Dom paok lasei pandiak hu ba mai tal sang urang kan kathaot

Taduan mek paok lasei pahla hu ba mai  tal sang, muk Nguyễn Thị Được, 80 thun, daok di tổ dân phố 1, phường Thống Nhất, ban Buôn Ma Thuột drut drui brei thau, dom paok lasei hu daong ka 3 muk taco cadu manieng glaih glar nduac duah lisei huak yaok harei dalam dom harei daok paatah ni: “Sang dalak biak ka kandah, pasang metai 10 thun paje. Dalak raong 4 urang taco nao bac. Yaok harei dalak nao pablei baoh cóc, ổi pa-ok jhul radaih nao pablei tal 8-9 mon meng mai tal sang. Bilan Covid ni dalak padieh, padieh tal urak ni jaik 20 harei paje. Lisei ini dalak hu phường alin blei yaok harei, urang ba lasei mai tal sang, maong 11 yaok harei lac ba lasei mai, pandap mbang jeng bingi. Bilan jit rua ni biak thau dhal phol phường hu brei ka dalak lisei huak, hu daong prein ka dahlak”.

Jeng kan kandah yau muk Được, saai Hồ Thị Mỹ Lệ, daok di khối 6, phường Tân Tiến hu taduan 3 paok lasei ka diuk pasang saong anek kumei. Saai Lệ brei thau, dom paok lasei pandiak hu ba mai tal sang ngak ka saai biak bui sambai saong sanang hatai yaom lac daok gaok dom kan kandah kayua jit ruak: “Dua diuk pasang jeng joh jo, dalak sup mata nao pablei rong. Bilan jit ni pablei salih jeng gaok kan kandah min taduan hu dom bruk daong di dom adei saai ngak pahla ye dalak biak uan tabuan, hu  dom adei saai ba lasei brei, dalak biak thau dhal phol dom adei saai hu ba mai dom paok lasei tuk jit ruak yau ni”.

Dom paok lasei hu yaom jaik 25 ribau đồng, hu ginup ralaow, njam patam saong ia mbai, baok kayau rao cambuai, hu dom urang dalam kapul Ging lisei pahla” phường Thống Nhất tahanek blaoh ba mai tal tangin urang kan kathaot hu peih tabiak meng harei 5/8 tal urak ni. Muk Ngô Thị Đoan Trang, akaok kapul urang kumei phường Thống Nhất, urang dalam kapul Ging lisei pahla brei thau,  Ging lisei hu peih tabiak meng bilan 6/2015 piah daong lasei var jala pandiak yaom lap ka urang kan kathaot. Dom urang dalam kapul rilo meng lac urang jaka, urang daok ngak bruk di UB bhap bini phường Thống Nhất saong dom urang ngak pahla di dom kapul, tổ dân phố vil val pak ni.

Tuk jit ruak Covid-19 tamuh tabiak viek saong hu urang ruak di ban Buôn Ma Thuột, gam saong jhul khang bruk pathau khan pacang caga jit, kapul ngak lasei pahla jeng hu peih ngak rilo bruk padang kadung jien pacang caga jit saong daong dom kapul di daok pacang jit: “Piah ba tangin tame daong pacang caga jit ye kapul ngak lasei jeng hu tut angan haong mBan pato tacei pacang caga jit ban daong paok lasei huak var jala pandiak ka dom bilai pacang caga jit ye hu ngak meng harei 5/8 tal urak ni piah daong ka dom adei saai ngak bruk pacang caga jit. Saong phường jeng hu daong dom paok lasei ka dom sang kathaot di ban. Dalam bilan jit ni ye sa harei tahanek 100 paok, daok harei car tahanek 150 paok piah daong ka dom urang kan kandah, urang pablei vé số”.

Meng jaik 20 urang dalam kapul saong rilo urang ngak pahla, dalam nan rilo abih jeng lac urang jaka, viên chức nan ye piah khik ginup dom paok lisei yaok harei, dalam labaih 11 harei tapa, dom urang njauk parabha bruk piah ngak. Yaok dah page hu sa kapul hu mbaok tame ngak pandap mbang saong tanek lisei, buh tame hộp saong parabha tabiak piah ba nao tal labik taduan. Daok dom harei puac adit, abih kapul pataom tame ngak rilo jang saong parabha tabiak piah ba nao tal sang di dom urang kan kathaot, urang oh hu gauk gar, urang joh jo. Yaom lac labaih 70 thun, ong Trương Quốc Trình, akaok Hội chữ thập đỏ phường Thống Nhất jeng daok kham merat  hu mbaok tame saong lac urang dang akaok di kapul ngak lasei pahla meng tuk bahrau ngak tal urak ni..

Meng makna lac ngak pahla, meng tuk padang tabiak tal urak ni kapul Ging lisei pahla taduan hu bruk rik daong di rilo kapul nyaom, menuac urang. Abih di nyu nan lac, dalam mbang jit ruak ni, rilo urang ngak pahla hu mai daongg pandap mbang saong brah piah kapul hu ngak bruk. Tui kuhria, kapul daok daong paok lasei ka dom bilai saong urang kan kathaot mbiah tal tuk abih mbang brei daok paatah di gauk, hadei di nan meda pieh ngak viek saong khik danak dak daong var lasei jala pandiak yaom lap ka urang kan kathaot hu peih ngak meng dahlau nan./..

Urang lang: Thu Thảo – 31/08