Yaom lac daok kan kandah min rilo sinh viên bangsa takik di Đắc Lắc kham merat yam tapa, oh lac bac megru siam bo daok kham merat hu mbaok dalam dom bruk ngak kayua bhap bini. H Xíu, urang vak di rayo sap ndom VN daok di Tây Nguyên hu kadha vak brei thau:

Lac urang anek ka 2 dalam sa baoh sang ngak nong di xã kan kathaot dalam huyện Buôn Đôn, tỉnh Đắc Lắc nan ye Vi Thị Tươi, bangsa Nùng, sinh viên gah Y Đa khoa, sang bac Đại học Tây Nguyên tuk halei jeng kham merat bac megru. Oh lac bac megru siam, Tươi daok hu mbaok tame rilo bruk di sang bac, lac sa urang dalam kalup kapul “Sa pren yava” di sang bac Đại học Tây Nguyên, bhian nao tal dom puk palei bhum urang bangsa takik piah pathau khan brei bhap bini thau dom bruk gah pren yava, hu mbaok tame rilo bruk kayua đoàn trường peih tabiak, rilo mbang hu mbaok tame chiến dịch mùa hè xanh, daong pren bilan pakacah saong hu 6 mbang halan hatian brei darah. Dalam luac 8 học kỳ tapa, Tươi tuk halei jeng mek hu angan xuất sắc, lac sinh viên 5 siam pakat sang bac. Vi Thị Tươi brei thau: Adei sahneng lac, 1 sinh viên ye bruk bac lac praong di abih, dang akaok di abih. Min adei mboh meyah bac saoh lac oh ka ginup, drei oh thau hu dom bruk lingiu karei karei, abih di nyu nan lac, dam dara brei halan hatian diukrai abih drei, kayua yau nan ye bo adei hu mbaok tame dom danak dak halan hatian, tapa nan adei mboh raidiuk hu makna jang, njauk diukrai jang, saong tukvak ngak sinh viên di drei hu rilo kadha piah hadar kanal jang.

  Sang hu tal 9 adei sa-ai likei kumei, dom sa-ai di drei bac da-a oh hu hadom bloh padeih bac, nan ye H Uyên Niê, bangsa Ê Đê, sinh viên gah pato pakai tiểu học, sang bac Cao Đẳng sư phạm Đắc Lắc dak kham merat bac megru biak siam piah jeng anai gru. H Uyên tuk halei jeng kham merat bac megru, mek hu angan xuất sắc di taong abih dom môn bac. H Uyên khan lac, mboh rilo adei sit dalam palei kayua sang kan kandah njauk padeih bac, nan ye adei caong bac tamat biak samar piah mai palei pato bac ka dom adei. Lingiu tuk bac di tal bac saong hu mbaok tame dom bruk Đoàn hội kayua sang bac peih tabiak, tuk mai rivang sang, abih di nyu nan lac tuk padeih hè, H Uyên jeng hu mbaok haong dam dara dalam palei peih tal bac ôn tập ka dom adei sit. Ini lac tuk daong ka H Uyên hu ba tabiak ngak dom hagait drei hu bac bloh,  jeng lac sa jalan ngak piah daong ka dom adei it dalam palei hu nao jaik akhar haroh jang. H Uyên Niê lac:  Raidiuk daok rilo kan kandah, rilo sang oh hu jien nan ye anek njauk padeih bac daok di sang daong amaik ame. Adei ruah gah tiểu học ini caong lac tuk bac tamat bloh, drei nao pato bac piah daong ka baoh sang, ka mikva puk paga, hu pato veik ka dom anek saih dom hagait bo drei hu bac bloh.

Daok ngan saong H Iem kpă, bangsa Ê Đê, sinh viên bac gah Sư phạm Lịch sử, sang bac Đại học Quy Nhơn, daok kham merat tui hatai caong takre di drei. Sang daok di huyện MDrắc, amaik ame ngak hamu ngak puh, taong abih 6 adei saai likei kumei jeng daok nao bac nan ye H Iem eng drei duah jien mbang bac tuk nao bac atah sang. Thau lac bruk bac nan biak praong, H Iem eng drei parabha tukvak bac da-a ka nyu lagaih, piah hu tukvak nao ngak duah jien saong hu mbaok tame dom bruk kayua Đoàn Hội dalam sang bac peih tabiak. Nan ye H Iem tuk halei jeng mek hu siam mekre dalam bac megru, hu dak loại giỏi saong lac sinh viên hadah krah di khoa Sư phạm Lịch sử sang bac Đại học Quy Nhơn dalam học kỳ meng bloh. H Iem Kpă brei thau: Suboh page adei medeih adei bac, tuk halei bac oh hu ye adei padeih padei, daok tuk oh nao bac ye adei nao ngak  pah di quán cà phê, quán pacuk, quán phở. Daok bruk hu mbaok tame dom bruk di sang bac bhian rah tabiak di harei adit, nan ye adei pataom mbaok tame.

 Yaom lac daok rilo kan kandah dalam raidiuk, min dom sinh viên bangsa takik di Đắc Lắc tuk halei jeng kham merat yam tagok, bac megru naih joi. Gam saong nan, dom adei jeng kham merat hu mbaok tame dom bruk  ngak pahla, daong ka mikva puk paga piah pasram paglaong ilamu ka drei, tapa nan rik daong pren yava di drei brei ka puk palei, labik dom adei diukrai./.