Tapen jeik ia me-mbeik bahrau njuk meng bingun tagok, amuk Tống Thị Nhất, dok di palei 7, xã Cư Yang, huyện Ea Kar, dut hatai lac: Bingun dalam 7 mét, mbang ia sua meng bloh, ia nerak nduac tame, sang ngak abih jalan bo oh ab9ih mbau bruk.

Tapa 3 harei hajan ia sua, sang pah 2 jamriak  njuk ia, song 3  likei dam kuac bingun bloh, min ia dok me-mbeik song mbau lo, oh pandar hu. Meng harei kabroi tal ni nyu takik mbau hasit, min tuk raik ia tagok ye nyu kandaong veik yaok tal haluk di gah la mbat kadhi. Caik ka nyu kateng trun jeng oh pandar hu, bo njauk nao likau ia meng dom  sang hu bồn caik ia di gah angaok, naong mai caik dalam xoong quân dụng deih piah pandar, dok ia ni piah menei min. Rambah yau nan, min oh hu ia halei karei nan ye njauk pandar ia ini, thau ngak habar  ni

Hadei di nan, sang di muk Tống Thị Nhất song mik va dalam palei 7 hu dom urang jakar bilai y tế xã Cư Yang brei jru cloramin B song tacei jalan halang ia piah pandar. Dalam mbang hajan ia sua meng bloh, xã Cư Yang hu  8 palei  song labaih 1000 boh sang njauk ia dauk. Palei 15, palei atah abih di xã, song 65 boh sang lac urang bangsa Nùng dok di bhum jiak huyện M’đrắc, njauk ia sua pacang cakak oh nao mai hu.  Hadei di tuk ia trun, urang jakar y tế song mik va peih bruk puh ramik haci hacih piah pacang caga jit ruak. Ong Nông Văn Sơn, Akaok palei 15, xã Cư Yang, brei thau:

Palei 15 hadei di mbang hajan ia sua ye peih bruk ka mik va puh ramik hacih sa-at, pataom mek hareik taom dar sang, peih bruk pametai jamuk, bọ gậy piah nyaik di ruak pandiak  tabiak darah. Ka dua lac jalan gluh baok oh nao mai hu, njauk patom mik va pasiam veik. Urak ni dom kamuan nao bac dok kan kandah lo, min cang pandiak  tagok ka haluk nyu thu bloh pasiam veik jalan dhuan.

Mbang ia sua meng bloh, huyện Ea Kar hu 10 dalam  16 xã, ban sit khat lihik. Dalam nan trak di abih lac 3 xã Cư Yang, Cư Bông song Ea Ô, hu tal 5.000 boh sang njauk ia dauh ong sa urang metai.  Gah y tế brei  250kg cloramin B samar peih bruk xử lý ia pandar ka bhap bini.  Daok bruk pacang caga jit ruak, iek glang pren yava ka bhap bini hadei di mbang ia sua, Bác sỹ Gia Luy, Pasak  y tế huyện Ea Kar, brei thau:

Pasak  y tế pandar dom bilai y tế brei menuac hu mbaok luac harei melam piah caga pacang jit ruak kayua hajan. Di dom puk palei duah ia njauk tacei mik va pandar  cloramin B khử trùng ia pandar piah khik caga pren yava. Kayua dua lac hu jalan caga dom ruak bhian rah tabiak hadei di  hajan ia sua yau ruak meta meriak, ruak chraoh aik, ruak pandiak tabiak darah…saong tapa rayo papar sap puk palei, khan brei bhap bini thau ka dom jit ruak, njauk nao tal balai y tế iek ruak.

Bác sỹ Phạm Văn Lào, Giám đốc Pasak  y tế dự phòng Đăk Lăk brei thau, mbang hajan ia sua meng bloh ngak dauh  labaih 10 ribau bingun ia pandar. Tapen bruk kuhria caga ginup dom trang thiết bị y tế, tacei pato bhap bini vệ sinh môi trường, tỉnh hu brei  600kg cloramin B ka dom bilai  y tế, dong mik va pasiam jalan ia.  Urak ni dalam tỉnh oh ka hu dom ruak hadei ia sua. Min, oh pabiar bruk sangka, gah y tế, dom gah di puk palei song bhap bini jeng dok kham merat peih ngak dom jalan pacang caga jit ruak./.