2 maong di dah page ni (2/11) gam haong tukvak ia tagok ngak ka rilo gah jalan di langiu ban Bạc Liêu, tỉnh Bạc Liêu njauk ia dauk dalam, jalan mbak sarau kadhau. Ia dauk dalam ngak ka bruk nao mai, rilo sruh radaih matai jamriek oh nduac hu. Anak bruk ni, dom sang bac tiểu học di labik ban Bạc Liêu njauk brei ka anek saih padieh bac.

Harei ni (2/11), Anh song Liên minh châu Âu hu dom mbang ginum biai di Brussels (Bỉ), cong khin meda mek hu sa thỏa thuận pablei salih di kreih adit ni. Meyah 2 gah yam tapa hu dom bruk karei di gauk, thỏa thuận meh hu jeng hu rilo bruk karei di gauk, meng pablei salih, năng lượng mbiah tal pajeng ba kaya ikan . Min, meyah dom mbang ginum biai oh jeng, tui kuhria hu labaih 900 tỷ đô la Mỹ pok jien pablei salih di 2 gah yaok thun njauk khat lahik kayua jien je song hạn ngạch.

Giám đốc iek gah pilih ruah di quận Butler, bang Pennsylvania brei thau ka oh thau cambaih rilo phiếu bầu hu payua tal dom cử tri dalam mbang pilih ruah di adit anak tal. Tui CNN, dom urang gah bưu điện brei thau, quận taduan hu labaih 10.000 mbang ieu phone duah dom khau tin ka dom mblah harak hu ieu kakei min oh oh mek hu. Bruk kurang ni biak njauk duah hatai kayua Pennsylvania lac sa dalam dom bang chiến địa dalam bruk pilih ruah Tổng thống Mỹ thun ni. Tui sa mbang pasang iek manuac sia, ong Joe Biden daok dang dahlau ong Donald Trump 10 điểm saratuh di pakat negar.

Kuria tal mesup ni, urang metai dalam mbang megei boh taneh di tỉnh Izmir, gah pai di Thổ Nhĩ Kỳ hu tagok 62 urang. Tui jabat khik ramik bala song samar drah Thổ Nhĩ Kỳ, langui di urang metai dok hu 940 urang njauk rambuac dalam mbang megei boh taneh 6,6 độ rah tabiak harei 30/10. 218 urang dok hu iek ruak di sang iek ruak. Mintri Y tế Thổ Nhĩ Kỳ brei thau, dom bruk duah thau song dong duah dok hu peih ngak. Urak ni, hu 104 urang hu batabiak truh dom patau randiak jaleih nan./.

Urang lang: Thu Thảo – Hani Pha – 02/11 16:32:44