Jaik 10 thun ngak bruk di sang iek ruak đa khoa huyện Krông Pắk, bác sĩ Y Môl Ayun, Dhar Kapul Gru jru ranaih umo huyện Krông Pắk, tỉnh Đắk Lắk hu oh thau hadom mbang nao tal dom puk palei kan kandah piah iek ruak, brei jru ka mikva. Bác sĩ Y Môl khan lac, bruk kandaong veik dalam hatai hadei di yaok mbang nao, nan lac bruk kan kandah di mikva dom puk palei. Mikva takik hu nao tal dom labik iek ruak piah pasang iek pren yava, yaom lac ruak trak jeng takik hu nao tal. Kayua yau nan ye, hadei di yaok mbang nao, sa-ai dak mboh khin hu rik pren di drei rilo jang piah daong ka bhap bini hu iek ruak tapa dom mbang halan hatian nao iek ruak. Urak ini, lac urang dang akaok Dhar Kapul Gru jru ranaih umo huyện Krông Pắk, bác sĩ Y Môl daok kuhria peih praong bruk jak ba daong ka dom bruk ngak brei ka bhap bini kayua Dhar Kapul pambuak bruk haong Huyện Đoàn saong Tỉnh Hội peih tabiak: “ Drei mboh lac di dom xã bhum atah bayah ye pandap panda y tế biak kan kandah, hu rilo menuac thau lac drei ruak kik min oh nao iek ruak kayua oh hu jien. Yaok mbang kol dahlak nao yau nan jeng oh hu rilo jien padai nan ye daong hu meneing min, drei daok kuhria jak ba dom phòng khám tư hu mbaok tame dom danak dak iek ruak brei saoh nan, piah ieu pataom pren yavam, jien padai piah ngak ka danak dak hu khang jang, hu siam jang.”

  Jeng kak kajap haong bruk halan hatian di Kapul gru jru ranaih umo tỉnh Đắk Lắk meng tuk daok lac sinh viên, bác sĩ Lê Thị Minh Nguyệt, khoa Hồi sức cấp cứu Nhi – Nhi sơ sinh, Sang iek ruak đa khoa bhum Tây Nguyên jeng hu rilo mbang halan hatian nao, hu gam dom mbang tagok tal bhum taphia negar di Tây Bắc saong tapa negar Lào haong Campuchia. Tui bác sĩ Nguyệt, yaom lac daok rilo kan kandah, kurang rilo janih, min di dom labik kapul halan hatian nao tal, bhap bini biak chreih chrai taduan raok haong abih hatung hatian. Mikva hu mbaok meng biak aval piah hu iek ruak, mek jru. Tapa taom gaok, tư vấn, sa-ai haong rilo bác sĩ karei hu langyah brei bhap bini thau ka dom ruak bo mikva gaok, tacei mikva thau piah plaih ruak kik, blaoh brei jru ka yaok urang ruak. Yaom lac bruk ngak sit sot min nyu daong ka sa-ai saong dom y bac sĩ mboh hu yaom glaong di bruk drei daok ngak, meng nan paglaong jalan sahneng saong paglaong trách nhiệm ngan saong bruk ngak di drei: “Drei mboh mikva daok di dom bhum atah bayah kurang thau ka bruk iek ruak saong mikva jeng oh hu jien piah nao iek ruak. Nan ye drei hu mbaok tame nan piah dahlau di abih hu tacei ka mikva thau bruk iek glang pren yava. Ka dua lac drei hu iek ruak saong brei jru ka mikva, tapa nan hu daong meneing ka bruk iek ruak di mikva.”

  Pachreih tui bruk jak ba “Gru jru ranaih umo kayua pren yava bhap bini”, dalam dom thun tapa, Kapul Gru jru ranaih umo tỉnh Đắk Lắk hu rilo mbang nao tal dom puk palei bhum atah bayah, bhum taphia negar piah iek ruak, brei jru saong tacei jalan iek glang pren yava ka bhap bini. Ta-eng thun 2018, dalam tỉnh peih hu 40 mbang nao saong hu mbaok di jaik 1.300 y, bác sĩ saong urang kapul dam dara, iek ruak brei jru ka labaih 15 ribau mbang bhap bini. Gam saong nan, kapul daok hu daong yaok ribau pok pandap, pok jien bac brei ka urang kan kandah ngan saong yaom jien abih tih lac labaih 1 tỷ meteh.

Bác sỹ Hoàng Ngọc Anh Tuấn, urang dang akaok Kapul Gru jru ranaih umo tỉnh Đắk Lắk brei thau, dom bruk ngak di Kapul dui pachreih hu biak rilo gru jru hu mbaok tame. Njauk dom harei padeih padei puac adit, dom y, bác sĩ ranaih umo caik tukvak nao haong kapul tal dom puk palei daok rilo kan kandah piah daong ka bhap bini hu iek glang pren yava: “ Kapul Gru jru ranaih umo tỉnh Đắk Lắk tal urak ini patagok hu siam bruk ba akaok nao dahlau saong ieu pataom hu dom gru jru ranaih umo di tỉnh, khin daong ka bhap bini daok di bhum atah bayah. Kapul Gru jru ranaih umo di tỉnh oh lac patagok hu bruk ngak di tỉnh bo kol dahlak daok hu dom mbang halan hatian nao tal Lào, Campuchia, tal bhum Tây Bắc. Lingiu dom harei ngak bruk, ye dom harei padeih padei hu caik piah nao daong iek glang pren yava ka bhap bini.”

  Meng pren ranaih saong trách nhiệm bruk ngak, rilo gru jru ranaih umo di Đắk Lắk daok kham merat hu mbaok tame dom bruk ngak pahla, daong iek glang pren yava ka bhap bini. Tapa nan, hu daong pabak ilamu dalam bruk ngak, daong ka bhap bini bhum kan kandah hu iek glang pren yava saong tapa nan hu daong padang rup binguk siam mekre di urang gru jru diukrai siam mekre ka bhap bini./.